TNPSC தேர்வுக்கான முக்கிய தினசரி நடப்பு நிகழ்வுகள் – 22-05-2026

தமிழ்நாடு செய்திகள்

59 ஆண்டுகளுக்கு பிறகு தமிழக அமைச்சரவையில் காங்கிரஸ்

தமிழ்நாடு அரசில் முதல்வர் விஜய் தலைமையிலான அமைச்சரவையில் 23 புதிய அமைச்சர்கள் பதவியேற்றனர். இதில் காங்கிரஸ் கட்சியைச் சேர்ந்த ராஜேஷ்குமார் அமைச்சராக இணைந்ததன் மூலம், 59 ஆண்டுகளுக்கு பிறகு காங்கிரஸ் கட்சி தமிழக அமைச்சரவையில் இடம்பெற்றது. இதற்கு முன்பு 1967ஆம் ஆண்டு, முதல்வர் எம். பக்தவத்சலம் தலைமையிலான அமைச்சரவையில் காங்கிரஸ் இடம்பெற்றிருந்தது. தமிழ்நாடு சட்டப்பேரவைத் தேர்தலில், விஜய் தலைமையிலான தமிழக வெற்றிக் கழகம் (TVK) 108 இடங்களில் வெற்றி பெற்று, காங்கிரஸ், சிபிஎம், விடுதலைச் சிறுத்தைகள் கட்சி (VCK), ஐயூஎம்எல் உள்ளிட்ட கட்சிகளின் ஆதரவுடன் ஆட்சியை அமைத்தது. அமைச்சரவை விரிவாக்கத்திற்குப் பிறகு துறை மாற்றங்களில், கே.இ. செங்கோட்டையன் வசமிருந்த வருவாய் துறை மாற்றப்பட்டு சட்டத்துறை வழங்கப்பட்டது; வருவாய் துறை நிர்மல்குமார்க்கு ஒதுக்கப்பட்டது; நிதித்துறை மரியாவுக்கு வழங்கப்பட்டது. முதல்வர் விஜய், மகளிர் நலத்துறையை சிறப்பு முயற்சித் துறையுடன் இணைத்ததுடன், வறுமை ஒழிப்பு துறையையும் முதல்வர் அலுவலகத்தின் கீழ் கொண்டு வந்தார். காங்கிரஸ் அமைச்சரவையில் இணைந்ததன் மூலம் தமிழகத்தில் கூட்டணி அரசு அமைந்தது.

சர்வதேசச் செய்திகள்

எபோலா பரவலால் இந்தியா–ஆப்பிரிக்கா உச்சிமாநாடு ஒத்திவைப்பு

இந்தியா மற்றும் ஆப்பிரிக்க ஒன்றியம் இணைந்து புதுதில்லியில் மே 28 முதல் நடத்த திட்டமிடப்பட்டிருந்த 4வது இந்தியா–ஆப்பிரிக்கா உச்சிமாநாடு காலவரையற்ற முறையில் ஒத்திவைக்கப்பட்டது. இதற்கு காரணமாக காங்கோ ஜனநாயகக் குடியரசில் பரவி வரும் ‘புண்டிபுக்யோ’ (Bundibugyo) வகை எபோலா வைரஸ் குறிப்பிடப்பட்டுள்ளது. இந்த தொற்றால் காங்கோவில் 130க்கும் மேற்பட்டோர் உயிரிழந்த நிலையில், உலக சுகாதார நிறுவனம் (WHO) இதை சர்வதேச சுகாதார அவசரநிலை என அறிவித்தது. ஆப்பிரிக்க ஒன்றியத் தலைவர்களுடன் ஆலோசித்த பிறகு இந்திய அரசு உச்சிமாநாட்டை ஒத்திவைக்கும் முடிவை எடுத்தது. இந்தியாவில் இதுவரை எபோலா பாதிப்பு பதிவாகாத நிலையிலும், முன்னெச்சரிக்கை நடவடிக்கையாக அனைத்து மாநிலங்களும் விமானநிலைய கண்காணிப்பு, பரிசோதனை மற்றும் தனிமைப்படுத்தல் நடைமுறைகளை தீவிரப்படுத்துமாறு மத்திய அரசு அறிவுறுத்தியுள்ளது.

