TNPSC தேர்வுக்கான முக்கிய தினசரி நடப்பு நிகழ்வுகள் – 16-06-2026

தமிழ்நாடு செய்திகள்

முதல்வரின் காலை உணவுத் திட்ட விரிவாக்கம்

தமிழ்நாடு அரசின் முதல்வரின் காலை உணவுத் திட்டம் 6 முதல் 8-ஆம் வகுப்பு வரை பயிலும் மாணவர்களுக்கும் விரிவுபடுத்தப்படுவதாக முதல்வர் ஜோசப் விஜய் 15 ஜூன் 2026 அன்று அறிவித்தார். இத்திட்டத்தின் முதல் கட்டம் பெரியார் ஈ.வே.ராமசாமியின் பிறந்த நாளான 17 செப்டம்பர் 2026 அன்று தொடங்கப்படும். இந்த அறிவிப்பு சென்னை தலைமைச் செயலகத்தில் நடைபெற்ற சமூக நலன் மற்றும் மகளிர் உரிமைத் துறையின் ஆய்வுக் கூட்டத்தில் வெளியிடப்பட்டது. கூட்டத்தில் சமூக நலன் மற்றும் மகளிர் உரிமைத் துறை அமைச்சர் சு. ஜெகதீஸ்வரி, தலைமைச் செயலர் மு. சாய்குமார், நிதித்துறை கூடுதல் தலைமைச் செயலர் எம்.ஏ. சித்திக், மற்றும் சமூக நலன் மற்றும் மகளிர் உரிமைத் துறைச் செயலர் ம. பல்லவி பல்தேவ் ஆகியோர் பங்கேற்றனர். இந்த காலை உணவுத் திட்டம் முதன்முதலில் 15 செப்டம்பர் 2022 அன்று அப்போதைய முதல்வர் மு.க. ஸ்டாலின் அவர்களால் 1 முதல் 5-ஆம் வகுப்பு மாணவர்களுக்காக தொடங்கப்பட்டதுடன், பின்னர் அரசு உதவிபெறும் பள்ளிகளுக்கும் விரிவுபடுத்தப்பட்டது.

சர்வதேசச் செய்திகள்

இந்தியா–ஸ்லோவாக்கியா ஒப்பந்தங்கள் மற்றும் பிரதமர் மோடியின் பயணம்

பிரதமர் நரேந்திர மோடி, ஜூன் 2026-இல் ஸ்லோவாக்கியா நாட்டிற்கு பயணம் மேற்கொண்டு, 1993-ஆம் ஆண்டு ஸ்லோவாக்கியா சுதந்திரம் பெற்ற பிறகு அந்நாட்டுக்குச் சென்ற முதல் இந்திய பிரதமர் என்ற பெருமையைப் பெற்றார். பிராட்டிஸ்லாவா நகரில், பிரதமர் மோடி மற்றும் ஸ்லோவாக்கியா பிரதமர் ராபர்ட் ஃபிகோ முன்னிலையில் இந்தியா–ஸ்லோவாக்கியா இடையே 11 முக்கிய ஒப்பந்தங்கள் கையொப்பமானது. இவ்வொப்பந்தங்கள் குடிபெயர்வு, எண்மத் தொழில்நுட்பம், பாதுகாப்பு மற்றும் உயர்கல்வி துறைகளைச் சேர்ந்தவை. இரு நாடுகளும் எரிசக்தி துறையில் ஒத்துழைப்பை விரிவுபடுத்தவும், தொழிலாளர்களின் நலனைப் பாதுகாக்க சமூகப் பாதுகாப்பு ஒப்பந்தத்தை இறுதி செய்யவும், இந்தியா–ஐரோப்பிய யூனியன் தடையில்லா வர்த்தக ஒப்பந்தத்தை (FTA) விரைவாக செயல்படுத்தவும் ஒப்புக்கொண்டன. இருநாடுகளின் கூட்டறிக்கையில் ஐ.நா. பாதுகாப்பு கவுன்சில் (UNSC) சீர்திருத்தம் மற்றும் பயங்கரவாதத்திற்கு எதிரான கூட்டுக் குழு அமைத்தல் வலியுறுத்தப்பட்டது. இந்தப் பயணத்தின் போது ஸ்லோவாக்கியாவின் மிக உயரிய தேசிய விருதான ‘ஆர்டர் ஆஃப் தி ஒயிட் டபிள் கிராஸ் (ஃபர்ஸ்ட் கிளாஸ்)’ விருது, ஸ்லோவாக்கிய அதிபர் பீட்டர் பெல்லக்ரினி அவர்களால் பிரதமர் மோடிக்கு வழங்கப்பட்டது. இது பிரதமர் மோடிக்கு வழங்கப்பட்ட 33-ஆவது சர்வதேச விருது ஆகும். மேலும், இந்தப் பயணம் 2014 முதல் பிரதமர் மோடி மேற்கொண்ட 100-ஆவது அரசு முறை வெளிநாட்டு பயணம் என்பதும், அவரது முதல் வெளிநாட்டு பயணம் 2014-இல் பூடான் நாட்டிற்கானது என்பதும் குறிப்பிடத்தக்கது.

