TNPSC தேர்வுக்கான முக்கிய தினசரி நடப்பு நிகழ்வுகள் – 19-06-2026

தேசியச் செய்திகள்

ஜார்க்கண்ட் மற்றும் மிஸோரம் மாநிலங்களவைத் தேர்தல்

ஜார்க்கண்ட் மற்றும் மிஸோரம் மாநிலங்களவைத் தேர்தல்களில் ஆளும் கட்சிகள் மற்றும் கூட்டணி ஆதரவு வேட்பாளர்கள் வெற்றி பெற்றனர். 81 உறுப்பினர்களைக் கொண்ட ஜார்க்கண்ட் சட்டப்பேரவையில், ஜார்க்கண்ட் முக்தி மோர்ச்சா (JMM) தலைமையிலான இந்தியா கூட்டணிக்கு 56 எம்எல்ஏக்களும், தேசிய ஜனநாயக கூட்டணிக்கு (NDA) 24 எம்எல்ஏக்களும் இருந்தனர். இரண்டு மாநிலங்களவை இடங்களுக்கு வைத்யநாத் ராம், பிரணவ் ஜா மற்றும் பாஜக ஆதரவு பெற்ற சுயேச்சை வேட்பாளர் பரிமல் நாத்வானி போட்டியிட்டனர். வெற்றி பெற குறைந்தபட்சம் 28 எம்எல்ஏக்களின் வாக்குகள் தேவைப்பட்டது. வைத்யநாத் ராம் 30 வாக்குகளும், பரிமல் நாத்வானி 28 வாக்குகளும் பெற்று வெற்றி பெற்றனர். பிரணவ் ஜா 20 வாக்குகள் மட்டுமே பெற்றார். இந்தத் தேர்தல் ஜேஎம்எம் நிறுவனர் சிபு சோரன் மறைவு மற்றும் மாநிலங்களவை உறுப்பினர் தீபக் பிரகாஷ் பதவிக்காலம் நிறைவடைந்ததைத் தொடர்ந்து நடைபெற்றது. மிஸோரம் மாநிலத்தின் 40 உறுப்பினர்களைக் கொண்ட சட்டப்பேரவையில், ஜோரம் மக்கள் இயக்கம் (ZPM) 27 உறுப்பினர்களைக் கொண்டுள்ளது. அக்கட்சியின் வேட்பாளர் லால்ட்லுவாங்கிமா 26 வாக்குகள் பெற்று வெற்றி பெற்றார். இந்தத் தேர்தலுக்குப் பிறகு மாநிலங்களவையில் தேசிய ஜனநாயக கூட்டணியின் பலம் 150 ஆக உயர்ந்தது; மாநிலங்களவையில் மூன்றில் இரண்டு பங்கு பெரும்பான்மைக்கு 163 உறுப்பினர்கள் தேவைப்படுகிறது.

பிஎம்-கிசான் 23-வது தவணை மற்றும் பயிர் காப்பீட்டுத் திட்டங்கள்

பிஎம்-கிசான் திட்டம் 2019 ஆம் ஆண்டு தொடங்கப்பட்டு, விவசாயிகளுக்கு நேரடி நிதியுதவி வழங்கும் மத்திய அரசுத் திட்டமாகும். இத்திட்டத்தின் 23-வது தவணையாக, நாடு முழுவதும் 9.44 கோடி விவசாயிகளின் வங்கிக் கணக்குகளில் தலா ₹2,000 வீதம் மொத்தம் ₹18,880 கோடி நேரடியாக செலுத்தப்பட உள்ளது. இந்த நிதி பரிமாற்றத்தை பிரதமர் நரேந்திர மோடி மேற்கு வங்க மாநிலத்தின் ஹூக்ளி மாவட்டத்தில் தொடங்கி வைக்க உள்ளார். மேற்கு வங்கத்தில் மட்டும் 45.35 லட்சம் விவசாயிகளுக்கு ₹907 கோடி வழங்கப்பட உள்ளது. மத்திய வேளாண்துறை அமைச்சர் சிவராஜ் சிங் சௌஹான் தெரிவித்தபடி, 2019 முதல் இதுவரை பிஎம்-கிசான் திட்டத்திற்கு ₹4.46 லட்சம் கோடி நிதி வழங்கப்பட்டுள்ளது. மேற்கு வங்க மாநில விவசாயிகளுக்கு மட்டும் இதுவரை ₹15,055 கோடி வழங்கப்பட்டுள்ளது. ஹூக்ளியில் நடைபெறும் நிகழ்ச்சியில் பிரதமரின் விரிவான பயிர் காப்பீட்டுத் திட்டம் மற்றும் மறுசீரமைப்பு வானிலை அடிப்படையிலான பயிர் காப்பீட்டுத் திட்டம் ஆகியவற்றையும் பிரதமர் தொடங்கி வைக்க உள்ளார். இந்த இரண்டு திட்டங்களுக்கான மொத்த மதிப்பீடு ₹12,200 கோடி ஆகும்.

