TNPSC தேர்வுக்கான முக்கிய தினசரி நடப்பு நிகழ்வுகள் – 17-02-2026

தமிழ்நாடு செய்திகள்

ரூ.5,980 கோடி முதலீட்டு ஒப்பந்தங்கள் – தமிழ்நாடு

முதல்வர் மு.க.ஸ்டாலின் முன்னிலையில் ஜப்பானின் என்எம்பி மினிபியா (MinebeaMitsumi துணை நிறுவனம்) மற்றும் ஏக்வஸ் குழுமம் ஆகிய நிறுவனங்களுடன் ரூ.5,980 கோடி முதலீட்டிற்கான புரிந்துணர்வு ஒப்பந்தங்கள் கையெழுத்தாகின; இதன் மூலம் 8,400 பேருக்கு வேலைவாய்ப்பு உருவாகும். 2021 முதல் தற்போது வரை 1,179 புரிந்துணர்வு ஒப்பந்தங்கள் மூலம் ரூ.12.37 லட்சம் கோடி முதலீடுகள் தமிழ்நாட்டில் ஈர்க்கப்பட்டுள்ளன. என்எம்பி மினிபியா நிறுவனம் ரூ.1,980 கோடி முதலீட்டில் திருவள்ளூர் மாவட்டம், மஹிந்திரா ஆரிஜின்ஸ் தொழிற்பூங்காவில் IGBT (Insulated-Gate Bipolar Transistor) மற்றும் IC (Integrated Circuit) உற்பத்தி நிலையத்தையும் ஆராய்ச்சி மற்றும் மேம்பாட்டு மையத்தையும் அமைக்க முன்மொழிந்து 1,400 பேருக்கு வேலைவாய்ப்பு வழங்குகிறது. அதேபோல், ஏக்வஸ் குழுமம் ரூ.4,000 கோடி முதலீட்டில் கிருஷ்ணகிரி மாவட்டம், சிப்காட் – சூளகிரி தொழிற்பூங்காவில் விண்வெளி மற்றும் பாதுகாப்புத் துறை உற்பத்தி தொகுப்பு, விமான இயந்திரம் மற்றும் கியர் பாகங்கள் உற்பத்தி ஆலை அமைத்து 7,000 பேருக்கு வேலைவாய்ப்பு உருவாக்குகிறது.

தேசியச் செய்திகள்

ரூ.80,000 கோடி கிரேட் நிக்கோபார் திட்டத்திற்கு என்ஜிடி ஒப்புதல்

அந்தமான் நிக்கோபார் தீவுகளில் செயல்படுத்தப்பட உள்ள ரூ.80,000 கோடி மதிப்பிலான கிரேட் நிக்கோபார் திட்டத்திற்கு தேசிய பசுமைத் தீர்ப்பாயம் (NGT) ஒப்புதல் வழங்கி, அதற்கு எதிராக தொடரப்பட்ட மனுக்களை தள்ளுபடி செய்தது. சுற்றுச்சூழல் ஆர்வலர் ஆஷிஷ் கோத்தாரி, இத்திட்டம் 2019ஆம் ஆண்டு தீவு கடலோர ஒழுங்குமுறை மண்டல (ICRZ) அறிவிப்பு விதிகளை மீறுவதாகவும், குறிப்பாக 700 ஹெக்டேர் தடை செய்யப்பட்ட பகுதியில் கட்டுமானம் நடைபெறுவதாகவும் குற்றம் சாட்டி மனு தாக்கல் செய்திருந்தார். என்ஜிடி தலைவர் நீதிபதி பிரகாஷ் ஸ்ரீவத்சவா தலைமையிலான ஆறு பேர் கொண்ட சிறப்பு அமர்வு திட்டத்திற்கு ஒப்புதல் வழங்கியது. இத்திட்டம் 166 சதுர கிலோமீட்டர் பரப்பளவில் (இதில் 130 சதுர கி.மீ. வனப்பகுதி அடக்கம்) செயல்படுத்தப்பட உள்ளது. திட்டத்தின் பகுதிகளாக சரக்கு பெட்டக மாற்று முனையம், ஒருங்கிணைந்த நகரம், ராணுவ மற்றும் சிவில் பயன்பாட்டிற்கான விமான நிலையம், மற்றும் 450 எம்விஏ எரிவாயு மற்றும் சூரியசக்தி மின் நிலையம் அடங்குகின்றன; சுற்றுச்சூழல் அனுமதியில் குறிப்பிடப்பட்ட நிபந்தனைகளை சம்பந்தப்பட்ட அதிகாரிகள் கடைப்பிடிக்க வேண்டும் என்று தீர்ப்பாயம் உத்தரவிட்டுள்ளது.