போர் நிறுத்தம் மற்றும் ஹோர்முஸ் நீரிணை மீண்டும் திறப்பு

அமெரிக்கா மற்றும் ஈரான், தங்களுக்கு இடையேயான போரை முடிவுக்குக் கொண்டு வந்து ஹோர்முஸ் நீரிணையை (Strait of Hormuz) மீண்டும் திறக்க உடன்பாடு எட்டியுள்ளன. இந்த கட்டமைப்பு ஒப்பந்தத்தை அமெரிக்க அதிபர் டொனால்ட் டிரம்ப் அறிவித்தார். பேச்சுவார்த்தைகளில் பாகிஸ்தான் பிரதமர் ஷெஹ்பாஸ் ஷெரீப் மத்தியஸ்தராக செயல்பட்டார். இந்த புரிந்துணர்வு ஒப்பந்தம் (MoU) சுவிட்சர்லாந்தில் வெள்ளிக்கிழமை அதிகாரப்பூர்வமாக கையெழுத்தாக உள்ளது. இந்த ஒப்பந்தம் லெபனான் உட்பட அனைத்து முனைகளிலும் இராணுவ நடவடிக்கைகளை உடனடியாகவும் நிரந்தரமாகவும் நிறுத்துவதை உள்ளடக்கியதாகும். இந்த மோதல் பிப்ரவரி 2026-இல் அமெரிக்கா மற்றும் இஸ்ரேல் இணைந்து ஈரான் மீது நடத்திய தாக்குதல்களுடன் தொடங்கியது. ஈரான் ஆதரவு பெற்ற ஹிஸ்புல்லா அமைப்புக்கும் இஸ்ரேலுக்கும் இடையிலான மோதலால் லெபனானில் சுமார் 1.2 மில்லியன் மக்கள் இடம்பெயர்ந்துள்ளனர். பல மாதங்களாக மூடப்பட்டிருந்த ஹோர்முஸ் நீரிணை மீண்டும் திறக்கப்படும் என்றும் அறிவிக்கப்பட்டுள்ளது. ஈரானின் அணுசக்தித் திட்டத்தின் எதிர்காலம் தொடர்பான பேச்சுவார்த்தைகள் அடுத்த கட்டத்தில் நடைபெற உள்ளன. இந்த அறிவிப்பைத் தொடர்ந்து பிரெண்ட் கச்சா எண்ணெய் விலை சுமார் 5 சதவீதம் குறைந்தது, மேலும் உலக பங்குச் சந்தைகள் உயர்வைக் கண்டன.

