TNPSC தேர்வுக்கான முக்கிய தினசரி நடப்பு நிகழ்வுகள் – 22-02-2026

சர்வதேசச் செய்திகள்

அமெரிக்க உச்சநீதிமன்ற தீர்ப்பு மற்றும் 10% கூடுதல் வரி அறிவிப்பு

அமெரிக்க அதிபர் டொனால்டு டிரம்ப், தனது சிறப்பு அதிகாரமான சட்டப்பிரிவு 122-ஐ பயன்படுத்தி, இந்தியா உட்பட அனைத்து நாடுகளுக்கும் 10% கூடுதல் வரி விதிப்பை அறிவித்தார். இதற்கு முன்பு, ஏப்ரல் மாதத்தில் 100-க்கும் மேற்பட்ட நாடுகளுக்கு புதிய வரி விதிப்புகளை அறிவித்திருந்தார். இதனை எதிர்த்து சிறு நிறுவனங்கள் மற்றும் ஜனநாயகக் கட்சி உள்ளிட்ட 12 குழுக்கள், சர்வதேச வர்த்தக நீதிமன்றத்தில் வழக்கு தொடர்ந்தன. அந்த நீதிமன்றம் புதிய வரி விதிப்பை ரத்து செய்தது; அதன் தீர்ப்பை பெடரல் சர்க்யூட் நீதிமன்றமும் உறுதிப்படுத்தியது. பின்னர் இந்த வழக்கு அமெரிக்க உச்சநீதிமன்றத்தில், தலைமை நீதிபதி ராபர்ட்ஸ் தலைமையிலான 9 நீதிபதிகள் கொண்ட அமர்வில் விசாரிக்கப்பட்டது. இதில் 6–3 என்ற பெரும்பான்மை தீர்ப்பில் புதிய வரி விதிப்பு செல்லாது என அறிவிக்கப்பட்டது. புதிய வரி விதிப்பிற்கு முன், இந்தியப் பொருட்களுக்கு 3.5% வரி விதிக்கப்பட்டிருந்தது; 10% கூடுதல் வரியுடன் மொத்தம் 13.5% வரி ஆனது. இந்த விவகம், இந்தியப் பிரதமர் நரேந்திர மோடி மற்றும் அமெரிக்க அதிபர் டொனால்டு டிரம்ப் இடையிலான வர்த்தக பேச்சுவார்த்தைகளுடன் தொடர்புடையது; குறிப்பாக 18% இறக்குமதி வரி தொடர்பான விவாதமும் இடம்பெற்றது. மத்திய தொழில் மற்றும் வர்த்தகத் துறை அமைச்சர் பியுஷ் கோயல், அமெரிக்க உச்சநீதிமன்ற தீர்ப்பை மத்திய அரசு கவனத்தில் கொண்டு அதன் விளைவுகளை ஆய்வு செய்து வருவதாக தெரிவித்துள்ளார்.

இந்தியா–பிரேசில் இருதரப்பு வர்த்தக இலக்கு ரூ.1.81 லட்சம் கோடி

இந்தியப் பிரதமர் நரேந்திர மோடி மற்றும் பிரேசில் அதிபர் லூலா டி சில்வா ஆகியோர், அதிபரின் அரசு முறை இந்தியா பயணத்தின் போது புதுடெல்லியில் சந்தித்தனர். அதிபர் சில்வாவுக்கு குடியரசுத் தலைவர் மாளிகையில் வரவேற்பு அளிக்கப்பட்டது; பின்னர் டெல்லி ஹைதராபாத் இல்லத்தில் இருதரப்பு சந்திப்பு நடைபெற்றது. இந்த சந்திப்பில் இருதரப்பு உறவுகள் மற்றும் சர்வதேச அரசியல் நிலவரம் குறித்து ஆலோசிக்கப்பட்டது. இந்தியா மற்றும் பிரேசில் இடையிலான வர்த்தகத்தை அடுத்த 5 ஆண்டுகளில் ரூ.1.81 லட்சம் கோடிக்கும் மேலாக உயர்த்த இலக்கு நிர்ணயிக்கப்பட்டது. டிஜிட்டல் தொழில்நுட்பம், அரிய வகை கனிமங்கள் மற்றும் ஸ்டீல் விநியோகம் ஆகிய துறைகளில் இணைந்து செயல்பட புரிந்துணர்வு ஒப்பந்தங்கள் (MoUs) கையெழுத்தாகின. லத்தின் அமெரிக்காவில் இந்தியாவின் மிகப்பெரிய வர்த்தகப் பங்காளி பிரேசில் ஆகும். மேலும், அரிய வகை கனிமங்கள் மற்றும் பாதுகாப்புத் துறையில் இணைந்து செயல்படுவது குறித்து ஆலோசிக்கப்பட்டது. இரு நாடுகளும் தீவிரவாதத்துக்கு எதிராக இணைந்து செயல்பட முடிவு செய்துள்ளன. இந்தியா மற்றும் பிரேசில், ‘குளோபல் சவுத்’ அமைப்பின் முக்கிய ஜனநாயக நாடுகள் என குறிப்பிடப்படுகின்றன.