2025–26 இபிஎஃப் வட்டி விகிதம்

2025–26 நிதியாண்டிற்கான தொழிலாளர் வருங்கால வைப்புத் தொகை (EPF) வட்டி விகிதமாக 8.25 சதவீதத்தை மத்திய அரசு ஒப்புதல் அளித்துள்ளது. இந்த வட்டித் தொகை 7 கோடிக்கும் மேற்பட்ட இபிஎஃப் சந்தாதாரர்களின் கணக்குகளில் ஜூன் 2026-இல் வரவு வைக்கப்பட உள்ளது. இந்த வட்டி விகிதம் மார்ச் 2026-இல், மத்திய தொழிலாளர் மற்றும் வேலைவாய்ப்புத் துறை அமைச்சர் மன்சுக் மாண்டவியா தலைமையில் நடைபெற்ற கூட்டத்தில் நிர்ணயிக்கப்பட்டது. தொழிலாளர் வருங்கால வைப்பு நிதி அமைப்பு (EPFO)-வின் உயர்மட்ட முடிவெடுக்கும் வாரியத்தின் பரிந்துரை மத்திய நிதியமைச்சகத்திற்கு இறுதி ஒப்புதலுக்காக அனுப்பப்பட்டது. நிதியமைச்சகத்தின் ஒப்புதலுக்குப் பிறகு வட்டித் தொகை சந்தாதாரர்களின் கணக்குகளில் வரவு வைக்கப்படுகிறது. 2023–24 நிதியாண்டு முதல் தொடர்ந்து மூன்றாவது ஆண்டாக இபிஎஃப் வட்டி விகிதம் 8.25 சதவீதமாகவே நீடித்து வருகிறது.

சென்னையில் நமோ ஏவிஜிசி பயிற்சி மையம்

நமோ ஏவிஜிசி பயிற்சி மையம் சென்னை பல்லாவரத்தில் மத்திய தகவல் மற்றும் ஒலிபரப்புத்துறை இணை அமைச்சர் எல். முருகன் அவர்களால் தொடங்கி வைக்கப்பட்டது. இந்த மையம் செயிண்ட் தாமஸ் மவுண்ட் மற்றும் பல்லாவரம் கண்டோன்மெண்ட் வாரியம் மற்றும் தேசிய திரைப்பட மேம்பாட்டுக் கழகம் (NFDC) இணைந்து நடத்தும் 3டி அனிமேஷன் மற்றும் விஷுவல் எஃபெக்ட்ஸ் (VFX) தொடர்பான நீண்டகால திறன் மேம்பாட்டு பயிற்சி மையமாகும். இம்மையம் அறிஞர் அண்ணா கண்டோன்மெண்ட் உயர்நிலைப் பள்ளி வளாகத்தில் செயல்படுகிறது. இத்திட்டத்தின் கீழ் மாணவர்களுக்கு 990 மணி நேர பயிற்சி வழங்கப்பட உள்ளது. முதற்கட்டமாக 50 மாணவர்கள் இரண்டு பிரிவுகளாகத் தேர்வு செய்யப்பட்டுள்ளனர். மும்பையில் நடைபெற்ற WAVES (World Audio Visual and Entertainment Summit) மாநாடு மற்றும் ₹400 கோடி செலவில் தொடங்கப்பட்ட இந்தியன் இன்ஸ்டிடியூட் ஆஃப் கிரியேட்டிவ் டெக்னாலஜி ஆகியவை ஏவிஜிசி (Animation, Visual Effects, Gaming and Comics) துறையின் முக்கிய முன்னேற்றங்களாக குறிப்பிடப்பட்டுள்ளன. தேசிய கல்விக் கொள்கையின் கீழ் நாடு முழுவதும் 15,000 பள்ளிகளிலும் 500 கல்லூரிகளிலும் ஏவிஜிசி பாடப்பிரிவுகள் அறிமுகப்படுத்தப்பட்டு வருகின்றன.