பிரதமர் சூர்ய இல்லம் திட்டம்

மத்திய அரசு பிரதமர் சூர்ய இல்லம்: இலவச மின்சார திட்டத்தை 2024 பிப்ரவரி 13 அன்று அறிமுகப்படுத்தியது; இத்திட்டத்தின் மூலம் வீடுகளின் கூரைகளில் சூரிய மின்தகடுகள் அமைத்து மாதம் 300 யூனிட் வரை இலவச மின்சாரம் வழங்கப்படுகிறது. ரூ.75,021 கோடி நிதி ஒதுக்கீட்டில் தொடங்கப்பட்ட இத்திட்டம் 2027 மார்ச் மாதத்திற்குள் ஒரு கோடி வீடுகளில் சோலார் அமைப்புகளை நிறுவுவதை இலக்காகக் கொண்டுள்ளது. ஒரு வீட்டிற்கு அதிகபட்சமாக ரூ.78,000 ஒருமுறை நிதியுதவி வழங்கப்படுகிறது. கடந்த இரண்டு ஆண்டுகளில் நாடு முழுவதும் 23 லட்சத்துக்கும் அதிகமான ரூஃப்டாப் சோலார் அமைப்புகள் நிறுவப்பட்டு, சுமார் 8,691 மெகாவாட் திறன் உருவாக்கப்பட்டுள்ளது; இதற்காக ரூ.16,932.4 கோடி மானியம் வழங்கப்பட்டுள்ளது. இத்திட்டத்தை பயன்படுத்தியதில் குஜராத் (5.6 லட்சம்) முதலிடத்தில், மகாராஷ்டிரா (4.5 லட்சம்) இரண்டாம் இடத்தில், உத்தரபிரதேசம் (3.7 லட்சம்) மூன்றாம் இடத்தில் உள்ளன.

சென்னை ஐஐடி – பின்லாந்து வானிலை ஆய்வு மைய ஒப்பந்தம்

சென்னை ஐஐடி மற்றும் பின்லாந்து வானிலை ஆய்வு மையம் இணைந்து ‘வாயு’ (VAYYU) என்ற மெய்நிகர் ஆராய்ச்சி மையத்தை அமைப்பதற்கான புரிந்துணர்வு ஒப்பந்தத்தில் கையெழுத்திட்டுள்ளன; இம்மையம் காற்றின் தரம், வானிலை, காலநிலை மாற்றம் தொடர்பான ஆய்வுகளை மேற்கொள்ளும். இம்மையம் ஏரோசால்–வானிலையியல் தொடர்புகள், இமயமலை வளிமண்டலம்–கிரையோஸ்பியர் இணைப்புகள், நகர்ப்புற காற்று தரம், மற்றும் பிராந்திய Hydro-Climate, இமயமலை பனி மற்றும் பனியாறு உருகுதல் மீது ஏரோசால்களின் தாக்கம் ஆகியவற்றை ஆய்வு செய்யும். இந்த ஒப்பந்தத்தில் ஆராய்ச்சி டீன் சாந்தி பவன், ஐசிஎஸ்ஆர் டீன் மனு சந்தானம், வாயு ஒருங்கிணைப்பாளர் சந்தன் சாரங்கி, மற்றும் பின்லாந்து வானிலை ஆய்வு மையத்திலிருந்து பேராசிரியர் பெட்டேரி தாஸ், பேராசிரியர் ஹன்னெல் கோர்ஹனன், டாக்டர் ராகேஷ் கே. ஹூடா ஆகியோர் கையெழுத்திட்டனர்; சென்னை ஐஐடி இயக்குநர் வி. காமகோடி இந்த முயற்சியுடன் தொடர்புடையவர்.