தமிழ்நாடு செய்திகள்

தமிழ்நாடு அறிவியல் தொழில்நுட்ப மாநில மன்றம் – ஸ்டார்ட் அப் தமிழ்நாடு ஒப்பந்தம்

தமிழகத்தில் ஆராய்ச்சி கண்டுபிடிப்புகளை வணிகரீதியிலான தயாரிப்புகளாக மாற்றும் நோக்கில், தமிழ்நாடு அறிவியல் தொழில்நுட்ப மாநில மன்றம் (TNSCST) மற்றும் ஸ்டார்ட் அப் தமிழ்நாடு இடையே சென்னை மெட்ரோ ரயில் தலைமை அலுவலகத்தில் புரிந்துணர்வு ஒப்பந்தம் கையெழுத்தானது. இந்த ஒப்பந்தம் குழு, சிறு மற்றும் நடுத்தர தொழில் நிறுவனங்கள் துறை அமைச்சர் தா.மோ. அன்பரசன் முன்னிலையில், TNSCST உறுப்பினர் செயலர் எஸ்.வி. செல்லையா மற்றும் ஸ்டார்ட் அப் தமிழ்நாடு தலைவர் சிவராஜ் ராமநாதன் ஆகியோரால் கையெழுத்திடப்பட்டது. கல்வி நிறுவனங்கள் மற்றும் அமைப்புகளில் மேற்கொள்ளப்படும் ஆராய்ச்சிகளை வணிகரீதியிலான தயாரிப்புகளாக மாற்றுதல், புதிய கண்டுபிடிப்புகளுக்கு அறிவுசார் சொத்துரிமை (IPR) பெறுதல், கல்வித்துறை மற்றும் தொழில் துறைகளுக்கிடையேயான இடைவெளியை குறைத்தல் மற்றும் புதிய நிறுவனங்களுக்கு சந்தை வாய்ப்புகளை உருவாக்குதல் ஆகியவை இந்த ஒப்பந்தத்தின் நோக்கங்களாகும். தமிழ்நாடு அறிவியல் தொழில்நுட்ப மாநில மன்றம் புதிய தொழில்நுட்பங்களை கண்டறிதல், காப்புரிமை பாதுகாப்பு ஏற்படுத்துதல் மற்றும் தொழில்நுட்ப தயார்நிலையை உறுதி செய்தல் பணிகளை மேற்கொள்ளும்; ஸ்டார்ட் அப் தமிழ்நாடு புதிய நிறுவனங்களை ஒருங்கிணைத்தல், தொழில் துறை தொடர்புகளை ஏற்படுத்துதல் மற்றும் புதிய தயாரிப்புகள் சந்தையை சென்றடைய உதவுதல் ஆகியவற்றை முன்னெடுக்கும். இந்த திட்டத்தை செயல்படுத்த இரு அமைப்புகளின் பிரதிநிதிகள் அடங்கிய கூட்டு ஒருங்கிணைப்பு குழு அமைக்கப்பட உள்ளது.