தேசியச் செய்திகள்

20 திரிணமூல் காங்கிரஸ் எம்.பி.க்கள் என்சிபிஜேவில் இணைவு

திரிணமூல் காங்கிரஸ் (TMC) கட்சியைச் சேர்ந்த 20 மக்களவை எம்.பி.க்கள் இணைந்ததைத் தொடர்ந்து, தேசியவாத குடிமக்கள் கட்சி (NCPJ) 15 ஜூன் 2026 அன்று மேற்கு வங்கத்தின் முக்கிய அரசியல் கட்சியாக உருவெடுத்தது. என்சிபிஜே, திரிபுரா முகவரியில் பதிவு செய்யப்பட்டுள்ள அங்கீகரிக்கப்படாத அரசியல் கட்சி ஆகும். இதன் அலுவலகம் மேற்கு வங்கத்தின் ஹௌரா மாவட்டம், சங்க்ரைல் பகுதியில் செயல்பட்டு வருகிறது. இந்தியத் தேர்தல் ஆணையத்தின் (ECI) தரவுகளின்படி, இக்கட்சி 2023 திரிபுரா சட்டப்பேரவைத் தேர்தலில் மூன்று தொகுதிகளில் மட்டுமே போட்டியிட்டது. கட்சியின் 2022–23 நிதியாண்டு தணிக்கை அறிக்கையில், ₹75 லட்சம் கையிருப்பும், ₹1.13 லட்சம் நன்கொடையும் பதிவு செய்யப்பட்டுள்ளது. மக்களவைத் தலைவர் ஓம் பிர்லா இந்த 20 எம்.பி.க்களின் இணைப்பை அங்கீகரித்தால், என்சிபிஜே மக்களவையில் ஆறாவது பெரிய கட்சியாகவும், பாஜக தலைமையிலான தேசிய ஜனநாயகக் கூட்டணியில் (NDA) பாஜகவுக்கு அடுத்த இரண்டாவது பெரிய கட்சியாகவும் மாறும். இதற்கிடையில், ஷெவ்லி குண்டு, என்சிபிஜே கட்சித் தலைவர் பதவியில் இருந்து விலகுவதாக அறிவித்தார்.

மே 2026-இல் இந்தியாவின் ஏற்றுமதி 18% உயர்வு

மே 2026 மாதத்தில் இந்தியாவின் ஏற்றுமதி 18 சதவீதம் உயர்ந்து, கடந்த ஆறு மாதங்களில் இல்லாத அளவாக 45.20 பில்லியன் அமெரிக்க டாலரை எட்டியது. அதே நேரத்தில், இறக்குமதி 10 சதவீதம் உயர்ந்து 73.41 பில்லியன் அமெரிக்க டாலராக பதிவானது. இதன் காரணமாக, நாட்டின் வர்த்தகப் பற்றாக்குறை 28.21 பில்லியன் அமெரிக்க டாலராக உயர்ந்தது. மின்னணுப் பொருள்கள், மருந்துப் பொருள்கள், பெட்ரோலியப் பொருள்கள் மற்றும் பொறியியல் சாதனங்கள் ஏற்றுமதி வளர்ச்சிக்கு முக்கிய காரணிகளாக இருந்தன. 2026–27 நிதியாண்டின் முதல் இரண்டு மாதங்களான ஏப்ரல்–மே காலகட்டத்தில், மொத்த ஏற்றுமதி 16.09 சதவீதம் உயர்ந்து 88.91 பில்லியன் அமெரிக்க டாலராகவும், இறக்குமதி 15.14 சதவீதம் உயர்ந்து 145.35 பில்லியன் அமெரிக்க டாலராகவும் இருந்தது. இதனால், மொத்த வர்த்தகப் பற்றாக்குறை 56.44 பில்லியன் அமெரிக்க டாலராக பதிவானது. இதே காலகட்டத்தில், தங்க இறக்குமதி 60 சதவீதம் உயர்ந்து 9.04 பில்லியன் அமெரிக்க டாலராகவும், கச்சா எண்ணெய் இறக்குமதி 16.5 சதவீதம் உயர்ந்து 41.30 பில்லியன் அமெரிக்க டாலராகவும் இருந்தது. முதல்கட்ட மதிப்பீடுகளின்படி, சேவைகள் துறையின் ஏற்றுமதி 36.76 பில்லியன் அமெரிக்க டாலராகவும், இறக்குமதி 19.06 பில்லியன் அமெரிக்க டாலராகவும் இருந்து, இந்தியா சேவைகள் துறையில் உபரி வர்த்தக நிலையை தொடர்ந்து தக்க வைத்துள்ளது.

