TNPSC தேர்வுக்கான முக்கிய தினசரி நடப்பு நிகழ்வுகள் – 05-03-2026

சர்வதேசச் செய்திகள்

இலங்கை அருகே அமெரிக்கா ஈரானிய போர்க்கப்பலை மூழ்கடித்தது

அமெரிக்க நீர்மூழ்கிக் கப்பல் ஒரு டார்பிடோ (Torpedo) தாக்குதலை மேற்கொண்டு ஈரானின் போர்க்கப்பல் IRIS Dena-வை இந்தியப் பெருங்கடலில் இலங்கை கடற்கரைக்கு அருகில் மூழ்கடித்தது. இந்த சம்பவம் இரண்டாம் உலகப் போருக்குப் பிறகு ஒரு எதிரி கப்பல் டார்பிடோ மூலம் மூழ்கடிக்கப்பட்ட முதல் நிகழ்வாகக் குறிப்பிடப்படுகிறது. தாக்குதல் சர்வதேச கடல் பகுதியில், இலங்கையின் தெற்குக் கடற்கரையில் உள்ள காலே (Galle) நகரத்திலிருந்து சுமார் 40 கடல் மைல் தொலைவில் நடைபெற்றது. இந்தத் தாக்குதலை அமெரிக்க பாதுகாப்புச் செயலர் Pete Hegseth உறுதிப்படுத்தினார். மூழ்கிய IRIS Dena கப்பல், இந்தியாவின் விசாகப்பட்டினத்தில் நடைபெற்ற International Fleet Review 2026 நிகழ்வில் பங்கேற்ற பின்னர் ஈரானுக்கு திரும்பிக் கொண்டிருந்தது. அவசர அழைப்பைப் பெற்றதையடுத்து இலங்கை கடற்படை மீட்பு நடவடிக்கை மேற்கொண்டு 32 மாலுமிகளை மீட்டதுடன் 83 உடல்களை மீட்டது.

அறிக்கைகள் மற்றும் குறியீடுகள்

சிறுவர் உடல் பருமன் – உலகளவில் இந்தியா இரண்டாவது இடம்

உலக உடல் பருமன் கூட்டமைப்பு (World Obesity Federation) வெளியிட்ட World Obesity Atlas 2026 அறிக்கையின்படி, மார்ச் 4 – World Obesity Day முன்னிட்டு வெளியிடப்பட்ட தரவுகளின்படி, உயர் உடல் நிறை குறியீடு (BMI) கொண்ட குழந்தைகளின் எண்ணிக்கையில் இந்தியா உலகளவில் இரண்டாவது இடத்தில் உள்ளது. 2025 ஆம் ஆண்டில், இந்தியாவில் 5–9 வயதுடைய 15 மில்லியன் குழந்தைகள் மற்றும் 10–19 வயதுடைய 26 மில்லியனுக்கும் அதிகமான குழந்தைகள் அதிக எடை அல்லது உடல் பருமனுடன் இருந்தனர். உலகளவில் 5–19 வயது பள்ளி மாணவர்களில் 200 மில்லியனுக்கும் அதிகமான உடல் பருமன் கொண்ட குழந்தைகள் 10 நாடுகளில் மட்டுமே அதிகமாக காணப்படுகின்றனர். இதில் சீனா 62 மில்லியன் குழந்தைகளுடன் முதல் இடத்தில், இந்தியா 41 மில்லியன் குழந்தைகளுடன் இரண்டாவது இடத்தில் மற்றும் அமெரிக்கா 27 மில்லியன் குழந்தைகளுடன் அடுத்த இடத்தில் உள்ளன; இதில் 14 மில்லியன் இந்தியக் குழந்தைகள் உடல் பருமனுடன் உள்ளனர். 2040 ஆம் ஆண்டுக்குள், இந்தியாவில் உயர் இரத்த அழுத்தம் (Hypertension) மற்றும் உயர் இரத்த சர்க்கரை (Hyperglycaemia) போன்ற உயர் BMI தொடர்பான நோய்கள் அதிகரிக்கும் என கணிக்கப்பட்டுள்ளது. மேலும் இந்தியாவில் 11–17 வயது இளம்பருவத்தினரில் 74% பேர் பரிந்துரைக்கப்பட்ட உடற்பயிற்சி அளவை அடைவதில்லை, மேலும் 1–5 மாத குழந்தைகளில் 32.6% பேர் போதுமான தாய்ப்பால் பெறுவதில்லை. 15–49 வயது பெண்களில் 13.4% பேர் உயர்ந்த BMI கொண்டுள்ளனர் மற்றும் 4.2% பேர் Type-2 Diabetes நோயுடன் வாழ்கின்றனர்; 6–10 வயது குழந்தைகள் நாளொன்றுக்கு சராசரியாக 50 மிலி சர்க்கரை கலந்த பானங்களை உட்கொள்கின்றனர்.

