TNPSC தேர்வுக்கான முக்கிய தினசரி நடப்பு நிகழ்வுகள் – 10-04-2026

மாநிலச் செய்திகள்

கேரளா மற்றும் அஸ்ஸாம் தேர்தல்கள்

சமீபத்திய தேர்தல்களில் கேரளா மாநிலத்தில் 77.93% வாக்குப்பதிவு பதிவாகி, 2021 கேரளா பேரவைத் தேர்தலின் 74.06% வாக்குப்பதிவை விட அதிகரித்துள்ளது. அஸ்ஸாம் மாநிலத்தில் 85.33% வாக்குப்பதிவு பதிவாகி, முந்தைய 82.01% வாக்குப்பதிவை விட உயர்ந்துள்ளது. அஸ்ஸாம் மாநிலத்தின் ஸ்ரீபூமி மாவட்டம் (பதர்காண்டி தொகுதி) மற்றும் திப்ருகர் மாவட்டம் (கோவாங் தொகுதி) ஆகிய இடங்களில் வன்முறைச் சம்பவங்கள் நடைபெற்று சுமார் 30 பேர் காயமடைந்தனர் மற்றும் 7 பேர் கைது செய்யப்பட்டனர். சில வாக்குச்சாவடிகளில் போலி வாக்காளர்கள் வாக்களித்ததாக குற்றச்சாட்டுகள் எழுந்ததுடன், மின்னணு வாக்குப்பதிவு இயந்திரங்கள் (EVM) சேதப்படுத்தப்பட்டதாக தகவல்கள் தெரிவிக்கின்றன. கேரளா மாநிலத்தில் வாக்களித்த முக்கிய நபர்களில் ஆளுநர் ராஜேந்திர விஸ்வநாத் ஆர்லேகர், முதல்வர் பினராயி விஜயன், எதிர்க்கட்சித் தலைவர் வி.டி. சதீசன், மத்திய அமைச்சர் சுரேஷ் கோபி, மாநில அமைச்சர் சிவன்குட்டி, மற்றும் மாநில காங்கிரஸ் தலைவர் சன்னி ஜோசப் ஆகியோர் அடங்குவர். இடைத்தேர்தல்களில் கர்நாடகத்தின் பாகல்கோட் (65.68%), தாவணகெரே (63.04%), நாகாலாந்தின் கோரிடாங் (80.62%), மற்றும் திரிபுராவின் தர்மநகர் (79.84%) ஆகிய இடங்களில் வாக்குப்பதிவு நடைபெற்றது. தமிழ்நாட்டில் ஏப்ரல் 23, மற்றும் மேற்கு வங்கத்தில் ஏப்ரல் 23 மற்றும் 29 ஆகிய தேதிகளில் தேர்தல்கள் நடைபெறவுள்ளன; வாக்கு எண்ணிக்கை ஜூன் 4 நடைபெறும்.