5 நாடுகள் பயணத்தில் பிரதமர் மோடியின் பாரம்பரிய பரிசுகள்

பிரதமர் நரேந்திர மோடி, தனது ஐந்து நாடுகள் பயணத்தின் போது ஐக்கிய அரபு அமீரகம், நெதர்லாந்து, ஸ்வீடன், நார்வே, இத்தாலி நாடுகளின் தலைவர்களுக்கு இந்திய பாரம்பரியம், வேளாண்மை மற்றும் கைவினைப் பொருட்களை பிரதிபலிக்கும் பரிசுகளை வழங்கினார். இத்தாலி பிரதமர் ஜியோர்ஜியா மெலோனிக்கு முகா சில்க் மற்றும் எரி சில்க் சால்வைகள் வழங்கப்பட்டன; இதில் அசாம் மாநிலத்தின் பிரம்மபுத்திரா பள்ளத்தாக்கின் “தங்கப் பட்டு” என அழைக்கப்படும் முகா சில்க் குறிப்பிடத்தக்கது. இத்தாலி அதிபர் செர்ஜியோ மட்டரெல்லாவுக்கு பாரம்பரிய கலைப்பொருட்கள் மற்றும் பண்டிட் பீம்சேன் ஜோஷி, எம்.எஸ். சுப்புலட்சுமி இசைத் தொகுப்புகள் வழங்கப்பட்டன. ஐநா உணவு மற்றும் வேளாண்மை அமைப்பு (FAO) இயக்குநர்-பொது க்யூ டோங்யூவுக்கு கேரளாவின் பாலக்காடு சிவப்பு அரிசி, மேற்கு வங்கத்தின் கோபிந்தபோக் அரிசி, பாஸ்மதி அரிசி, அசாமின் ஜோஹா அரிசி, உத்தரப் பிரதேசத்தின் கலாநமக் அரிசி மற்றும் சிறுதானிய உணவுப் பொருட்கள் வழங்கப்பட்டன. ஐக்கிய அரபு அமீரக அதிபர் முகமது பின் சயீத் அல் நஹ்யான்க்கு குஜராத் “Tree of Life” ஓவியம், GI குறியீடு பெற்ற கேசர் மாம்பழங்கள், மேகாலயா அன்னாசிப்பழங்கள் வழங்கப்பட்டன. ஸ்வீடன் பிரதமர் உல்ஃப் கிரிஸ்டர்சன்க்கு சாந்திநிகேதன் பை, ரவீந்திரநாத் தாகூர் நூல்கள், மணிப்பூரின் லோக்டாக் தேநீர், மற்றும் சாங்தாங்கி ஆடுகளிலிருந்து பெறப்படும் லடாக் பஷ்மினா சால்வை வழங்கப்பட்டது. நார்வே இளவரசர் ஹாக்கோன்க்கு ஆந்திரப் பிரதேச கலம்காரி ஓவியம், ராணி சோன்யாவுக்கு ஒடிசா பட்டச்சித்ரா ஓவியம் வழங்கப்பட்டது. நெதர்லாந்து பிரதமர் மார்க் ருட்டேக்கு மதுபானி ஓவியம், மன்னர் வில்லம்-அலெக்சாண்டர்க்கு GI குறியீடு பெற்ற ஜெய்ப்பூர் ப்ளூ பாட்டரி, மற்றும் ராணி மாக்சிமாவுக்கு ராஜஸ்தானின் மீனாகாரி மற்றும் குந்தன் கலை நகைகள் வழங்கப்பட்டன.