டெல்லி பாரத் மண்டபத்தில் ஏஐ உச்சி மாநாடு

பிரதமர் நரேந்திர மோடி, டெல்லி பாரத் மண்டபத்தில் நடைபெற்ற 5 நாள் செயற்கை நுண்ணறிவு (AI) உச்சி மாநாட்டை தொடங்கி வைத்தார். மாநாட்டில் 600-க்கும் மேற்பட்ட அரங்குகள் அமைக்கப்பட்டு, 840-க்கும் மேற்பட்ட நிறுவனங்கள் பங்கேற்றன. ஐ.நா. பொதுச்செயலாளர் அந்தோனியோ குத்தெரஸ் உட்பட 20 நாடுகளின் தலைவர்கள், 50 அமைச்சர்கள், மற்றும் உலகின் முன்னணி நிறுவனங்களைச் சேர்ந்த 50 சிஇஓக்கள் கலந்து கொண்டனர்; மேலும் 5,000-க்கும் மேற்பட்ட வெளிநாட்டு பிரதிநிதிகள் பங்கேற்றனர். வெளிநாட்டு பிரதிநிதிகளின் பணப் பரிவர்த்தனைக்காக தேசிய பணப் பரிமாற்றக் கழகம் (NPCI) சார்பில் “யுபிஐ ஒரே உலகம்” (UPI One World) சேவை அறிமுகப்படுத்தப்பட்டது; இதில் ₹25,000 வரை முதற்கட்டமாகவும், கூடுதலாக ₹25,000 வரை, மாதத்திற்கு அதிகபட்சம் ₹50,000 வரை வேலட்டில் வரவு வைத்து UPI QR குறியீடு மூலம் பரிவர்த்தனை செய்யலாம். இந்த சேவை டெல்லி சர்வதேச விமான நிலையம் மற்றும் பாரத் மண்டபம் அரங்குகள் 14 மற்றும் 16 இல் வழங்கப்படுகிறது. யுபிஐ சேவை பிரான்ஸ், ஐக்கிய அரபு அமீரகம், கத்தார், சிங்கப்பூர், நேபாளம், பூடான், மொரீஷியஸ், இலங்கை உள்ளிட்ட நாடுகளில் அறிமுகப்படுத்தப்பட்டுள்ளதுடன், சைப்ரஸ், மலேசியா உள்ளிட்ட 30-க்கும் மேற்பட்ட நாடுகள் விரைவில் அறிமுகப்படுத்த உள்ளன.

விளையாட்டுச் செய்திகள்

ராஷித் கான் – டி20 கிரிக்கெட்டில் 700 விக்கெட்கள்

ஐசிசி டி20 உலகக் கோப்பை தொடரில் ஆப்கானிஸ்தான் அணி ஐக்கிய அரபு அமீரகம் அணியை 5 விக்கெட் வித்தியாசத்தில் வீழ்த்திய ஆட்டத்தில், அணியின் கேப்டனான ராஷித் கான் ஒரு விக்கெட் கைப்பற்றி, தனது டி20 கிரிக்கெட் அரங்கில் 700வது விக்கெட்டை பதிவு செய்தார். இதன் மூலம் அனைத்து வகையான டி20 போட்டிகளில் 700 விக்கெட்களை கைப்பற்றிய முதல் வீரர் என்ற சாதனையை அவர் பெற்றார். இந்த பட்டியலில் மேற்கு இந்தியத் தீவுகளின் டுவைன் பிராவோ (631 விக்கெட்கள்) இரண்டாவது இடத்திலும், சுனில் நரைன் (613 விக்கெட்கள்) மூன்றாவது இடத்திலும் உள்ளனர்.