புதுச்சேரி சட்டப்பேரவைத் தேர்தல் 2026: சாதனை வாக்குப்பதிவு

புதுச்சேரி சட்டப்பேரவைத் தேர்தல் (ஏப்ரல் 9, 2026) அமைதியான முறையில் நடைபெற்றதில், 89.87% என்ற வரலாற்று சாதனை வாக்குப்பதிவு பதிவானது, இது 1964 ஆம் ஆண்டு நடைபெற்ற முதல் சட்டப்பேரவைத் தேர்தலிலிருந்து அதிகபட்சமாகும். மொத்தம் 30 தொகுதிகள் மற்றும் சுமார் 9.50 லட்சம் வாக்காளர்கள் உடன், 1,099 வாக்குச்சாவடிகளில் காலை 7 மணி முதல் மாலை 6 மணி வரை வாக்குப்பதிவு நடைபெற்றது. தேர்தல் பணிகளில் 4,836 அரசு ஊழியர்கள் ஈடுபட்டனர், மேலும் 209 வாக்குச்சாவடிகள் பதற்றமானவை எனக் குறிக்கப்பட்டு கூடுதல் பாதுகாப்பு ஏற்பாடுகள் செய்யப்பட்டன. தேர்தல் நடைமுறைகள் முழுவதும் வீடியோ பதிவு செய்யப்பட்டது மற்றும் சில சிறிய சம்பவங்களைத் தவிர்த்து தேர்தல் அமைதியாக நடைபெற்றது. முக்கிய நபர்களில் துணைநிலை ஆளுநர் கைலாஷ் நாதன், முதல்வர் என். ரங்கசாமி மற்றும் பிற அரசியல் தலைவர்கள் வாக்களித்தனர். இந்தத் தேர்தலில் தேசிய ஜனநாயக கூட்டணி (என்.ஆர். காங்கிரஸ் தலைமையில் என். ரங்கசாமி) மற்றும் காங்கிரஸ், திமுக கூட்டணி இடையே நேரடி போட்டி நிலவியது; மொத்தம் 294 வேட்பாளர்கள் போட்டியிட்டனர், மேலும் விஜய் தலைமையிலான TVK கூட்டணியும் பங்கேற்றது. முந்தைய அதிகபட்ச வாக்குப்பதிவுகள் 85.33% (1974), 85.29% (2006) மற்றும் 85.57% (2011) ஆகும்.

சர்வதேசச் செய்திகள்

இந்திய குடியரசு துணைத் தலைவர் சி.பி. ராதாகிருஷ்ணன் – இலங்கை அரசுமுறைப் பயணம்

இந்திய குடியரசு துணைத் தலைவர் சி.பி. ராதாகிருஷ்ணன், ஏப்ரல் 19 மற்றும் 20, 2026 ஆகிய தேதிகளில் இலங்கைக்கு இரண்டு நாள் அரசுமுறைப் பயணம் மேற்கொள்ளவுள்ளார்; இது அவர் பதவியேற்ற பின் இலங்கைக்கு மேற்கொள்ளும் முதல் பயணம் ஆகும். இந்த தகவலை இலங்கை அதிபரின் ஊடகப்பிரிவு உறுதிப்படுத்தியது. பயணத்திட்டத்தை இறுதிப்படுத்தும் நோக்கில் கொழும்பு அதிபர் மாளிகையில் நடைபெற்ற ஆலோசனையில் அதிபரின் தலைமை அலுவல் அதிகாரி பிரபாத் சந்திரகீர்த்தி, இந்திய துணைத் தூதர் சத்யாஞ்சல் பாண்டே, மற்றும் இந்திய உயர்ஸ்தானிகரக வளர்ச்சி ஒத்துழைப்புப் பிரிவு ஆலோசகர் மைத்ரி குல்கர்னி, அரசியல் ஆலோசகர் டாக்டர் சி. ராம் பாபு, அதிபரின் மூத்த கூடுதல் செயலர் ரோஷன் கமேகே ஆகியோர் கலந்து கொண்டனர். இந்த ஆலோசனையில் பயண நிகழ்ச்சி நிரல், இருதரப்பு பேச்சுவார்த்தை தலைப்புகள், மற்றும் இந்திய நிதியுதவியுடன் கொழும்புவில் நிறைவேற்றப்பட்ட மற்றும் எதிர்காலத் திட்டங்கள் குறித்து விவாதிக்கப்பட்டது. பயணத்தின் போது அவர் இலங்கை அதிபர் அனுரகுமார திசாநாயக்க, பிரதமர் ஹரிணி அமரசூரிய, மற்றும் பிற முக்கிய தலைவர்களை சந்திக்க உள்ளார்.