செயற்கை நுண்ணறிவு பணிக்குழு அமைத்த ஐஆர்டிஏஐ

இந்திய காப்பீட்டு ஒழுங்குமுறை மற்றும் வளர்ச்சி முகமை (IRDAI), காப்பீட்டுத் துறைக்கான நிர்வாகக் கட்டமைப்புகள், சிறந்த நடைமுறைகள் மற்றும் பாதுகாப்பு வழிகாட்டுதல்களை உருவாக்க செயற்கை நுண்ணறிவு (AI) தொடர்பான ஏழு பேர் கொண்ட பணிக்குழுவை அமைத்துள்ளது. இந்த பணிக்குழுவின் தலைவராக ஐஐஐடி ஹைதராபாத் (IIIT Hyderabad) இயக்குநர் சந்தீப் கே. சுக்லா நியமிக்கப்பட்டுள்ளார். இக்குழு செயற்கை நுண்ணறிவின் (AI) தாக்கம், சவால்கள் மற்றும் அபாயங்களை ஆய்வு செய்து, காப்பீட்டாளர்கள், பாலிசிதாரர்கள் மற்றும் காப்பீட்டுச் சூழல் அமைப்பின் மீது ஏற்படும் விளைவுகளை மதிப்பிடும். மேலும், காப்பீட்டுத் துறையில் AI பயன்பாடு, செயல்படுத்தல், முதிர்ச்சி மற்றும் தற்போதைய AI நிர்வாக நிலையை ஆய்வு செய்வதுடன், ஒழுங்குபடுத்தப்பட்ட அமைப்புகள் பயன்படுத்தும் AI அமைப்புகளின் மதிப்பீட்டையும் மேற்கொள்ளும். Frontier AI கருவிகளின் தாக்கம், AI மூலம் நிகழும் தானியங்கி தாக்குதல்களைத் தடுக்க பாதுகாப்பு கட்டமைப்புகள், துறை அளவிலான அழுத்தச் சோதனைகள் (Stress Tests) தேவைகள் மற்றும் காப்பீட்டு கோரல்கள், மோசடித் தடுப்பு போன்ற துறைகளில் AI-ஐ நெறிமுறை, வெளிப்படைத்தன்மை மற்றும் விளக்கத்தன்மையுடன் பயன்படுத்துவதற்கான நிர்வாகக் கட்டமைப்பை பரிந்துரைப்பதும் இப்பணிக்குழுவின் பொறுப்பாகும்.