இந்தியாவில் இணையதள தணிக்கை நடைமுறைகள் – ஆய்வு

“Poisoned Wells: Examining the Scale of DNS Censorship in India” என்ற ஆய்வு அறிக்கை, இந்தியாவில் இணைய சேவை வழங்குநர்கள் (ISPs) மேற்கொள்ளும் இணையதள முடக்கும் நடைமுறைகளில் உள்ள முரண்பாடுகளை வெளிப்படுத்தியுள்ளது. இந்த ஆய்வை ஆராய்ச்சியாளர் கரண் சைனி (Karan Saini) மேற்கொண்டார். இதில் DNS Filtering முறையின் மூலம் 43,083 தனித்துவமான Apex Domains முடக்கப்பட்டிருப்பது உறுதி செய்யப்பட்டுள்ளது; இது முந்தைய ஆய்வில் பதிவான 6,787 களப் பெயர்களை விட சுமார் ஆறு மடங்கு அதிகமாகும். ஆய்வின் போது 23 கோடிக்கும் அதிகமான Domain Names சோதிக்கப்பட்டன. இந்த ஆய்வுக்கு Open Technology Fund (Washington D.C.) மற்றும் Georgia Institute of Technology ஆதரவு வழங்கின. ஆய்வின் படி தீவிரவாதம் மற்றும் பயங்கரவாதம் தொடர்பான இணையதளங்களில் 40% மட்டுமே அனைத்து முக்கிய ISPs (ACT Fibernet, MTNL, Airtel, Jio, Connect Broadband, YOU Broadband) மூலம் ஒரே விதமாக முடக்கப்பட்டுள்ளன; மேலும் திருட்டுத் திரைப்பட மற்றும் டிவி தளங்கள் 4.54%, ஆபாச இணையதளங்கள் 0.53%, மற்றும் சூதாட்ட தளங்கள் 13.48% மட்டுமே அனைத்து நெட்வொர்க்குகளிலும் முடக்கப்பட்டுள்ளன. இந்தியாவில் இணையத் தணிக்கையின் முக்கிய தொழில்நுட்பமாக DNS Filtering பயன்படுத்தப்படுகிறது, அதேசமயம் Server Name Inspection போன்ற பிற முறைகளும் பயன்படுத்தப்படுகின்றன; மேலும் இந்தியாவின் சட்டக் கட்டமைப்பு இணைய தணிக்கைக்கான குறிப்பிட்ட தொழில்நுட்ப முறையை கட்டாயப்படுத்தவில்லை, எனவே ISPs தங்களின் தொழில்நுட்ப திறன்களின் அடிப்படையில் தணிக்கை முறைகளைத் தேர்வு செய்கின்றனர்.

விளையாட்டுச் செய்திகள்

டி20 உலகக் கோப்பையில் அதிவேக சதம் – ஃபின் ஆலன் சாதனை

நியூசிலாந்து கிரிக்கெட் வீரர் ஃபின் ஆலன் (Finn Allen), டி20 உலகக் கோப்பை வரலாற்றில் அதிவேக சதத்தை பதிவு செய்து 33 பந்துகளில் சதம் அடித்தார். இந்த சாதனையை அவர் தென்னாப்பிரிக்காவுக்கு எதிரான அரையிறுதி ஆட்டத்தில் நிகழ்த்தினார். இதன் மூலம் 2016 ஆம் ஆண்டு டி20 உலகக் கோப்பையில் இங்கிலாந்துக்கு எதிராக 47 பந்துகளில் சதம் அடித்த மேற்கிந்தியத் தீவுகளின் கிரிக்கெட் வீரர் கிறிஸ் கெயில் (Chris Gayle) வைத்திருந்த சாதனையை முறியடித்தார். மேலும் ஆட்டமிழக்காமல் எடுத்த ஃபின் ஆலனின் 100 ரன்கள், டி20 உலகக் கோப்பை நாக்-அவுட் போட்டிகளில் பதிவான அதிகபட்ச ஸ்கோராக அமைந்தது.