இந்திய வெளியுறவுத் துறைச் செயலர் விக்ரம் மிஸ்ரி – அமெரிக்கா பயணம்

இந்திய வெளியுறவுத் துறைச் செயலர் விக்ரம் மிஸ்ரி, மூன்று நாள் அரசுமுறைப் பயணமாக அமெரிக்கா சென்று வாஷிங்டனில், அமெரிக்க பாதுகாப்புத் துறை இணையமைச்சர்கள் மைக்கேல் டஃபி, எல் பிரிட்ஜ் கோல்பி, மற்றும் வர்த்தகத் துறை இணை அமைச்சர்கள் ஜெஃப்ரி கெஸ்லர், வில்லியம் கிம்மிட் ஆகியோரை சந்தித்து ஆலோசனை நடத்தினார். இந்த சந்திப்பில் இந்தியா–அமெரிக்கா பாதுகாப்பு மற்றும் வர்த்தக உறவுகள் மற்றும் அவற்றை வலுப்படுத்தும் நடவடிக்கைகள் குறித்து விவாதிக்கப்பட்டது. மேலும், ஈரான் மற்றும் அமெரிக்கா–இஸ்ரேல் மோதல் காரணமாக ஏற்பட்ட மேற்காசிய பதற்றம் குறித்தும் ஆலோசனை நடைபெற்றது. இந்த சந்திப்பு, கடந்த மாதம் புதுதில்லியில் நடைபெற்ற இந்தியா–அமெரிக்கா பாதுகாப்புக் கொள்கைக் குழுக் கூட்டம் பின்னணியில் முக்கியத்துவம் பெறுகிறது, இதில் எல் பிரிட்ஜ் கோல்பி பங்கேற்று விக்ரம் மிஸ்ரியை சந்தித்திருந்தார். இந்த பயணம், டொனால்ட் டிரம்ப் அமெரிக்க அதிபராக பதவியேற்ற பின் இந்தியப் பொருட்களுக்கு விதிக்கப்பட்ட கூடுதல் வரி மற்றும் ஆபரேஷன் சிந்தூர் தொடர்பான இந்தியா–பாகிஸ்தான் நிலைமை காரணமாக பாதிக்கப்பட்ட இந்தியா–அமெரிக்கா இருதரப்பு உறவுகளை மேம்படுத்தும் முயற்சியின் ஒரு பகுதியாகும்.

ஷ்யா ‘மெமோரியல்’ அமைப்பை தீவிரவாத அமைப்பாக அறிவிப்பு

ரஷ்யாவின் உச்சநீதிமன்றம், அந்த நாட்டின் பழமையான மனித உரிமைக் குழுவான மற்றும் அமைதிக்கான நோபல் பரிசு (2022) பெற்ற ‘மெமோரியல்’ அமைப்பை ஏப்ரல் 2026 இல் தீவிரவாத அமைப்பாக அறிவித்தது. இதனைத் தொடர்ந்து, அந்த அமைப்பின் அனைத்து செயல்பாடுகளும் ரஷ்யாவில் தடை செய்யப்பட்டன, மேலும் நிதி வழங்குதல், தகவல்களை பகிர்வு செய்தல் அல்லது அமைப்புடன் இணைந்து செயல்படுதல் குற்றமாக அறிவிக்கப்பட்டது. இந்த அமைப்பு ரஷ்யாவின் இறையாண்மை மற்றும் கலாசார மதிப்புகளுக்கு எதிராக செயல்பட்டதாக நீதிமன்றம் தெரிவித்தது. 1980-களில் தொடங்கப்பட்ட இந்த அமைப்பு, சோவியத் யூனியன் கால அரசியல் அடக்குமுறைகள் மற்றும் ஜோசப் ஸ்டாலின் ஆட்சிக் கால மனித உரிமை மீறல்கள் குறித்து ஆவணப்படுத்தும் நோக்கத்துடன் இயங்கியது. முன்னதாக, 2021 ஆம் ஆண்டு சில பிரிவுகள் தடை செய்யப்பட்ட நிலையில், தற்போது முழு அமைப்பும் தடை செய்யப்பட்டுள்ளது. இதனுடன், ரஷ்யாவின் சுதந்திர பத்திரிகையான ‘நோவயா கெசெட்டா’ அலுவலகத்தில் பாதுகாப்புப் படையினர் சோதனை நடத்தினர்.