சர்வம் ஏஐ நிறுவனத்தில் எச்சிஎல் டெக் முதலீடு

HCLTech நிறுவனம், Sarvam AI நிறுவனத்தில் 150 மில்லியன் அமெரிக்க டாலர் (₹1,427.25 கோடி) முதலீடு செய்து 10.46 சதவீத பங்குகளை பெறுவதாக அறிவித்துள்ளது. 300 மில்லியன் அமெரிக்க டாலர் Series B நிதி திரட்டலின் முதற்கட்டத்தில், சார்வம் ஏஐ நிறுவனம் 234 மில்லியன் அமெரிக்க டாலர் (₹2,218.61 கோடி) நிதியை 1.5 பில்லியன் அமெரிக்க டாலர் சந்தை மதிப்பில் திரட்டியுள்ளது. மீதமுள்ள முதலீட்டை Bessemer Venture Partners மேற்கொண்டதுடன், Khosla Ventures மற்றும் Peak XV Partners நிறுவனங்களும் தொடர்ந்து ஆதரவு வழங்கியுள்ளன. இந்த முதலீடு ஏஜென்டிக் ஏஐ, கோடிங் மற்றும் இணையப் பாதுகாப்பு பயன்பாடுகளுக்கான ஆராய்ச்சி மற்றும் மேம்பாட்டிற்கும், பெரிய அளவிலான கணினி கட்டமைப்பை விரிவுபடுத்துவதற்கும் பயன்படுத்தப்படும். சார்வம் நிறுவனம் இந்தியாவில் உருவாக்கப்பட்ட Sarvam 105B, Sarvam 30B மற்றும் Sarvam Vision ஆகிய அடிப்படை செயற்கை நுண்ணறிவு மாதிரிகளை வெளியிட்டுள்ளது. Sarvam Vision மூலம் 3.5 கோடிக்கும் அதிகமான பக்கங்கள் டிஜிட்டல் மயமாக்கப்பட்டுள்ளன. மேலும், நிறுவனத்தின் பேச்சு மாதிரிகள் ஒவ்வொரு மாதமும் 5 லட்சம் மணிநேரத்திற்கும் அதிகமான ஆடியோவை உரை வடிவமாக மாற்றுகின்றன.

2-புரோமோ-4-மெத்தில்புரோபியோஃபெனோன் கட்டுப்படுத்தப்பட்ட பொருளாக அறிவிப்பு

மத்திய நிதியமைச்சகம், 2-புரோமோ-4-மெத்தில்புரோபியோஃபெனோன் (2-Bromo-4-Methylpropiophenone) என்ற வேதிப்பொருளை போதை மருந்துகள் மற்றும் மனமயக்கப் பொருட்கள் (கட்டுப்படுத்தப்பட்ட பொருட்களின் ஒழுங்குமுறை) ஆணை, 2013 [Narcotic Drugs and Psychotropic Substances (Regulation of Controlled Substances) Order, 2013]-இன் கீழ் கட்டுப்படுத்தப்பட்ட பொருளாக அறிவித்துள்ளது. இந்த வேதிப்பொருள் மெஃபெட்ரான் (4-மெத்தில்மெத்காதினோன்) என்ற மனமயக்கப் பொருள் மற்றும் செயற்கை ஊக்கமருந்து தயாரிப்பில் அதிகமாகப் பயன்படுத்தப்படுவதால் இந்த நடவடிக்கை எடுக்கப்பட்டுள்ளது. இந்த வேதிப்பொருளின் தயாரிப்பு, விநியோகம், விற்பனை, கொள்முதல், வைத்திருத்தல், சேமிப்பு, நுகர்வு, இறக்குமதி, ஏற்றுமதி அல்லது இணையவழி வழங்கல் போன்ற செயல்பாடுகளில் ஈடுபடும் அனைத்து நபர்களும் நிறுவனங்களும் போதைப்பொருள் கட்டுப்பாட்டு வாரியம் (NCB) மூலம் பதிவு எண்ணைப் பெற வேண்டும். என்டிபிஎஸ் (ஆர்சிஎஸ்) ஆணை, 2013-இன் படி, நிறுவனங்கள் விண்ணப்பப் படிவம் ‘பி’ (Form B) மூலம் சம்பந்தப்பட்ட என்சிபி மண்டல அலுவலகத்தில் ஆகஸ்ட் 7-ஆம் தேதிக்குள் விண்ணப்பிக்க வேண்டும். பதிவு எண்கள் மார்ச் 11 முதல் 180 நாட்களுக்குள் வழங்கப்படும் என்று மத்திய நிதியமைச்சகத்தின் வருவாய்த் துறை தெரிவித்துள்ளது.