தமிழ்நாடு செய்திகள்

16-ஆம் நூற்றாண்டு திருமங்கை ஆழ்வார் வெண்கலச் சிலை இந்தியாவிற்கு திருப்பி ஒப்படைப்பு

இங்கிலாந்தின் ஆக்ஸ்போர்டு நகரில் உள்ள Ashmolean Museum நிறுவனம், 16-ஆம் நூற்றாண்டைச் சேர்ந்த திருமங்கை ஆழ்வார் (Thirumangai Alvar) வெண்கலச் சிலையை இந்திய அரசாங்கத்திடம் ஒப்படைத்துள்ளது. இந்தச் சிலை தமிழ்நாடு தஞ்சாவூர் மாவட்டத்தில் உள்ள சுந்தரராஜ பெருமாள் கோயிலுக்குச் சொந்தமானது என ஆய்வுகள் மூலம் உறுதி செய்யப்பட்டது. இந்த ஒப்படைப்பு நிகழ்ச்சி லண்டனில் உள்ள இந்திய தூதரகத்தில் (High Commission of India, London) நடைபெற்றது. இதில் Ashmolean Museum இயக்குநர் Xa Sturgis மற்றும் கிழக்கு கலைத் துறையின் தலைவர் பேராசிரியர் Mallica Kumbera Landrus கலந்து கொண்டனர். இந்தச் சிலை 1967 ஆம் ஆண்டு Ashmolean Museum மூலம் தனியார் சேகரிப்பாளர் J. R. Belmont என்பவரிடமிருந்து Sotheby’s catalogue மூலம் வாங்கப்பட்டது. நவம்பர் 2019-இல், ஒரு பிரெஞ்சு அறிஞர், 1957-ஆம் ஆண்டு எடுக்கப்பட்ட புகைப்படத்தின் அடிப்படையில், இந்தச் சிலை Institut Français de Pondichéry (IFP) ஆவணக் காப்பகத்தில் உள்ள பதிவுகளின் மூலம் சுந்தரராஜ பெருமாள் கோயிலுடன் தொடர்புடையது என்பதை அடையாளம் கண்டார். பிப்ரவரி 11, 2020 அன்று கோயில் நிர்வாக அதிகாரி அசல் சிலை மாற்றப்பட்டுள்ளதாக காவல்துறையில் புகார் அளித்தார்; அதன் பின்னர் மார்ச் 3, 2020 அன்று இந்திய தூதரகம் சிலையை திரும்பப் பெற முறைப்படி கோரிக்கை வைத்தது.

‘புனல்’ ஒருங்கிணைந்த குடிநீர் குறைதீர் மையம் தொடக்கம்

முதல்வர் மு.க. ஸ்டாலின், தமிழ்நாடு ஒருங்கிணைந்த குடிநீர் குறைதீர் மையமான “புனல்” (Punal) மற்றும் கட்டணமில்லா சேவை எண் 1916-ஐ தொடங்கி வைத்தார். இந்த மையம் தமிழ்நாடு குடிநீர் வழங்கல் மற்றும் வடிகால் வாரியம் (TWAD Board) மூலம் நிறுவப்பட்டதாகும். இது குடிநீர் கிடைக்கும் தன்மை, நீரின் தரம் மற்றும் விநியோக இடையூறு தொடர்பான புகார்கள் பதிவு செய்ய பொதுமக்களுக்கு ஒருங்கிணைந்த தளத்தை வழங்குகிறது மற்றும் 24 மணி நேரமும் செயல்படுகிறது. இந்த மையம் தமிழ்நாடு குடிநீர் வழங்கல் மற்றும் வடிகால் வாரியம், நகராட்சி நிர்வாக இயக்குநரகம், பேரூராட்சிகள் இயக்குநரகம், மற்றும் ஊரக வளர்ச்சி மற்றும் ஊராட்சித் துறையின் ஆணையரகம் ஆகிய துறைகளை ஒருங்கிணைக்கிறது. பொதுமக்கள் IVR சேவை, கட்டணமில்லா 1916 எண், punal.tn.gov.in இணையதளம், “Punal Citizen App” மற்றும் 94 9999 1916 என்ற எண்ணுக்கு ‘Hi’ அனுப்புதல் ஆகிய முறைகள் மூலம் குடிநீர் தொடர்பான புகார்களை பதிவு செய்யலாம்.