‘தமிழர் தடம்’ வலைதளம் மற்றும் ‘தமிழ் மனம்’ திட்டம் தொடக்கம்

தமிழக அரசு, உலகெங்கும் வாழும் அயலகத் தமிழர்கள் தொடர்பான வரலாற்றுச் செய்திகள், ஆய்வுக் கட்டுரைகள் மற்றும் குடிபெயர்வு பதிவுகளை தொகுக்கும் ‘தமிழர் தடம்’ என்ற இணையவழிக் களஞ்சியத்தை தொடங்கியுள்ளது; https://nrtamils.tn.gov.in/tamilar-thadam/ என்ற இந்த வலைதளத்தை சிறுபான்மையினர் நலன் மற்றும் வெளிநாடுவாழ் தமிழர் நலத் துறை அமைச்சர் நாசர் தலைமைச் செயலகத்தில் தொடங்கி வைத்தார். மேலும், அயலகத் தமிழர்களுக்கு தமிழ்மொழி மற்றும் கலைகளை கற்பிக்கும் வகையில் ‘தமிழ் மனம்’ திட்டத்தை தமிழக அரசு அறிமுகப்படுத்தியுள்ளது. இத்திட்டத்தின் கீழ் 8 நாடுகளில் பணியாற்ற தேர்வு செய்யப்பட்ட 10 கலை பயிற்றுநர்களுக்கு பணி நியமன ஆணைகள் வழங்கப்பட்டன; இதில் ரியூனியன், மாலத்தீவு, இந்தோனேஷியா, மலாவி, கம்போடியா ஆகிய நாடுகள் அடங்கும். நிகழ்வில் சுற்றுலா, பண்பாடு மற்றும் அறநிலையத் துறை கூடுதல் தலைமைச் செயலர் க. மணிவாசன், பொது மற்றும் மறுவாழ்வுத் துறை முதன்மைச் செயலர் ரீட்டா ஹரிஷ் தக்கர், மற்றும் அயலகத் தமிழர் நலன் மற்றும் மறுவாழ்வுத் துறை ஆணையர் மா. வள்ளலார் உள்ளிட்டோர் கலந்து கொண்டனர்.