பாசுமதி ஜிஐ வழக்குகளுக்கான சட்ட நிறுவனம் நியமிப்பில் சர்ச்சை

அகில இந்திய அரிசி ஏற்றுமதியாளர்கள் சங்கம் (AIREA) மற்றும் பாசுமதி அரிசி ஆலை உரிமையாளர்கள் மற்றும் ஏற்றுமதியாளர்கள் சங்கம் (BRMEA) ஆகிய இரண்டு அமைப்புகள், பாசுமதி புவிசார் குறியீடு (GI) மற்றும் அறிவுசார் சொத்துரிமை (IPR) தொடர்பான உலகளாவிய வழக்குகளைக் கையாள சட்ட நிறுவனத்தை நியமித்த வேளாண் மற்றும் பதப்படுத்தப்பட்ட உணவுப் பொருட்கள் ஏற்றுமதி மேம்பாட்டு ஆணையத்தின் (APEDA) முடிவை மறுபரிசீலனை செய்யுமாறு மத்திய வர்த்தக அமைச்சகத்தை வலியுறுத்தியுள்ளன. இந்த அமைப்புகள் மத்திய வர்த்தக அமைச்சர் பியூஷ் கோயல் மற்றும் அபெடா தலைவர் அபிஷேக் தேவ் ஆகியோருக்கு கடிதம் எழுதி, பரஸ்பர நலன்களுக்கு முரணான நிலைப்பாடு (Conflict of Interest) குறித்து கவலை தெரிவித்துள்ளன. இந்த விவகாரம், மத்தியப் பிரதேசத்தின் சில பகுதிகளை பாசுமதி ஜிஐ பகுதிக்குள் சேர்க்க வேண்டும் என்ற கோரிக்கையுடன் தொடர்புடையது. அபெடா, பாசுமதி அரிசி இந்தோ-கங்கை சமவெளிப் பகுதியில் மட்டுமே உற்பத்தியாகிறது என்ற நிலைப்பாட்டை தொடர்ந்து கடைப்பிடித்து வருகிறது. மேலும், பாசுமதி ஏற்றுமதி மேம்பாட்டு அறக்கட்டளை (BEDF) விதிகளில் உள்ள விதி 19.1 மற்றும் விதி 19.2.21, அறக்கட்டளையின் நிர்வாகம் மற்றும் ஆலோசகர்களை நியமிக்கும் அதிகாரத்தை வாரியத்திற்கு வழங்குகின்றன என்று அமைப்புகள் குறிப்பிட்டுள்ளன. ஐரோப்பிய ஒன்றியத்தில் (EU) பாசுமதி ஜிஐ தொடர்பான இந்தியாவின் விண்ணப்பத்தை பாகிஸ்தான் எதிர்த்து வருவதும், அதேபோல் பாகிஸ்தானின் விண்ணப்பத்தை இந்தியா எதிர்த்து வருவதும் இந்த விவகாரத்தின் முக்கிய அம்சமாகும்.

ஐஐடி-கான்பூரில் தேசிய ராணுவ ட்ரோன் தொழில்நுட்ப மையம்

மத்திய பாதுகாப்பு அமைச்சகம் (MoD), ஐஐடி-கான்பூரில் ₹500 கோடி மதிப்பில் தேசிய ராணுவ ட்ரோன் தொழில்நுட்ப மையம் (National Military Drone Technology Hub) அமைப்பதற்கு கொள்கை அளவிலான ஒப்புதலை வழங்கியுள்ளது. இந்த மையம் ராணுவப் பேலோடுகள், தரவு இணைப்புகள், தரை கட்டுப்பாட்டு நிலையங்கள் மற்றும் எதிர்-ட்ரோன் அமைப்புகளை வடிவமைத்தல், சோதனை செய்தல் மற்றும் சான்றளித்தல் உள்ளிட்ட முழுமையான திறன் உள்கட்டமைப்பை வழங்கும். இந்தத் திட்ட முன்மொழிவை உத்தரப் பிரதேச பாதுகாப்புத் தொழில் வழித்தடத்தின் (UPDIC) நோடல் முகமையான உத்தரப் பிரதேச எக்ஸ்பிரஸ்வேஸ் தொழில் வளர்ச்சி ஆணையம் (UPEIDA) தயாரித்து மத்திய பாதுகாப்பு அமைச்சகத்திடம் சமர்ப்பித்துள்ளது.