பிரபலமானவர்கள், விருதுகள் மற்றும் நிகழ்வுகள்

கலைச் செம்மல்’ விருது 2025–26 வழங்கப்பட்டது

தமிழ்நாடு அரசின் கலை பண்பாட்டுத் துறை வழங்கும் 2025–26 ஆம் ஆண்டுக்கான ‘கலைச் செம்மல்’ விருதுகள், தமிழ் வளர்ச்சி மற்றும் செய்தித்துறை அமைச்சர் மு.பெ. சாமிநாதன் மூலம் சென்னை தலைமைச் செயலகத்தில் நடைபெற்ற நிகழ்ச்சியில் வழங்கப்பட்டன. இந்த விருது மரபுவழி மற்றும் நவீன பாணி ஓவியம் மற்றும் சிற்பக் கலைகளில் சிறந்த கலைஞர்களுக்கு ஆண்டுதோறும் வழங்கப்படுகிறது; இதில் ₹1 லட்சம் பரிசுத்தொகை, செப்புப் பட்டயம் மற்றும் பாராட்டுச் சான்றிதழ் வழங்கப்படுகிறது மற்றும் ஆண்டுதோறும் 6 கலைஞர்கள் தேர்வு செய்யப்படுகின்றனர். 2025–26 ஆண்டிற்காக மரபுவழி ஓவியப் பிரிவில் மா. பாலசுப்ரமணியன், மரபுவழி சிற்பப் பிரிவில் தே. ஸ்ரீகண்ட ஸ்தபதி மற்றும் த.உ. பத்மநாபன், நவீன பாணி ஓவியப் பிரிவில் கோ. வில்வநாதன் மற்றும் மு. ராஜா, மற்றும் நவீன பாணி சிற்பப் பிரிவில் ச. சாந்தி தேர்வு செய்யப்பட்டனர். இந்த நிகழ்ச்சியில் சுற்றுலா, பண்பாடு மற்றும் அறநிலையங்கள் துறை செயலர் டாக்டர் க. மணிவாசன், கலை பண்பாட்டுத் துறை இயக்குநர் எஸ். வளர்மதி, மற்றும் இணை இயக்குநர் ஜெ. கார்குழலி கலந்து கொண்டனர்.

ஈரானின் புதிய உச்சத் தலைவராக மோஜ்தபா காமேனி தேர்வு

மறைந்த அயத்துல்லா அலி காமேனியின் மகனான மோஜ்தபா ஹொசைனி காமேனி (56), ஈரானின் புதிய உச்சத் தலைவராக (Supreme Leader of Iran) தேர்வு செய்யப்பட்டுள்ளார். இந்தத் தேர்வை 88 ஷியா மதகுருமார்களைக் கொண்ட ‘Assembly of Experts’ என்ற அமைப்பு மேற்கொண்டது. ஈரானின் மதகுருவும் உச்சத் தலைவருமான அயத்துல்லா அலி காமேனி, அமெரிக்கா மற்றும் இஸ்ரேல் இணைந்து நடத்திய தாக்குதலில் 40-க்கும் மேற்பட்ட தலைவர்களுடன் உயிரிழந்ததைத் தொடர்ந்து இந்தத் தேர்வு நடைபெற்றது. அதற்கு முன்பு அலிரேசா அராஃபி (Alireza Arafi) இடைக்கால உச்சத் தலைவராக நியமிக்கப்பட்டிருந்தார். கடந்த 27 ஆண்டுகளாக ஈரான் அரசியலில் முக்கிய பங்காற்றி வந்த மோஜ்தபா காமேனி, தற்போது ஈரானின் உச்சத் தலைவராக அதிகாரப் பொறுப்பை ஏற்றுள்ளார்.

கேரளத்தில் மலையாளம் ஒரே அலுவல்முறை மொழி

கேரள மாநில ஆளுநர் ராஜேந்திர விஸ்வநாத் அர்லேகர், ‘மலையாள மொழி மசோதா – 2025’ (Malayalam Language Bill–2025)-க்கு ஒப்புதல் வழங்கினார். இந்த மசோதா கேரள அரசு நிர்வாகத்தில் மலையாளத்தை ஒரே அலுவல்முறை மொழியாக அறிவிக்கிறது. இந்த மசோதா 2024 ஆம் ஆண்டு அக்டோபரில் கேரள சட்டப்பேரவையில் நிறைவேற்றப்பட்டது. மசோதாவின் படி, கேரளத்தில் உள்ள அரசு மற்றும் அரசு உதவிபெறும் பள்ளிகளில் 10-ஆம் வகுப்பு வரை மலையாளம் முதல் மொழிப் பாடமாக கற்பது கட்டாயமாக்கப்பட்டுள்ளது. அதேசமயம் மலையாளம் தாய்மொழி அல்லாத மாணவர்களுக்கு விதிவிலக்கு வழங்கப்பட்டுள்ளது; குறிப்பாக பிற மாநிலங்கள் மற்றும் வெளிநாடுகளில் இருந்து கேரளத்தில் கல்வி பயிலும் மாணவர்கள் 9, 10-ஆம் வகுப்பு மற்றும் மேல்நிலைப் பள்ளி அளவிலான கட்டாய மலையாளத் தேர்வுகளில் இருந்து விலக்கு பெறுவர். மேலும் கேரளத்தில் வாழும் மொழியியல் சிறுபான்மையினரான தமிழ் மற்றும் கன்னட மொழிப் பேசுவோர், கேரள அரசுடன் தங்களின் தொடர்புகளை தங்களின் தாய்மொழியிலேயே மேற்கொள்ளும் உரிமை பெற்றுள்ளனர்.