பிரபலமானவர்கள், விருதுகள் மற்றும் நிகழ்வுகள்

கலைஞர் நினைவு கலைத்துறை வித்தகர் விருது 2024–2025

முதல்வர் மு.க. ஸ்டாலின், **2024ஆம் ஆண்டிற்கான ‘கலைஞர் நினைவு கலைத்துறை வித்தகர் விருது’**வை பழம்பெரும் நடிகை எம்.என். ராஜம் அவர்களுக்கும், 2025ஆம் ஆண்டிற்கான விருதுவை மூத்த திரைப்பட இயக்குநர் எஸ்.பி. முத்துராமன் அவர்களுக்கும் தலைமைச் செயலகத்தில் வழங்கினார். இந்த விருது 2022–2023ஆம் ஆண்டு செய்தி-மக்கள் தொடர்புத் துறை மானியக் கோரிக்கையில் அறிவிக்கப்பட்டது; இது தமிழ்த் திரைப்படத் துறையில் வாழ்நாள் சாதனையாளர்களை கௌரவிக்கும் வகையில் தமிழ்நாடு அரசு வழங்கும் விருதாகும், இதில் ரூ.10 லட்சம் ரொக்கப் பரிசு மற்றும் நினைவுப் பரிசு வழங்கப்படுகிறது. எம்.என். ராஜம், 1949ஆம் ஆண்டு குழந்தை நட்சத்திரமாக திரையுலகில் அறிமுகமாகி, 200-க்கும் மேற்பட்ட தமிழ்த் திரைப்படங்களில் நடித்துள்ளார்; அவற்றில் ‘ரத்தக்கண்ணீர்’, ‘பெண்ணின் பெருமை’, ‘புதையல்’, ‘தங்கப்பதுமை’, ‘நாடோடி மன்னன்’, ‘பாசமலர்’ உள்ளிட்டவை அடங்கும். எஸ்.பி. முத்துராமன், 1960ஆம் ஆண்டு ‘களத்தூர் கண்ணம்மா’ திரைப்படத்தில் உதவி இயக்குநராக பணியைத் தொடங்கி, 1970 முதல் 1990 வரை 70-க்கும் மேற்பட்ட தமிழ்ப் படங்களை இயக்கியுள்ளார். நிகழ்வில் செய்தித் துறை அமைச்சர் மு.பெ. சாமிநாதன், தலைமைச் செயலர் நா. முருகானந்தம், தமிழ் வளர்ச்சி மற்றும் செய்தித் துறைச் செயலர் வே. ராஜாராமன், மற்றும் செய்தி மக்கள் தொடர்புத் துறை இயக்குநர் இரா. வைத்திநாதன் ஆகியோர் கலந்து கொண்டனர்.

சர்வதேசச் செய்திகள்

பிரதமர் நரேந்திர மோடி – இஸ்ரேல் பயணம் (பிப்.25–26)

பிரதமர் நரேந்திர மோடி, பிப்ரவரி 25 மற்றும் 26 தேதிகளில் இஸ்ரேல் நாட்டுக்கு சுற்றுப்பயணம் மேற்கொள்ள உள்ளார்; இது அவரது இரண்டாவது இஸ்ரேல் பயணம் ஆகும், முன்னதாக 2017ஆம் ஆண்டு இஸ்ரேலுக்கு பயணம் மேற்கொண்ட முதல் இந்திய பிரதமராக அவர் பதிவானார். இப்பயணத்தின் போது, இஸ்ரேல் நாடாளுமன்றம் (நெசெட்) நிகழ்வில் சிறப்பு விருந்தினராக பங்கேற்று, இஸ்ரேல் பிரதமர் பெஞ்சமின் நெதன்யாகு உடன் இருதரப்பு, பிராந்திய மற்றும் உலகளாவிய விவகாரங்கள், குறிப்பாக காசா பிரச்சினை குறித்து ஆலோசனை நடத்தவுள்ளார். கடந்த ஆண்டு, சுற்றுலாத் துறை அமைச்சர் ஹைம் காட்ஸ், பொருளாதாரம் மற்றும் தொழிற்துறை அமைச்சர் நிர் பர்கத், வேளாண் மற்றும் உணவு பாதுகாப்புத் துறை அமைச்சர் அவி டிக்டர், மற்றும் நிதியமைச்சர் பெஸலேல் ஸ்மோட்ரிக் ஆகியோர் இந்தியா வந்தனர். செப்டம்பர் மாதம் இந்தியா–இஸ்ரேல் இருதரப்பு முதலீட்டு ஒப்பந்தம் கையொப்பமானது; நவம்பர் மாதம் இருநாடுகளுக்கிடையே பாதுகாப்பு ஒப்பந்தம் கையொப்பமிடப்பட்டது, மேலும் மத்திய வர்த்தகத் துறை அமைச்சர் பியூஷ் கோயல் பயணத்தின் போது இந்தியா–இஸ்ரேல் தடையற்ற வர்த்தக ஒப்பந்தம் தொடர்பான பேச்சுவார்த்தைகளைத் தொடங்க திட்ட வரையறைகள் கையொப்பமாகின. தொடர்ந்து டிசம்பர் மாதம், வெளியுறவு அமைச்சர் எஸ். ஜெய்சங்கர் இஸ்ரேல் பயணம் மேற்கொண்டு பெஞ்சமின் நெதன்யாகு, அதிபர் ஐசக் ஹெர்சாக், மற்றும் வெளியுறவு அமைச்சர் கிதியோன் சார் ஆகியோரை சந்தித்தார்.