இந்தியா–பூட்டான் புனத்சாங்சு-II நீர்மின் திட்ட ஒப்பந்தம்

இந்தியா மற்றும் பூட்டான் நாடுகள் புனத்சாங்சு-II நீர்மின் திட்டத்திற்கான கட்டண நெறிமுறை ஒப்பந்தத்தில் கையெழுத்திட்டுள்ளன. இந்தத் திட்டம் 1020 மெகாவாட் திறன் கொண்ட ஓடும் நீர் மின் திட்டமாக பூட்டானில் உள்ள புனத்சாங்சு ஆற்றில் அமைந்துள்ளது. இந்த ஆறு போச்சு மற்றும் மோச்சு ஆறுகள் சங்கமமாக உருவாகி, தெற்கே பாய்ந்து மேற்கு வங்காளம் சமவெளிப் பகுதிக்குள் நுழைந்து, பிரம்மபுத்திரா ஆற்றின் முக்கிய துணை ஆறாக செயல்படுகிறது.

விளையாட்டுச் செய்திகள்

ஆசிய குத்துச்சண்டை சாம்பியன்ஷிப் 2026

மங்கோலியாவின் உலன்படார் நகரில் நடைபெற்ற ஆசிய குத்துச்சண்டை சாம்பியன்ஷிப் (ஏப்ரல் 2026) போட்டியில், இந்திய மகளிர் அணி 4 தங்கம், 2 வெள்ளி, 4 வெண்கலம் என மொத்தம் 10 பதக்கங்களுடன் முதலிடம் பிடித்தது. இறுதிச்சுற்றுகளில் மீனாட்சி (48 கிலோ) மங்கோலியாவின் நோமுன்டரி அம்கலானை 5-0 என்ற கணக்கில் வீழ்த்தி தங்கம் வென்றார்; ப்ரீத்தி (54 கிலோ) சீன தைபேயின் ஹுவாங் சியாவ் வென் (மூன்று முறை உலக சாம்பியன், டோக்கியோ ஒலிம்பிக் வெண்கலப் பதக்க வீராங்கனை) மீது 5-0 என்ற கணக்கில் வெற்றி பெற்று தங்கம் பெற்றார். பிரியா (60 கிலோ) வட கொரியாவின் வோன் உன் கியோங்கை 3-0 என வீழ்த்தி தங்கம் வென்றார்; அருந்ததி (70 கிலோ) கஜகஸ்தானின் பகித் செய்டிஷை 4-1 என்ற கணக்கில் வீழ்த்தி தங்கம் பெற்றார். 57 கிலோ பிரிவில் ஜாஸ்மின் லம்போரியா தாய்லாந்தின் புன்ராவீ ருன்ரோஸிடம் 0-5 என தோற்று வெள்ளி பெற்றார்; 80+ கிலோ பிரிவில் அல்பியா பதான் கஜகஸ்தானின் டினா இஸ்லாம்பெகோவாவிடம் 0-5 என தோற்று வெள்ளி பெற்றார். இந்த வெற்றிக்கு தலைமைப் பயிற்சியாளர் சான்டியாகோ நைவா தலைமையில் இந்திய அணி செயல்பட்டது.