புதுடெல்லி ஏஐ பிரகடனம் – 88 நாடுகள் கையெழுத்து

பாரத் மண்டபம், புதுடெல்லியில் நடைபெற்ற இந்தியா-ஏஐ உச்சி மாநாடு 2026, இந்த மாதம் 16-ம் தேதி தொடங்கி இரண்டு நாட்கள் நடைபெற்று நிறைவடைந்தது; இதில் 5 லட்சத்திற்கும் அதிகமானோர் பங்கேற்றனர். இந்த மாநாட்டில் உருவாக்கப்பட்ட புதுடெல்லி ஏஐ பிரகடனத்தில், அமெரிக்கா, ரஷ்யா, சீனா, பிரான்ஸ் மற்றும் ஐரோப்பிய ஒன்றியம் உட்பட மொத்தம் 88 நாடுகள் கையெழுத்திட்டன. இந்த பிரகடனம், செயற்கை நுண்ணறிவு (AI) பயன்கள் அனைவருக்கும் கிடைக்க வேண்டும் என்பதை வலியுறுத்தி, தேசிய இறையாண்மை, ஏஐ தொழில்நுட்பத்தை அனைவரும் அணுகக்கூடியதாக மாற்றுதல் மற்றும் சர்வதேச ஒத்துழைப்பை வலுப்படுத்துதல் ஆகியவற்றை முன்னிறுத்துகிறது. மேலும், ஏஐ வளங்களை ஜனநாயகப்படுத்துதல், பொருளாதார வளர்ச்சி மற்றும் சமூக நலம், பாதுகாப்பான மற்றும் நம்பகமான ஏஐ, அறிவியலில் ஏஐ பயன்பாடு, சமூக அதிகாரமளித்தல் மற்றும் மனிதவளம் மேம்பாடு உள்ளிட்ட 7 துறைகளில் கவனம் செலுத்தப்பட வேண்டும் என வலியுறுத்துகிறது. மத்திய தகவல் தொழில்நுட்பத் துறை அமைச்சர் அஸ்வினி வைஷ்ணவ் கூறுகையில், இந்த மாநாட்டின் போது இந்தியாவின் உட்கட்டமைப்பு துறையில் ரூ.22 லட்சம் கோடிக்கு மேற்பட்ட முதலீட்டு ஒப்பந்தங்கள் கையெழுத்தாகியுள்ளதாக தெரிவித்துள்ளார்.

சொல் புது திட்டம் – 26 தமிழ்ச் சொற்கள் இறுதி

பிப்ரவரி 21-ம் தேதி, தமிழ் வளர்ச்சிக் கழகம் சார்பில் சொல் புது திட்டத்தின் 10-வது கூட்டம் சென்னை தமிழ் வளர்ச்சி அலுவலகத்தில், அதன் தலைவர் ம. இராசேந்திரன் தலைமையில் நடைபெற்றது. இக்கூட்டத்தில் 26 ஆங்கிலச் சொற்களுக்கு இணையான தூய தமிழ்ச் சொற்கள் இறுதி செய்யப்பட்டன. இந்த கூட்டத்தில் பேராசிரியர்கள் சரவணன், ஒப்பில்லா மதிவாணன், பாரதிபாலன், கல்தூரி ராஜா, முனைவர் ம. இளங்கோவன், ஊடகவியலாளர்கள் ராஜ்கண்ணன், மு. முருகேசன் மற்றும் சமூக ஊடகவியலாளர் நீச்சல்க்காரன் கலந்து கொண்டனர். இறுதி செய்யப்பட்ட சொற்களில் எம் சாண்ட் – மாற்று மணல், போட்டோ கேலரி – படக் காட்சியகம், போட்டோ ஷூட் – ஒளிப்பட எடுப்பு, சேட்லைட் பஸ் – இணைப்புப் பேருந்து, செமி ஸ்லீப்பர் சீட் – சாய்விருக்கை, ஸ்லீப்பர் சீட் – படுக்கை இருக்கை, டிரான்ஸ்லோகேஷன் – இடப் பெயர்வு, மற்றும் வீல் சேர் ரேம்ப் – சக்கர நாற்காலிப் பாதை உள்ளிட்ட சொற்கள் அடங்கும்.