ஸ்னாப்டீல் நிறுவனத்துக்கு ரூ.5 லட்சம் அபராதம்

மத்திய நுகர்வோர் பாதுகாப்பு ஆணையம் (CCPA), பிஐஎஸ் (Bureau of Indian Standards) விதிமுறைகள் மற்றும் பொம்மைகள் தரக் கட்டுப்பாட்டு உத்தரவு, 2020க்கு உட்படாத பொம்மைகளை விற்பனை செய்ததற்காக ஸ்னாப்டீல் இணைய வணிக நிறுவனத்துக்கு ரூ.5 லட்சம் அபராதம் விதித்துள்ளது. இந்த உத்தரவு சுயமுனைவு விசாரணை (suo motu investigation) அடிப்படையில், சிசிபிஏ தலைமை ஆணையர் நிதி கரே தலைமையில் பிறப்பிக்கப்பட்டது. விசாரணையில், உற்பத்தியாளர் பெயர், முகவரி மற்றும் பிஐஎஸ் சான்று எண் இல்லாத பொம்மைகளை ஸ்டாலியன் டிரேடிங் நிறுவனம் மற்றும் த்ரிஃப்ட்கார்ட் மூலம் விற்பனை செய்து, ஸ்னாப்டீல் ரூ.41,032 வருவாய் ஈட்டியது கண்டறியப்பட்டது. இனிமேல் பிஐஎஸ் தரத்துக்கு உட்படாத பொருட்களை பட்டியலிடவோ விளம்பரப்படுத்தவோ கூடாது என்றும், குறைதீர்ப்பு அலுவலர் விவரங்களை தெளிவாக வெளியிட வேண்டும் என்றும் சிசிபிஏ உத்தரவிட்டுள்ளது. மேலும், இந்த விவகாரம் தொடர்பாக அமேசான், ஃபிளிப்கார்ட், ஸ்டாலியன் டிரேடிங் நிறுவனம், எலக்ட்ரானிக்ஸ் பஜார் ஸ்டோர் ஆகிய நிறுவனங்களுக்கு விளக்கம் கேட்டு நோட்டீஸ் அனுப்பப்பட்டுள்ளது.

டல்லாஸ் ஓபன் 2024 – பென் ஷெல்டன் சாம்பியன்

அமெரிக்காவில் நடைபெற்ற டல்லாஸ் ஓபன் ஆடவர் டென்னிஸ் போட்டியில், பென் ஷெல்டன் (அமெரிக்கா) ஆடவர் ஒற்றையர் பிரிவில் முதலிடத்தில் இருந்த டாமி பால் (அமெரிக்கா) வீரரை 3-6, 6-3, 7-5 என்ற செட்களில் தோற்கடித்து சாம்பியன் பட்டம் வென்றார். இந்த வெற்றி அவரது முதல் இண்டோர் பட்டம் மற்றும் ஒட்டுமொத்தமாக நான்காவது ஏடிபி டூர் பட்டம் ஆகும்; அவர் 500 தரவரிசை புள்ளிகள் மற்றும் ரூ.4.80 கோடி ரொக்கப் பரிசு பெற்றார். இரட்டையர் பிரிவில் பிரான்ஸ் நாட்டின் தியோ அர்ரிபாஜ் மற்றும் அல்பேனோ ஆலிவெட்டி ஜோடி, முதலிடத்தில் இருந்த அர்ஜென்டினாவின் ஹொராசியோ ஜெபாலோஸ் மற்றும் ஸ்பெயினின் மார்செல் கிரனோலர்ஸ் இணையை 6-3, 7-6 (7/4) என்ற கணக்கில் வீழ்த்தி கோப்பை வென்று, 500 தரவரிசை புள்ளிகள் மற்றும் ரூ.1.57 கோடி பரிசுத் தொகை பெற்றனர்.