லாரா கார்டோஸோ – டி20 உலகச் சாதனை 9 விக்கெட்டுகள்

சர்வதேச மகளிர் டி20 கிரிக்கெட் போட்டி (ஏப்ரல் 2026)யில், பிரேஸிலின் வேகப்பந்து வீச்சாளர் லாரா கார்டோஸோ, 3 ஓவர்களில் 4 ரன்கள் மட்டுமே கொடுத்து 9 விக்கெட்டுகள் வீழ்த்தி, ஆடவர் மற்றும் மகளிர் டி20 கிரிக்கெட்டில் ஒரு இன்னிங்ஸில் அதிக விக்கெட் எடுத்த உலகச் சாதனை படைத்தார். இந்த சாதனை பிரேஸில் மற்றும் லிசோதோ அணிகள் மோதிய போட்டியில் நிகழ்ந்தது; இதில் பிரேஸில் 20 ஓவர்களில் 202/8 ரன்கள் எடுத்தது, பதிலுக்கு லிசோதோ 6.2 ஓவர்களில் 13 ரன்களுக்கு ஆல் அவுட் ஆனது, இதனால் பிரேஸில் 189 ரன்கள் வித்தியாசத்தில் வெற்றி பெற்றது. இந்த ஆட்டத்தில் லாரா கார்டோஸோ ஹாட்ரிக் உட்பட பல ஓவர்களில் தொடர்ச்சியாக விக்கெட்டுகளை கைப்பற்றினார். முந்தைய சாதனைகள் 2025-இல் மியான்மருக்கு எதிராக பூடானின் சோனம் யெஷே எடுத்த 8/7 (ஆடவர் டி20) மற்றும் 2024-இல் மங்கோலியாவுக்கு எதிராக இந்தோனேஷியாவின் ரோமாலியா ரோமாலியா எடுத்த 7/0 (மகளிர் டி20) ஆகும்.

பொருளாதாரச் செய்திகள்

டிசிஎஸ் நிதி முடிவுகள் 2025–26

இந்தியாவின் முன்னணி தகவல் தொழில்நுட்ப நிறுவனம் டாடா கன்சல்டன்சி சர்வீசஸ் (TCS), 2025–26 நிதியாண்டின் 4-ஆம் காலாண்டில் ₹13,718 கோடி நிகர லாபம் ஈட்டியுள்ளது; இது 2024–25 நிதியாண்டின் அதே காலாண்டில் ₹12,224 கோடியுடன் ஒப்பிடுகையில் 12.22% வளர்ச்சி ஆகும். முழு 2025–26 நிதியாண்டில், நிறுவனத்தின் நிகர லாபம் ₹49,210 கோடி ஆகவும், 1.35% வளர்ச்சி பதிவாகவும், மொத்த வருவாய் 4.58% உயர்ந்து ₹2.67 லட்சம் கோடி ஆகியுள்ளது. மதிப்பீட்டு காலாண்டில் செயல்பாட்டு வருவாய் 9.64% உயர்ந்து ₹70,698 கோடி ஆகியுள்ளது. நிறுவனத்தின் மொத்த பணியாளர் எண்ணிக்கை 5,84,519 ஆக உயர்ந்துள்ளது, இதில் அந்த காலாண்டில் 2,356 பேர் சேர்க்கப்பட்டனர், ஆனால் முழு நிதியாண்டில் 23,460 பேர் குறைந்துள்ளனர். நிறுவனம் அமெரிக்கா உள்ளிட்ட சந்தைகளிலிருந்து சுமார் $12 பில்லியன் மதிப்பிலான புதிய ஒப்பந்தங்களை பெற்றுள்ளது, குறிப்பாக வங்கி, நிதிச் சேவைகள் மற்றும் காப்பீட்டு (BFSI) துறையில் முதலீடுகள் அதிகம் உள்ளது. மேலாண் இயக்குநர் கே. கிருத்திவாசன் மற்றும் மனிதவளத் தலைவர் சுதீப் குன்னுமால் அறிவிப்பின்படி ஏப்ரல் 1 முதல் ஊதிய உயர்வு அமல்படுத்தப்படும்; மேலும் ஒரு பங்குக்கு ₹31 ஈவுத்தொகை வழங்க இயக்குநர்கள் குழு பரிந்துரைத்துள்ளது.