ஜிஐ பெற்ற காலாடி பாலாடைக்கட்டிக்கு அறிவியல் மேம்பாடு

ஜம்மு-காஷ்மீரின் உதம்பூர் மற்றும் பீர் பாஞ்சால் பிராந்தியங்களின் பாரம்பரிய பாலாடைக்கட்டியான காலாடி (Kaladi), மைசூரில் உள்ள மத்திய உணவு தொழில்நுட்ப ஆராய்ச்சி நிறுவனம் (CFTRI) மூலம் தொழில்நுட்ப மேம்பாட்டிற்கு உட்படுத்தப்பட்டுள்ளது. புவிசார் குறியீடு (GI) பெற்ற இந்த பால் பொருள் பசு அல்லது எருமைப் பாலில் இருந்து தயாரிக்கப்படுகிறது மற்றும் குறுகிய பயன்பாட்டுக் காலம் கொண்டதாகும். மத்திய அறிவியல், தொழில்நுட்பம் மற்றும் புவி அறிவியல் துறை இணை அமைச்சர் (தனிப்பொறுப்பு) ஜிதேந்திர சிங் வெளியிட்ட தகவலின்படி, விஞ்ஞானிகள் காலாடியின் தரம், அமைப்பு மற்றும் ஊட்டச்சத்து மதிப்பில் மாற்றமின்றி அதன் பயன்பாட்டுக் காலத்தை 21 நாட்களாக நீட்டிப்பதில் வெற்றி பெற்றுள்ளனர். மேலும், இந்த பாரம்பரிய பாலாடைக்கட்டியை ஜம்மு-காஷ்மீருக்கு அப்பால் பெரிய அளவில் சந்தைப்படுத்துவதற்காக, தொழில்முறை உணவகச் சங்கிலிகளால் பயன்படுத்தக்கூடிய வணிக ரீதியான தயாரிப்பை உருவாக்கும் பணியில் ஆராய்ச்சியாளர்கள் ஈடுபட்டுள்ளனர்.

மாநிலச் செய்திகள்

கேரளத்தில் மகளிருக்கு இலவசப் பேருந்துப் பயணத் திட்டம்

காங்கிரஸ் தலைமையிலான ஐக்கிய ஜனநாயக முன்னணி (UDF) அரசு, 15 ஜூன் 2026 அன்று கேரளம் முழுவதும் மகளிருக்கு இலவசப் பேருந்துப் பயணத் திட்டத்தை அமல்படுத்தியது. ‘பிரியதர்ஷினி’ என்ற பெயரிலான இத்திட்டத்தை திருவனந்தபுரத்தில், முதல்வர் வி.டி. சதீசன் தொடங்கி வைத்தார். இந்தத் திட்டத்தின் கீழ் கேரள அரசுப் போக்குவரத்துக் கழகம் (KSRTC) இயக்கும் சாதாரண பேருந்துகளில் பெண்கள் மற்றும் மூன்றாம் பாலினத்தவருக்கு இலவசப் பயணம் வழங்கப்படுகிறது. இத்திட்டத்தின் மூலம், ஏற்கனவே இதேபோன்ற திட்டங்களை அமல்படுத்தியுள்ள கர்நாடகம் மற்றும் தெலங்கானா மாநிலங்களின் வரிசையில் கேரளமும் இணைந்துள்ளது. மேலும், தமிழ்நாடு மற்றும் ஆந்திரப் பிரதேசம் மாநிலங்களிலும் பெண்களுக்கான இலவசப் பேருந்துப் பயணத் திட்டம் ஏற்கனவே நடைமுறையில் உள்ளது. இந்தத் திட்டத்தை செயல்படுத்த கேரள அரசு ஆண்டுதோறும் ₹800 கோடியை கேரள அரசுப் போக்குவரத்துக் கழகத்திற்கு (KSRTC) வழங்கும் என்று அறிவிக்கப்பட்டுள்ளது.