தேசியச் செய்திகள்

இந்திய தயாரிப்பு ரண ஜன்னி–தொண்டை அடைப்பான் கூட்டு தடுப்பூசி அறிமுகம்

பிப்ரவரி 21-ம் தேதி, ஹிமாசலப் பிரதேசம், கசௌலி மத்திய ஆய்வு நிறுவனம் வளாகத்தில் நடைபெற்ற நிகழ்ச்சியில், மத்திய சுகாதார மற்றும் குடும்ப நலத் துறை அமைச்சர் ஜெ.பி. நட்டா, இந்தியாவில் தயாரிக்கப்பட்ட ரண ஜன்னி (டெட்டனஸ்) மற்றும் தொண்டை அடைப்பான் (டிப்தீரியா) கூட்டு தடுப்பூசியை அறிமுகம் செய்தார். இந்த தடுப்பூசி பொது தடுப்பூசி திட்டம் (Universal Immunization Programme) கீழ் சேர்க்கப்பட்டுள்ளது. வரும் ஏப்ரல் மாதத்திற்குள் 55 லட்சம் டோஸ் தடுப்பூசிகள் வழங்கப்பட உள்ளன; பின்னர் உற்பத்தி அளவு அதிகரிக்கப்பட உள்ளது. பெருந்தொற்று காலத்தில் இந்தியாவில் தயாரிக்கப்பட்ட ரண ஜன்னி தடுப்பூசிகள் உலகளவில் 2 கோடி டோஸ்கள் விநியோகிக்கப்பட்டன. பொது தடுப்பூசி திட்டத்தின் கீழ் 11 தடுப்பூசிகள் வழங்கப்படுகின்றன; குழந்தைகள் பிறந்தது முதல் 16 வயது வரை 27 டோஸ் தடுப்பூசிகள் செலுத்தப்படுகின்றன. ஆண்டுதோறும் சுமார் 5 கோடி பேருக்கு தடுப்பூசி செலுத்தப்படுகிறது; இதில் 2.5 கோடி கர்ப்பிணிகள் மற்றும் 2.5 கோடி சிறார்கள் அடங்குவர். கர்ப்பிணிகள் ‘யு-வின் (U-WIN) தளம்’ மூலம் கண்காணிக்கப்படுகின்றனர்; இந்தியாவில் சுமார் 99% தடுப்பூசி காப்பு எட்டப்பட்டுள்ளது.

திடக்கழிவு மேலாண்மை – உச்சநீதிமன்றத்தின் புதிய விதிகள்

இந்திய உச்சநீதிமன்றம், திடக்கழிவு மேலாண்மை தொடர்பாக முழுமையான புதிய விதிகளை வெளியிட்டது. புழல் மாநகராட்சியில் சுற்றுச்சூழல் விதிமீறல் தொடர்பாக தேசிய பசுமை தீர்ப்பாயம் (NGT) வழங்கிய இரண்டு உத்தரவுகளை எதிர்த்து தாக்கல் செய்யப்பட்ட மனுவை, நீதிபதிகள் பங்குஸ் மித்தல் மற்றும் என்.வி.என். அடங்கிய அமர்வு விசாரித்தது. இந்த புதிய விதிகள் ஏப்ரல் 1 முதல் அமலுக்கு வரும் என்றும், மார்ச் 31-க்குள் உள்ளாட்சி அமைப்புகள் மற்றும் கழிவு அகற்றும் ஒப்பந்த நிறுவனங்கள் அவற்றை கடைப்பிடிக்க வேண்டும் என்றும் உத்தரவிடப்பட்டது. அனைத்து மாநிலங்களிலும் மாவட்ட ஆட்சியர்கள், மாநகராட்சிகள், நகராட்சிகள் மற்றும் கிராம பஞ்சாயத்துகள் திடக்கழிவு விதிகளை முழுமையாக அமல்படுத்துவதை கண்காணித்து, நடவடிக்கைகள் குறித்து தலைமை செயலாளருக்கு அறிக்கை சமர்ப்பிக்க வேண்டும் என அறிவுறுத்தப்பட்டது. திடக்கழிவு மேலாண்மைக்கான வாரியம் அமைத்து தகவல்களை பொதுமக்களுக்கு வெளியிட வேண்டும் என்றும் உத்தரவிடப்பட்டது. மத்திய சுற்றுச்சூழல் மற்றும் வனத்துறை அமைச்சகம், திடக்கழிவு மேலாண்மை விதிகள் குறித்த பகுதியை பள்ளி பாடத்திட்டத்தில் சேர்க்க வேண்டும் என்றும், அது உள்ளூர் மொழிகளிலும் வெளியிடப்பட வேண்டும் என்றும் கூறப்பட்டது. விதிகளை மீறுவது குற்றமாக கருதப்படும்; அபராதம் உட்பட நிர்வாக நடவடிக்கைகள் எடுக்கப்பட வேண்டும் என்றும், தொடர்ந்து மீறினால் சுற்றுச்சூழல் சட்டங்களின் கீழ் குற்றவியல் நடவடிக்கை எடுக்கப்படும் என்றும் உத்தரவிடப்பட்டது.