பிரபலமானவர்கள், விருதுகள் மற்றும் நிகழ்வுகள்

ஐஏஏ ஆலிவ் கிரவுன் விருதுகள் 2026: ‘தி ஹிந்து’க்கு 3 விருதுகள்

மும்பை தாஜ் லேண்ட்ஸ் எண்ட் ஹோட்டலில் நடைபெற்ற ஐஏஏ ஆலிவ் கிரவுன் விருதுகள் 2026 விழாவில், ‘தி ஹிந்து’ நாளிதழ் Press Corporate பிரிவில் 3 விருதுகளை பெற்றது. இதில் ‘Glacier Melts Felt’ (உலக தண்ணீர் தினம்) மற்றும் ‘Stub The Habit’ (உலக புகையிலை எதிர்ப்பு தினம்) பிரச்சாரங்களுக்கு தங்கப் பதக்கங்கள், மற்றும் ‘The Last Pack’ (உலக வனவிலங்கு தினம்) பிரச்சாரத்திற்கு வெள்ளிப் பதக்கம் வழங்கப்பட்டது. இந்த பிரச்சாரங்கள் Ogilvy நிறுவனத்தால் உருவாக்கப்பட்டவை. இந்த விருதுகள் சர்வதேச விளம்பர சங்கத்தின் (International Advertising Association - IAA) இந்திய கிளையால் வழங்கப்பட்டு, நிலைத்தன்மை தொடர்பான தகவல்தொடர்பு முயற்சிகளை அங்கீகரிக்கின்றன.

சந்திரகாந்த் பட்டங்கர் – இந்தியாவின் மிக மூத்த உயிருடன் உள்ள டெஸ்ட் வீரர்

சென்னையில் சி.டி. கோபிநாத் மறைவுக்குப் பின்னர், 95 ஆண்டுகள் 136 நாட்கள் வயதான சந்திரகாந்த் பட்டங்கர், தற்போது இந்தியாவின் மிக மூத்த உயிருடன் உள்ள டெஸ்ட் கிரிக்கெட் வீரர் மற்றும் உலகின் இரண்டாவது மிக மூத்த டெஸ்ட் வீரர் (ஆஸ்திரேலியாவின் நீல் ஹார்வேக்கு அடுத்ததாக) ஆனார். நவம்பர் 24, 1930 அன்று மகாராஷ்டிராவின் பென் நகரில் பிறந்த அவர், 1955 டிசம்பர் மாதத்தில் ஈடன் கார்டனில் நியூசிலாந்துக்கு எதிராக ஒரே ஒரு டெஸ்ட் போட்டியில் விளையாடி 13 மற்றும் 1 (ஆட்டமிழக்காமல்) ரன்கள் எடுத்தார்; மேலும் விக்கெட் கீப்பராக 3 கேட்ச்கள் மற்றும் 1 ஸ்டம்பிங் செய்துள்ளார்.