நடைபாதை உரிமை குறித்து உச்ச நீதிமன்ற தீர்ப்பு

இந்திய உச்ச நீதிமன்றம், நீதிபதிகள் பி.எஸ். நரசிம்மா மற்றும் ஏ.எஸ். சந்தூர்கர் அடங்கிய அமர்வு வழங்கிய தீர்ப்பில், வழிகாட்டு எல்லைகளுடன் கூடிய நடைபாதையில் நடப்பது ஒரு அடிப்படை உரிமை என்று அறிவித்துள்ளது. இந்த உரிமை, இந்திய அரசியலமைப்பின் பிரிவு 19(1)(d)-இன் கீழ் வழங்கப்பட்ட சுதந்திரமாக நடமாடும் உரிமை மற்றும் பிரிவு 21-இன் கீழ் வழங்கப்பட்ட வாழ்வு மற்றும் தனிநபர் சுதந்திரத்திற்கான உரிமையின் ஒரு பகுதியாகும் என்று நீதிமன்றம் தெரிவித்துள்ளது. மேலும், நடைபாதையில் நடக்கும் பாதசாரிகளின் உரிமைக்கு மோட்டார் வாகன இயக்கத்தை விட முன்னுரிமை வழங்கப்பட வேண்டும் என்று தீர்ப்பளிக்கப்பட்டுள்ளது. இந்த உரிமையை நடைமுறைப்படுத்த ஒழுங்குமுறை அமைப்பு ஒன்றை உருவாக்க நீதிமன்றம் ஆதரவு தெரிவித்ததுடன், தீர்ப்பின் நகலை வீட்டுவசதி மற்றும் நகர்ப்புற விவகாரங்கள் அமைச்சகம், ஊரக வளர்ச்சி அமைச்சகம், மற்றும் சாலைப் போக்குவரத்து மற்றும் நெடுஞ்சாலைகள் அமைச்சகம் ஆகியவற்றிற்கு அனுப்ப உத்தரவிட்டது. மேலும், நகர்ப்புற வளர்ச்சி அமைப்புகள், மாநகராட்சிகள், நகராட்சிகள் மற்றும் பஞ்சாயத்துகள் நடைபாதைகள் மற்றும் பாதசாரி உள்கட்டமைப்புகளை வரையறுத்து, அமைத்து, பராமரித்து, பாதுகாக்க வேண்டிய பொறுப்பு உடையவை என நீதிமன்றம் தெரிவித்துள்ளது.

சர்வதேசச் செய்திகள்

ஆர்பிஎல் வங்கியில் எமிரேட்ஸ் என்பிடி வங்கியின் பங்கு

இந்தியாவின் தனியார் துறை வங்கியான ஆர்பிஎல் வங்கியில் துபாயைச் சேர்ந்த எமிரேட்ஸ் என்பிடி வங்கிக்கு 60 சதவீத பங்குகளை ஒதுக்க வங்கியின் இயக்குநர்கள் குழு ஒப்புதல் அளித்துள்ளது. இதன்படி, தலா ₹280 மதிப்பில் 92.91 கோடிக்கும் அதிகமான பங்குகள், மொத்தம் ₹26,015 கோடி மதிப்பில், எமிரேட்ஸ் என்பிடி வங்கிக்கு ஒதுக்கப்படுகின்றன. இந்த முதலீட்டின் மூலம் எமிரேட்ஸ் என்பிடி வங்கி ஆர்பிஎல் வங்கியின் முக்கிய பங்குதாரராக மாறியுள்ளது. இதனைத் தொடர்ந்து வங்கியின் இயக்குநர் குழு மறுசீரமைக்கப்பட்டது. இயக்குநர்களாக இருந்த கோபால் ஜெயின் மற்றும் வீணா மான்கர் பதவி விலகினர். எமிரேட்ஸ் என்பிடி வங்கியின் பரிந்துரையின் அடிப்படையில் ஐந்து புதிய நிர்வாகம் சாராத இயக்குநர்கள் நியமிக்கப்பட்டனர். இந்திய ரிசர்வ் வங்கி (RBI) 2026 ஏப்ரலில் எமிரேட்ஸ் என்பிடி வங்கி ஆர்பிஎல் வங்கியில் 74 சதவீதம் வரை பங்குகளை வாங்க ஒப்புதல் வழங்கியது. மத்திய நிதியமைச்சகம் 2026 மே மாதத்தில் இறுதி ஒப்புதல் அளித்தது. புதிய ஏற்பாட்டின்படி, எமிரேட்ஸ் என்பிடி வங்கி குறைந்தபட்சம் 51 சதவீத பங்குகளை தொடர்ந்து வைத்திருக்கும் நிலையில், ஆர்பிஎல் வங்கி இந்தியாவில் ஒரு வெளிநாட்டு வங்கியின் துணை நிறுவனமாக செயல்படும்.