பிரபலமானவர்கள், விருதுகள் மற்றும் நிகழ்வுகள்

மைக்ரோசாஃப்ட் கேமிங் பிரிவின் புதிய சிஇஓ – அவுஷா ஷர்மான்

மைக்ரோசாஃப்ட் நிறுவனத்தின் கேமிங் பிரிவான எக்ஸ்பாக்ஸ் (Xbox) நிறுவனத்தின் தலைமை செயல் அதிகாரி (CEO) ஆக அவுஷா ஷர்மான் நியமிக்கப்பட்டார். இவர், கடந்த 38 ஆண்டுகளாக மைக்ரோசாஃப்ட் நிறுவனத்தில் பணியாற்றி எக்ஸ்பாக்ஸ் பிரிவை வழிநடத்திய ஃபில் ஸ்பென்சர் ஓய்வு பெற்றதைத் தொடர்ந்து பொறுப்பேற்றார். ஃபில் ஸ்பென்சர் கோடைகாலம் வரை ஆலோசகராகப் பணியாற்ற ஒப்புக்கொண்டுள்ளார். 2011-ல் மைக்ரோசாஃப்ட் நிறுவனத்தில் பணியைத் தொடங்கிய அவுஷா ஷர்மான், பின்னர் மொடான் நிறுவனத்தில் பொது மேலாளராகவும், இன்டெல்கார் நிறுவனத்தில் துணைத் தலைவர் மற்றும் தலைமை செயல் அதிகாரியாகவும் பணியாற்றினார். இவர் 2024-ல் மீண்டும் மைக்ரோசாஃப்ட் நிறுவனத்துக்குத் திரும்பி, செயற்கை நுண்ணறிவு (AI) பிரிவு தலைவராக பணியாற்றிய நிலையில், தற்போது கேமிங் பிரிவின் தலைமைப் பொறுப்பிற்கு உயர்த்தப்பட்டுள்ளார்.

தமிழ்–இந்தோ-ஐரோப்பிய அகராதி 4வது தொகுதி வெளியீடு

உலக தாய்மொழி தினமான பிப்ரவரி 21-ஆம் தேதி, தமிழக துணை முதலமைச்சர் உதயநிதி ஸ்டாலின், தமிழ் மற்றும் இந்தோ-ஐரோப்பிய மொழிகளின் ஒப்பீட்டு சொற்பிறப்பியல் அகராதி திட்டத்தின் நான்காவது தொகுதியை சென்னையில் வெளியிட்டார். இந்தத் திட்டம் தமிழ்நாடு பாடநூல் மற்றும் கல்விச் சேவைகள் கழகம் (TNTB&ESC) மற்றும் ஆக்ஸ்போர்டு பல்கலைக்கழகப் பதிப்பகம் இணைந்து செயல்படுத்தும் திட்டமாகும். ஜூலை 2022-ல் தொடங்கப்பட்ட இந்த நான்கு ஆண்டு திட்டம், மொத்தம் ₹8 கோடி செலவில் 12 தொகுதிகள் வெளியிட திட்டமிடப்பட்டுள்ளது. மார்ச் 2025-ல், முதலமைச்சர் மு.க. ஸ்டாலின் பொதுஅறிமுகத் தொகுதி மற்றும் முதல் தொகுதியை வெளியிட்டார்; இரண்டாவது மற்றும் மூன்றாவது தொகுதிகள் சென்னை சர்வதேச புத்தகக் கண்காட்சியில் ஜனவரியில் வெளியிடப்பட்டன. திட்டக் குழுவை தலைமை ஆசிரியர் கே. அரசந்திரன் வழிநடத்துகிறார். ஆங்கிலச் சொற்பிறப்பியலாளர் வால்டர் ஸ்கீட் கண்டறிந்த 461 இந்தோ-ஐரோப்பிய வேர்களில் சுமார் 300 வேர்களுக்கு தமிழுடன் தொடர்பு இருப்பதாக ஆய்வு தெரிவிக்கிறது. ஜனவரி 2025-ல், TNTB&ESC மற்றும் ஆக்ஸ்போர்டு பல்கலைக்கழகப் பதிப்பகம் இடையே 12 தொகுதிகளை வெளியிட ஒப்பந்தம் கையெழுத்தானது. நான்காவது தொகுதி 19 தமிழ் வேர்கள் மற்றும் இந்தோ-ஐரோப்பிய மொழிகளுக்கிடையிலான தொடர்புகளை பதிவுசெய்கிறது.