விளையாட்டுச் செய்திகள்

இந்தியன் சூப்பர் லீக் சாம்பியன் பட்டம் வென்ற ஈஸ்ட் பெங்கால்

ஈஸ்ட் பெங்கால் எஃப்சி நடப்பு சீசன் இந்தியன் சூப்பர் லீக் (ISL) கால்பந்து தொடரில் சாம்பியன் பட்டம் வென்றது. இந்த சீசன் புதிய வடிவத்தில் நடத்தப்பட்டு, வழக்கமான பிளே-ஆஃப் சுற்றுக்கு பதிலாக புள்ளிப் பட்டியலில் முதலிடம் பெறும் அணி சாம்பியனாக அறிவிக்கப்படும் முறை பின்பற்றப்பட்டது. 13 சுற்றுகள் முடிவில் ஈஸ்ட் பெங்கால் 26 புள்ளிகளுடன் முதலிடம் பெற்று சாம்பியன் ஆனது. இதன் மூலம் அந்த அணி 22 ஆண்டுகளுக்குப் பிறகு உயர்மட்ட போட்டியில் முக்கிய கோப்பையை கைப்பற்றியது. மோகன் பகான் அணியும் 26 புள்ளிகள் பெற்றிருந்தாலும், கோல் வித்தியாசத்தின் அடிப்படையில் இரண்டாம் இடம் பெற்றது. மும்பை சிட்டி 25 புள்ளிகளுடன் மூன்றாம் இடம் பிடித்தது; தொடர்ந்து பெங்களூரு (23), பஞ்சாப் (22) மற்றும் ஜாம்ஷெட்பூர் (22) அணிகள் இடம்பிடித்தன.

முதல் முறையாக யூரோபா லீக் பட்டம் வென்ற ஆஸ்டன் வில்லா

ஆஸ்டன் வில்லா அணி, துருக்கியின் இஸ்தான்புலில் நடைபெற்ற யூரோபா லீக் கால்பந்து இறுதிப்போட்டியில் ஃப்ரெய்பர்க் அணியை 3-0 என்ற கோல் கணக்கில் வீழ்த்தி முதல் முறையாக சாம்பியன் பட்டம் வென்றது. ஆஸ்டன் வில்லா அணிக்காக யூரி டீலெமன்ஸ், எமி புவென்டியா, மோர்கன் ரோஜர்ஸ் ஆகியோர் கோல்கள் அடித்தனர். இதன் மூலம் அந்த அணி 30 ஆண்டுகளுக்குப் பிறகு முக்கிய கோப்பையை கைப்பற்றியது; இதற்கு முன்பு அணி 1996ஆம் ஆண்டு ஆங்கில லீக் கோப்பை வென்றிருந்தது. மேலும், ஆஸ்டன் வில்லா அணி 1982ஆம் ஆண்டு ஐரோப்பியக் கோப்பை மற்றும் சூப்பர் கோப்பை வென்றிருந்தது. இந்த வெற்றி, ஸ்பெயின் பயிற்சியாளர் உனாய் எமெரிக்கு கிடைத்த 5வது முக்கிய சாம்பியன் பட்டமாகும். அவர் பயிற்சியளித்த செவில்லா அணி 2014–2016 காலத்தில் மூன்று முறை பட்டம் வென்றதுடன், வில்லார்ரியல் அணி 2021ஆம் ஆண்டு சாம்பியன் பட்டம் வென்றது.

தேசியச் செய்திகள்

ஒரே நாளில் எவரெஸ்ட் ஏறியவர்களின் புதிய உலக சாதனை

நேபாளத்தில், உலகின் உயரமான சிகரமான எவரெஸ்ட் மலையை, 3 இந்தியர்கள் உட்பட 274 மலையேற்ற வீரர்கள் ஒரே நாளில் வெற்றிகரமாக ஏறி புதிய உலக சாதனை படைத்தனர். இதற்கு முன், மே 2019இல் 223 பேர் ஒரே நாளில் எவரெஸ்ட் சிகரத்தை அடைந்ததே சாதனையாக இருந்தது. நடப்பு மலையேற்ற பருவத்திற்காக நேபாள அரசு 502 மலையேற்ற வீரர்களுக்கு அனுமதி வழங்கியது. புதிய சாதனை படைத்த குழுவில் 150 நேபாள ஷெர்பாக்கள் இடம்பெற்றனர். இந்தியர்களில் தெலங்கானாவைச் சேர்ந்த துலசி ரெட்டி பல்புனூரி, சந்தீப் ஆரே, அஜய் பால் சிங் தாலிவால் ஆகியோர் சிகரத்தை அடைந்தனர். அடுத்த நாள், இந்தியாவின் லட்சுமிகாந்தா மண்டல் உட்பட மேலும் 8 பேர் சிகரத்தை அடைந்தனர். இதே பருவத்தில், நேபாளத்தின் காமி ரிட்டா ஷெர்பா, 32வது முறையாக எவரெஸ்ட் மலையை ஏறி தனது சொந்த சாதனையை முறியடித்தார்; மேலும் லாக்பா ஷெர்பா, 11 முறை எவரெஸ்ட் ஏறிய முதல் பெண் என்ற புதிய சாதனையைப் படைத்தார்.