அமெரிக்கா–ஈரான் அமைதி ஒப்பந்தம்

அமெரிக்கா மற்றும் ஈரான் இடையே 111 நாட்கள் நீடித்த பதற்றம் மற்றும் மோதலுக்கு பிறகு அமைதி ஒப்பந்தம் கையெழுத்தானது. இந்த ஒப்பந்தத்தில் அமெரிக்க அதிபர் டொனால்ட் ட்ரம்ப் மற்றும் ஈரான் அதிபர் மசூத் பெசெஷ்கியன் மின்னணு முறையில் கையெழுத்திட்டனர். மோதல் பிப்ரவரி 28 முதல் நீடித்த நிலையில், ஏப்ரல் 8 அன்று தற்காலிக போர் நிறுத்தம் அமல்படுத்தப்பட்டது. ஜெனீவா, சுவிட்சர்லாந்தில் ஜூன் 19 அன்று ஒப்பந்தம் கையெழுத்தாகும் என அறிவிக்கப்பட்டிருந்த நிலையில், அதற்கு முன்பாகவே ஒப்பந்தம் கையெழுத்தானது. பாகிஸ்தான் மற்றும் கத்தார் நாடுகள் சமரச முயற்சிகளில் ஈடுபட்டன. பாகிஸ்தான் பிரதமர் ஷேபாஸ் ஷெரிப் சமரச தூதராக ஒப்பந்தத்தில் கையெழுத்திட்டார். ஒப்பந்தத்தின் 14 அம்சத் திட்டத்தில் உடனடி போர் நிறுத்தம், பரஸ்பர இறையாண்மையை மதித்தல், தொடர்ந்து பேச்சுவார்த்தை நடத்துதல், ஹார்முஸ் ஜலசந்தியில் கப்பல் போக்குவரத்தை மீண்டும் தொடங்குதல், பொருளாதார தடைகளை நீக்குதல், வெளிநாடுகளில் முடக்கப்பட்ட ஈரானின் சொத்துகளை விடுவித்தல் மற்றும் கண்காணிப்பு குழுக்களை அமைத்தல் ஆகியவை இடம்பெற்றுள்ளன. மேலும், ஈரான் அணு ஆயுதங்களை தயாரிக்கக் கூடாது என்றும், இறுதி அமைதி ஒப்பந்தம் ஐக்கிய நாடுகள் பாதுகாப்பு கவுன்சிலின் ஒப்புதலுடன் கையெழுத்தாகும் என்றும் குறிப்பிடப்பட்டுள்ளது. ஈரானின் மறுசீரமைப்பிற்காக 300 பில்லியன் அமெரிக்க டாலர் நிதியம் உருவாக்கப்படும் எனவும் தெரிவிக்கப்பட்டுள்ளது.

சுவிஸ் வங்கிகளில் இந்தியர்களின் முதலீடு குறைவு

இந்தியா மற்றும் சுவிட்சர்லாந்து இடையே 2018-ஆம் ஆண்டு முக்கிய ஒப்பந்தம் கையெழுத்தானது. இந்த ஒப்பந்தத்தின்படி, சுவிஸ் வங்கிகளில் கணக்கு வைத்துள்ள இந்தியர்களின் நிதி விவரங்கள் ஆண்டுதோறும் மத்திய அரசுக்கு வழங்கப்படுகின்றன. 2025-ஆம் ஆண்டுக்கான நிதி விவரங்கள் மத்திய அரசிடம் சமர்ப்பிக்கப்பட்டுள்ளன. அதன்படி, சுவிஸ் வங்கிகளில் இந்தியர்கள் முதலீடு செய்த தொகை 8 சதவீதத்திற்கும் அதிகமாக குறைந்துள்ளது. தற்போது இந்தியர்களின் மொத்த வைப்பு தொகை ₹36,793 கோடி ஆக உள்ளது. சுவிஸ் வங்கிகளில் அதிக முதலீடு செய்த நாடுகளின் பட்டியலில் பிரிட்டன் முதலிடத்திலும், அமெரிக்கா இரண்டாம் இடத்திலும், பிரான்ஸ் மூன்றாம் இடத்திலும் உள்ளன. மேற்கிந்தியத் தீவுகள், ஜெர்மனி, ஹாங்காங், நெதர்லாந்து, ஐக்கிய அரபு அமீரகம் மற்றும் சிங்கப்பூர் ஆகிய நாடுகள் அடுத்தடுத்த இடங்களில் உள்ளன. இந்த பட்டியலில் இந்தியா 46-வது இடத்தில் உள்ளது.