பெங்களூரில் ஆந்த்ரோபிக் ஏஐ நிறுவன அலுவலகம்

உலகின் முன்னணி செயற்கை நுண்ணறிவு (AI) தொழில்நுட்ப நிறுவனமான ஆந்த்ரோபிக், ஆசியாவில் தனது இரண்டாவது அலுவலகத்தை பெங்களூரில் தொடங்கியுள்ளது. இந்நிறுவனம் ‘Claude’ என்ற ஏஐ மென்பொருளை உருவாக்கியுள்ளது. இந்தியாவில் தனது செயல்பாட்டின் தொடக்கமாக ஏர் இந்தியா, ரிலையன்ஸ், மற்றும் CRED நிறுவனங்களுடன் ஒப்பந்தங்களில் ஈடுபட்டுள்ளது; மேலும் இந்திய மொழிகளில் ஏஐ சேவைகள் வழங்க திட்டமிட்டுள்ளது. இந்தியப் பிரிவை ரினோனா கோஷ் வழிநடத்துகிறார். இந்நிறுவனத்தின் புதிய ஏஐ கருவிகள் அறிமுகமானதன் பின்னர் தகவல் தொழில்நுட்பம் மற்றும் தொலைதொடர்பு துறைகளில் மனித உழைப்பின் தேவையைக் குறைக்கும் என்ற அச்சத்தால், ஆறு மாதம் முதல் ஒரு ஆண்டு காலத்தில் முதலீட்டாளர்களுக்கு ரூ.2 லட்சம் கோடி வரை இழப்பு ஏற்பட்டதாக தெரிவிக்கப்பட்டுள்ளது.

அறிக்கைகள் மற்றும் குறியீடுகள்

யுனெஸ்கோ – இந்தியாவின் ஏஐ தயார்நிலை மதிப்பீட்டு அறிக்கை

யுனெஸ்கோ மற்றும் IndiaAI மிஷன் இணைந்து தயாரித்த இந்தியாவிற்கான ஏஐ தயார்நிலை மதிப்பீட்டு அறிக்கை, இந்தியாவின் செயற்கை நுண்ணறிவு சூழலை சட்ட மற்றும் ஒழுங்குமுறை, சமூக மற்றும் கலாச்சார, தொழில்நுட்ப அம்சங்கள் அடிப்படையில் ஆய்வு செய்து, AI Impact Summit நிகழ்வில் வெளியிடப்பட்டது. இந்த அறிக்கை, இந்தியாவில் பல பங்குதாரர்களை உள்ளடக்கிய கலவை ஏஐ நிர்வாகக் கட்டமைப்பு மற்றும் பன்மொழி ஏஐ வளர்ச்சி வலுவாக உள்ளதை குறிப்பிட்டதுடன், தரவுகளின் தரத்தை மேம்படுத்துதல் மற்றும் ஏஐ திறன் மேம்பாட்டை விரிவுபடுத்துதல் அவசியம் என சுட்டிக்காட்டுகிறது; தற்போது திறன் மேம்பாடு பெரும்பாலும் நகர்ப்புற மையமாக உள்ளதாக குறிப்பிடுகிறது. மேலும், அதிகப்படியான விதிமுறை கட்டுப்பாடுகளை தவிர்க்கவும், மத்திய–மாநில ஒருங்கிணைப்பை மேம்படுத்தவும் பரிந்துரைக்கிறது. இவ்வறிக்கை யுனெஸ்கோவின் ஏஐ நெறிமுறைகள் தொடர்பான பரிந்துரையுடன் இணைந்ததாகும்; இதன் வெளியீட்டில் யுனெஸ்கோ இந்திய பிரதிநிதி டிம் கர்டிஸ், மின்னணு மற்றும் தகவல் தொழில்நுட்ப அமைச்சக செயலாளர் எஸ். கிருஷ்ணன், மற்றும் முதன்மை அறிவியல் ஆலோசகர் அஜய் குமார் சூட் ஆகியோர் தொடர்புடையவர்கள்.