தேசியச் செய்திகள்

இந்தியாவின் சூரிய ஆற்றல் வளர்ச்சி 2025–26: சாதனை திறன் சேர்க்கை

2025–26 நிதியாண்டில் இந்தியா 45 ஜிகாவாட் சூரிய ஆற்றல் திறனைச் சேர்த்து வரலாற்று சாதனை படைத்துள்ளது, இதில் ராஜஸ்தான், குஜராத் மற்றும் தமிழ்நாடு மாநிலங்கள் முக்கிய பங்களிப்பை வழங்கியுள்ளன. மார்ச் 31, 2026 நிலவரப்படி, இந்தியாவின் மொத்த சூரிய ஆற்றல் திறன் 150.26 ஜிகாவாட் ஆக உயர்ந்துள்ளது; இது 2014-இல் இருந்த 2.82 ஜிகாவாட்டிலிருந்து குறிப்பிடத்தக்க வளர்ச்சி ஆகும். IRENA புதுப்பிக்கத்தக்க எரிசக்தி புள்ளிவிவரம் 2025 படி, இந்தியா உலகளவில் 3-வது இடத்தில் உள்ளது. இந்த வளர்ச்சிக்கு 2024-ல் தொடங்கப்பட்ட பிரதமர் சூர்ய கர் (PM Surya Ghar) திட்டம் (ஒரு கோடி வீடுகளுக்கு கூரை சூரிய அமைப்பு; டிசம்பர் 2025 நிலவரப்படி 23.9 லட்சம் வீடுகள்), PM-KUSUM, தேசிய சூரிய சக்தி மிஷன், சோலார் பூங்காக்கள், மற்றும் அல்ட்ரா-மெகா சோலார் மின் திட்டங்கள் போன்ற அரசுத் திட்டங்கள் காரணமாகும். மேலும், Solar PV உற்பத்திக்கான PLI திட்டம் மூலம் ₹52,900 கோடி முதலீடு (செப்டம்பர் 2025) ஈர்க்கப்பட்டுள்ளது. இந்தியா சர்வதேச சூரியசக்தி கூட்டணியின் (தலைமையகம் குருகிராம்) நிறுவனர் நாடாகவும், 2018-ல் தொடங்கப்பட்ட ‘ஒரே சூரியன், ஒரே உலகம், ஒரே கட்டம்’ (OSOWOG) திட்டத்தின் மூலம் உலகளாவிய புதுப்பிக்கத்தக்க எரிசக்தி ஒருங்கிணைப்பை முன்னெடுத்து வருகிறது.

மத்திய ஆயுதக் காவல் படைகள் (பொது நிர்வாகம்) சட்டம், 2026

மத்திய அரசு, மத்திய ஆயுதக் காவல் படைகள் (பொது நிர்வாகம்) சட்டம், 2026-ஐ அறிவித்துள்ளது, இது CRPF, CISF, BSF, ITBP மற்றும் SSB ஆகிய ஐந்து படைகளில் பணியாற்றும் அதிகாரிகளின் ஆள்சேர்ப்பு, அயற்பணி, பதவி உயர்வு மற்றும் பணி நிபந்தனைகளை ஒருங்கிணைந்த முறையில் ஒழுங்குபடுத்துகிறது. மத்திய ஆயுதக் காவல் படைகள் (CAPF) என்பது மத்திய உள்துறை அமைச்சகத்தின் (MHA) நிர்வாக கட்டுப்பாட்டின் கீழ் இயங்கும் ஏழு ஆயுதப் போலீஸ் அமைப்புகளை கொண்டது; அவை அசாம் ரைபிள்ஸ் (AR), எல்லைப் பாதுகாப்புப் படை (BSF), மத்திய தொழில் பாதுகாப்புப் படை (CISF), மத்திய ரிசர்வ் போலீஸ் படை (CRPF), இந்தோ-திபெத்திய எல்லைப் போலீஸ் (ITBP), தேசிய பாதுகாப்புப் படை (NSG), மற்றும் சசஸ்த்ர சீமா பல் (SSB) ஆகும். இதில் அசாம் ரைபிள்ஸ் (AR) நிர்வாக ரீதியாக MHA கீழ் இருந்தாலும், செயல்பாட்டு ரீதியாக பாதுகாப்பு அமைச்சகத்தின் கீழ் இயங்குகிறது. இந்த அனைத்து அமைப்புகளுக்கும் காவல்துறை தலைமை இயக்குநர் (DGP) அந்தஸ்தில் உள்ள அதிகாரிகள் தலைமை தாங்குகின்றனர்.