ஆசியாவில் காலநிலை மாற்றம் மற்றும் கடல் மட்ட உயர்வு

உலக வானிலை அமைப்பு (WMO) வெளியிட்டுள்ள “ஆசியாவின் காலநிலை நிலைமை 2025” அறிக்கையின்படி, 1999-ஆம் ஆண்டு செயற்கைக்கோள் பதிவுகள் தொடங்கியதிலிருந்து ஆசியாவில் கடல் மட்டம் மிக உயர்ந்த அளவை எட்டியுள்ளது. 1999–2025 காலகட்டத்தில் வட இந்தியப் பெருங்கடல் கடற்கரையோர பகுதிகளில் கடல் மட்ட உயர்வு உலக சராசரியான ஆண்டுக்கு 3.6 மிமீ அளவை விட அதிகமாக இருந்து, இந்தியக் கடற்கரையில் ஆண்டுக்கு 4.9 மிமீ ஆக பதிவாகியுள்ளது. வட பசிபிக் பெருங்கடலில் உள்ள குரோஷியோ நீரோட்டப் பகுதியில் ஆண்டுக்கு 6 மிமீக்கும் அதிகமாக கடல் மட்டம் உயர்ந்துள்ளது. வெப்பநிலை உயர்வால் கண்காணிக்கப்பட்ட 23 பனிப்பாறைகளிலும் அதிகளவு பனி இழப்பு ஏற்பட்டுள்ளது. 1991–2025 காலத்தில் ஆசியாவின் வெப்பமயமாதல், 1961–1990 காலத்தை விட இரு மடங்கு அதிகமாக இருந்தது. 2025-ஆம் ஆண்டில் ஆசியாவின் சராசரி வெப்பநிலை 1991–2020 சராசரியை விட 0.96°C ± 0.08 அதிகமாக இருந்தது. 2025-ல் பனிப்பாறை ஏரிகள் உடைதல் மற்றும் பனிப்பாறை சரிவு காரணமாக வெள்ளப்பெருக்குகள் பதிவாகின. பாகிஸ்தானில் பருவமழை வெள்ளத்தால் 1,000-க்கும் மேற்பட்டோர் உயிரிழந்ததுடன், 30 லட்சத்திற்கும் அதிகமானோர் பாதிக்கப்பட்டனர். டிட்வா புயல் காரணமாக இலங்கையில் 24 மணி நேரத்தில் ஆண்டு மழையின் சுமார் 10 சதவீதம் பதிவாகி, 640-க்கும் மேற்பட்டோர் உயிரிழந்தனர். பேரிடர் பாதிப்புகளை குறைப்பதில் தாக்கத்தை அடிப்படையாகக் கொண்ட முன்னறிவிப்பு மற்றும் முன்கூட்டிய எச்சரிக்கை அமைப்புகளின் முக்கியத்துவத்தை இந்த அறிக்கை வலியுறுத்துகிறது.