பிரபலமானவர்கள், விருதுகள் மற்றும் நிகழ்வுகள்

கீர்த்தி சக்ரா விருது பெற்ற ராணுவ வீரருக்கு தமிழக அரசின் பாராட்டு

தேனி மாவட்டத்தைச் சேர்ந்த லான்ஸ் நாயக் அ. மீனாட்சி சுந்தரம், இந்திய ராணுவத்தின் பீரங்கிப் படைப் பிரிவில் பணியாற்றி வருகிறார். 19 டிசம்பர் 2024 அன்று ஜம்மு-காஷ்மீர் மாநிலம் குல்காம் பகுதியில் நடைபெற்ற பயங்கரவாத எதிர்ப்பு நடவடிக்கையின்போது கடுமையாக காயமடைந்த நிலையிலும் தனது பணியைத் தொடர்ந்து நிறைவேற்றி பயங்கரவாதிகளை வீழ்த்தியதற்காக அவருக்கு இந்தியாவின் இரண்டாவது உயரிய அமைதிக்கால வீர விருதான ‘கீர்த்தி சக்ரா’ வழங்கப்பட்டது. இந்த விருதை குடியரசுத் தலைவர் திரௌபதி முர்மு வழங்கினார். அவரது வீரத்தைப் பாராட்டி 15 ஜூன் 2026 அன்று தமிழக அரசு சார்பில் ₹48 லட்சம் நிதியுதவியை முதல்வர் ஜோசப் விஜய் சென்னை தலைமைச் செயலகத்தில் வழங்கினார். இந்நிகழ்வில் மனிதவள மேலாண்மை மற்றும் முன்னாள் படைவீரர் நலத்துறை அமைச்சர் சு. சரத்குமார், தலைமைச் செயலர் மு. சாய்குமார், பொதுத்துறை முதன்மைச் செயலர் ரீட்டா ஹரீஷ் தக்கர், மற்றும் முன்னாள் படைவீரர் நலத்துறை இயக்குநர் எ. சுந்தரவல்லி ஆகியோர் கலந்து கொண்டனர்.

அறிக்கைகள் மற்றும் குறியீடுகள்

தூய்மையான எரிசக்தி முதலீட்டுக்கான முன்னணி மாநிலங்கள்

எரிசக்தி பொருளாதாரம் மற்றும் நிதி பகுப்பாய்வு நிறுவனம் (IEEFA) வெளியிட்டுள்ள இந்திய மாநிலங்களின் மின்சார மாற்றம் (SET) 2026 ஆய்வின்படி, ஆந்திரப் பிரதேசம், உத்தரப் பிரதேசம் மற்றும் ராஜஸ்தான் ஆகியவை இந்தியாவில் தூய்மையான எரிசக்தி முதலீடுகளுக்கு மிகவும் முதலீட்டாளர்-நட்பு மாநிலங்களாக உருவெடுத்துள்ளன. இந்த ஆய்வு 21 மாநிலங்களை, கொள்கை முயற்சிகள், சந்தை ஊக்குவிப்பான்கள், உள்கட்டமைப்பு தயார்நிலை மற்றும் தேவை சார்ந்த காரணிகள் ஆகிய அடிப்படைகளில் மதிப்பீடு செய்துள்ளது. ராஜஸ்தான், நாட்டிலேயே மிகக் குறைந்த பசுமை கட்டண பிரீமியமான ஒரு கிலோவாட்-மணி நேரத்திற்கு ₹0.05 என்ற அளவை கொண்டுள்ளது. உத்தரப் பிரதேசம், 2027 நிதியாண்டிற்குள் 22 ஜிகாவாட் சூரிய மின்சார திறன் மற்றும் 2028-க்குள் 1 மில்லியன் டன் பசுமை ஹைட்ரஜன் உற்பத்தி என்ற இலக்குகளை நிர்ணயித்துள்ளது. மேலும், அதன் 2026 நிதியாண்டிற்கான பசுமை கட்டண பிரீமியம் ஒரு கிலோவாட்-மணி நேரத்திற்கு ₹0.34 ஆக உள்ளது. ஆந்திரப் பிரதேசம், செயல்பாட்டில் உள்ள அல்லது கட்டுமானத்தில் உள்ள 1.44 ஜிகாவாட் பம்ப் நீர்மின் சேமிப்புத் திட்டத்தைக் கொண்டுள்ளது. மேலும், புதுப்பிக்கத்தக்க எரிசக்தி கொள்முதலை எளிதாக்கும் வகையில் 2022 பசுமை எரிசக்தி திறந்த அணுகல் விதிகளை (Green Energy Open Access Rules, 2022) நடைமுறைப்படுத்தியுள்ளது.