அறிவியல் மற்றும் தொழில்நுட்பச் செய்திகள்

புராஜெக்ட் கிளாஸ்விங்: ஆந்த்ரோபிக் இணையப் பாதுகாப்பு திட்டம் (2026)

ஏப்ரல் 09, 2026 அன்று, ஆந்த்ரோபிக் (Anthropic) நிறுவனம் Project Glasswing என்ற இணையப் பாதுகாப்பு திட்டத்தை Amazon Web Services (AWS), Apple, Microsoft, Google, NVIDIA, மற்றும் JPMorgan Chase ஆகிய நிறுவனங்களுடன் இணைந்து தொடங்கியது. இந்தத் திட்டத்தில் Claude Mythos Preview என்ற செயற்கை நுண்ணறிவு மாதிரி பயன்படுத்தப்படுகிறது, இது மென்பொருள் குறைபாடுகளை தானாக கண்டறிந்து பாதுகாப்பு சோதனைகள் மேற்கொள்ளும் திறன் கொண்டது. இந்த முயற்சியின் கீழ், $100 மில்லியன் நிதி மற்றும் பயன்பாட்டு ஆதரவு Linux Foundation மற்றும் Apache Software Foundation வழியாக திறந்தநிலை மென்பொருள் பாதுகாப்பிற்காக வழங்கப்படுகிறது. இந்த AI மாதிரி OpenBSD-இல் 27 ஆண்டுகள் பழமையான குறைபாடு, மற்றும் Linux kernel, FFmpeg ஆகியவற்றில் உள்ள பாதிப்புகளை கண்டறிந்துள்ளது. இந்தத் திட்டம் AI அடிப்படையிலான பாதுகாப்பு கருவிகளை பயன்படுத்தி மென்பொருள் பாதுகாப்பிற்கான உலகளாவிய தரநிலைகளை உருவாக்க நோக்கமாகக் கொண்டுள்ளது.

மோர்செல்லா (மோரல்) காளான்களின் கட்டுப்படுத்தப்பட்ட சாகுபடி

SKUAST-காஷ்மீர் விஞ்ஞானிகள், இதுவரை இமயமலைக் காடுகளில் மட்டுமே காணப்பட்ட மோர்செல்லா (Morchella) அல்லது மோரல் காளான்களை கட்டுப்படுத்தப்பட்ட முறையில் சாகுபடி செய்வதில் சாதனை படைத்துள்ளனர். இந்த காளான்கள் உண்ணக்கூடிய பூஞ்சை இனம் ஆகும் மற்றும் தேன்கூடு போன்ற வடிவம், அதிக புரதம், ஆக்ஸிஜனேற்றத் தடுப்பான்கள், மற்றும் மருத்துவ குணங்கள் கொண்டவை. இவை குச்சி (Gucchi), கனகுச்சி (Kanaguchhi), கங்காச் (Kangaech), சத்ரி (Chhatri) போன்ற பெயர்களில் அழைக்கப்படுகின்றன மற்றும் இயற்கையாக ஜம்மு-காஷ்மீர், இமாச்சலப் பிரதேசம், உத்தரகாண்ட் ஆகிய வடமேற்கு இமயமலைப் பகுதிகளில் உள்ள உயரமான மிதவெப்ப காடுகளில் காணப்படுகின்றன. இவை பொதுவாக குறுகிய வசந்த காலத்தில் வளர்கின்றன; சிக்கலான வாழ்க்கைச் சுழற்சி மற்றும் சுற்றுச்சூழல் தேவைகள் காரணமாக முன்பு சாகுபடி கடினமாக இருந்தது.

முக்கிய தினங்கள்

ஏப்ரல் 10 – உலக ஹோமியோபதி தினம்

Theme 2026: “Homeopathy for Holistic Health and Well-being”
உலக ஹோமியோபதி தினம் ஒவ்வொரு ஆண்டும் ஏப்ரல் 10 அன்று ஹோமியோபதி முறையின் நிறுவனர் டாக்டர் சாமுவேல் ஹானிமேன் பிறந்தநாளை முன்னிட்டு அனுசரிக்கப்படுகிறது. இந்த நாள் ஹோமியோபதி மருத்துவத்தின் முக்கியத்துவத்தையும் அதன் சுகாதாரப் பயன்பாட்டையும் பற்றிய விழிப்புணர்வை ஏற்படுத்துகிறது.