தமிழ்நாடு செய்திகள்

தமிழ்நாடு முதலீட்டாளர் ஊக்குவிப்பு ஆணையம்

பன்னாட்டு நிறுவனங்களின் முதலீடுகளை ஈர்க்கும் நோக்கில் தமிழ்நாடு முதலீட்டாளர் ஊக்குவிப்பு ஆணையம் அமைக்கப்படும் என அறிவிக்கப்பட்டுள்ளது. இந்த ஆணையம் தலைமைச் செயலர் தலைமையில் செயல்படும். 2036-ஆம் ஆண்டுக்குள் தமிழ்நாட்டை 1.5 டிரில்லியன் டாலர் பொருளாதாரம் கொண்ட மாநிலமாக மாற்றுவது இலக்காக நிர்ணயிக்கப்பட்டுள்ளது. மாநிலத்தின் பொருளாதார நிலைத்தன்மை மற்றும் தொழில்துறை வளர்ச்சியை ஊக்குவிக்க புதிய தொழிற்கொள்கை உருவாக்கப்படும். குறு, சிறு மற்றும் நடுத்தரத் தொழில்களுக்கு (MSME) தேவையான அனுமதிகள் ஒற்றைச் சாளர முறையில் வழங்கப்படும். இந்த ஒற்றைச் சாளர முறை அனைத்து துறைகளுக்கும் பொருந்தும் வகையில் டிஜிட்டல் தளமாக மேம்படுத்தப்படும். உள்நாட்டு மற்றும் பன்னாட்டு நிறுவனங்களுக்கான சிறப்பு ஊக்கத்தொகை திட்டங்கள் செயல்படுத்தப்படும். ₹200 கோடிக்கும் அதிகமாக முதலீடு செய்யும் நிறுவனங்கள் அல்லது 5,000 பேருக்கு மேல் வேலைவாய்ப்பு வழங்கும் நிறுவனங்கள் விரைந்து தொழில் தொடங்க அனுமதி பெற நடவடிக்கை எடுக்கப்படும். அரசுத் துறைகளின் செயல்திறனை மேம்படுத்தவும் மின் ஆளுமை சேவைகளை வழங்கவும் செயற்கை நுண்ணறிவு (AI) கருவிகள் பயன்படுத்தப்படும். தமிழ்நாட்டின் 69 சதவீத இடஒதுக்கீட்டுக் கொள்கையை பாதுகாக்கும் முயற்சிகளும் தொடரும்.

பொருளாதாரச் செய்திகள்

எச்டிஎஃப்சி வங்கி இடைக்காலத் தலைவர் பதவிக்கால நீட்டிப்பு

இந்திய ரிசர்வ் வங்கி (RBI), எச்டிஎஃப்சி வங்கியின் இடைக்கால பகுதிநேரத் தலைவரான கேகி மிஸ்திரியின் பதவிக்காலத்தை மேலும் மூன்று மாதங்களுக்கு நீட்டிக்க ஒப்புதல் அளித்துள்ளது. இதன்படி அவர் 18 செப்டம்பர் 2026 வரை அல்லது நிரந்தர பகுதிநேரத் தலைவர் நியமிக்கப்படும் வரை பதவியில் தொடருவார். இந்த ஒப்புதல் 18 ஜூன் 2026 அன்று வழங்கப்பட்டது. நாட்டின் மிகப்பெரிய தனியார் துறை வங்கியான எச்டிஎஃப்சி வங்கி, மார்ச் 2026-இல் பகுதிநேரத் தலைவர் மற்றும் சுயாதீன இயக்குநர் பதவிகளில் இருந்து விலகிய அதனு சக்ரவர்த்தியின் ராஜினாமாவுக்கு பிறகு நிரந்தரத் தலைவரைத் தேடி வருகிறது. அவரது விலகலைத் தொடர்ந்து, 19 மார்ச் 2026 முதல் கேகி மிஸ்திரி மூன்று மாதங்களுக்கு இடைக்கால பகுதிநேரத் தலைவராக நியமிக்கப்பட்டார். தற்போதைய ஆர்பிஐ ஒப்புதலின் மூலம் அவரது பதவிக்காலம் மேலும் மூன்று மாதங்களுக்கு நீட்டிக்கப்பட்டுள்ளது.

பாட்டா இந்தியாவின் புதிய எம்டி மற்றும் சிஇஓ

பாட்டா இந்தியா நிறுவனத்தின் புதிய மேலாண்மை இயக்குநர் (MD) மற்றும் தலைமைச் செயல் அதிகாரியாக (CEO) சஞ்சய் ராவ் நியமிக்கப்பட்டுள்ளார். அவர், ஐந்து ஆண்டுகள் பதவியில் இருந்த குணஜன் ஷாவுக்கு அடுத்ததாக பொறுப்பேற்கிறார். சஞ்சய் ராவ் இதற்கு முன்பு நைக்கி நிறுவனத்தில் மூத்த இயக்குநர் (Senior Director, Nike Retail) ஆக பணியாற்றி பிரான்ஸ் மற்றும் பெனிலக்ஸ் சந்தைகளை மேற்பார்வையிட்டார். நிறுவனத்தின் ஒழுங்குமுறை அறிக்கையின்படி, அவர் இந்தியா, தெற்காசியா, சீனா மற்றும் ஐரோப்பா பகுதிகளில் சில்லறை விற்பனை மற்றும் நுகர்வோர் துறையில் 20 ஆண்டுகளுக்கும் மேலான அனுபவம் கொண்டவர். நைக்கிக்கு முன்பு இண்டிடெக்ஸ் நிறுவனத்தில் பணியாற்றிய அவர், டாடா குழுமத்துடன் இணைந்து சாரா (Zara) நிறுவனத்தின் இந்திய வணிகத்தை நிறுவுவதில் முக்கிய பங்காற்றினார். மேலும், பிரான்சில் கெஸ் (Guess) நிறுவனத்தின் நாட்டு இயக்குநராக பணியாற்றியுள்ளார். அவர் INSEAD நிறுவனத்தில் எம்பிஏ (MBA) பட்டம் பெற்றவர். அவரது நியமன அறிவிப்பைத் தொடர்ந்து பாட்டா இந்தியா பங்குகள் 17% உயர்ந்தது.

கூட்டுறவு வங்கியின் உரிமம் ரத்து

இந்திய ரிசர்வ் வங்கி (RBI), கர்நாடகாவைச் சேர்ந்த ஸ்ரீ மஹாலக்ஷ்மி அர்பன் கூட்டுறவு கடன் வங்கியின் உரிமத்தை அதன் மோசமடைந்த நிதி நிலை காரணமாக ரத்து செய்துள்ளது. மேலும், வங்கியை கலைப்பதற்கான நடவடிக்கைகளை மேற்கொண்டு கலைப்பாளர் (Liquidator) ஒருவரை நியமிக்குமாறு கர்நாடக கூட்டுறவு சங்கங்களின் பதிவாளரிடம் ரிசர்வ் வங்கி கோரிக்கை விடுத்துள்ளது.

மாநிலச் செய்திகள்

அசாமில் ஜப்பானிய மூளைக்காய்ச்சல் உயிரிழப்புகள்

அசாம் மாநிலத்தில் 2026 ஆம் ஆண்டின் தொடக்கம் முதல் ஜூன் 17 வரை, ஜப்பானிய மூளைக்காய்ச்சல் (JE) காரணமாக 7 பேர் மற்றும் கடுமையான மூளைக்காய்ச்சல் நோய்க்குறி (AES) காரணமாக 32 பேர் உயிரிழந்துள்ளதாக தேசிய நல்வாழ்வுக் குழுமம் (NHM), அசாம் தெரிவித்துள்ளது. தேசிய தரவுகளின்படி, 2018 முதல் இந்தியாவில் பதிவான ஜப்பானிய மூளைக்காய்ச்சல் உயிரிழப்புகளில் சுமார் 62% அசாமில் நிகழ்ந்துள்ளன. இந்த நோய்ப்பரவல் பொதுவாக மே முதல் அக்டோபர் வரை காணப்படுவதுடன், ஜூலை மற்றும் ஆகஸ்ட் மாதங்களில் உச்சத்தை எட்டுகிறது. அபிஜித் சர்மா, அசாம் NHM செயல் இயக்குநர், ஜப்பானிய மூளைக்காய்ச்சல் (JE) என்பது கடுமையான மூளைக்காய்ச்சல் நோய்க்குறி (AES) ஏற்படுவதற்கான காரணங்களில் ஒன்றாகும் என்று தெரிவித்துள்ளார்.