பொருளாதாரச் செய்திகள்

ஆர்பிஐ தளர்த்தப்பட்ட வெளிநாட்டு வர்த்தகக் கடன் (ECB) விதிகள்

இந்திய ரிசர்வ் வங்கி (RBI) தளர்த்தப்பட்ட வெளிநாட்டு வர்த்தகக் கடன் (ECB) வழிகாட்டுதல்களை வெளியிட்டுள்ளது; இதன் மூலம் தகுதியுள்ள குடியுரிமை நிறுவனங்கள் சந்தை சார்ந்த விகிதங்களில் அதிக கடன் வரம்புடன் நிதி திரட்டவும், ECB-யின் நாணயத்தை மாற்றவும், அதை கடன் அல்லாத பத்திரமாக மாற்றவும் முடியும். மறுசீரமைப்புத் திட்டம் அல்லது Corporate Insolvency Resolution Process (CIRP) கீழ் உள்ள கடனாளிகளும் இந்த வழியில் நிதி திரட்ட அனுமதிக்கப்பட்டுள்ளனர். ஒரு தகுதியுள்ள கடனாளி அதிகபட்சமாக $1 பில்லியன் வரை ECB திரட்டலாம் அல்லது அவரது மொத்த நிலுவைக் கடன், கடைசி தணிக்கை செய்யப்பட்ட இருப்புநிலைக் குறிப்பின்படி, அவரது நிகர மதிப்பின் 300 சதவீதம் வரை இருக்கலாம். சந்தை நிலவரங்களுக்கு ஏற்ப கடன் செலவில் உச்சவரம்பு இல்லை; இருப்பினும் சராசரி முதிர்வுக் காலம் மூன்று ஆண்டுகளுக்கும் குறைவாக இருந்தால், வர்த்தகக் கடனுக்கான செலவு உச்சவரம்பை பின்பற்ற வேண்டும்; குறைந்தபட்ச சராசரி முதிர்வுக் காலம் (MAMP) மூன்று ஆண்டுகள் ஆகும். ECB-கள் அசையா, அசையும், நிதி மற்றும் புலனாகாத சொத்துக்கள் மீது பொறுப்பு உருவாக்கி பாதுகாக்கப்படலாம்; மேலும் உத்தரவாதங்கள் Foreign Exchange Management (Guarantees) Regulations, 2026 விதிகளின் கீழ் வழங்கப்படலாம். விசாரணை அல்லது தீர்ப்பு நிலுவையில் உள்ள கடனாளிகளையும் தகுதியுள்ளவர்களின் பட்டியலில் ஆர்பிஐ சேர்த்துள்ளது; அவர்கள் தேவையான தகவல்களை வெளிப்படுத்தி ECB திரட்டலாம், மேலும் IFSC-இல் அமைக்கப்பட்ட நிதி நிறுவனங்கள் உள்ளிட்ட அங்கீகரிக்கப்பட்ட அயல் நிறுவனங்களிடமிருந்து கடன் பெறலாம்.

ஹேமர் ஏவுகணை உற்பத்திக்கு பிஇஎல்–சஃப்ரான் கூட்டு முயற்சி

பாரத் எலக்ட்ரானிக்ஸ் லிமிடெட் (BEL) மற்றும் சஃப்ரான் எலக்ட்ரானிக்ஸ் அண்டு டிஃபென்ஸ் (SED) இணைந்து, ரஃபேல் போன்ற போர் விமானங்களில் பொருத்தப்படும் ஹேமர் ஏவுகணைகளை உற்பத்தி செய்ய 50:50 பங்கு விகிதத்தில் கூட்டு முயற்சி (JV) நிறுவனம் ஒன்றை அமைக்க முடிவு செய்துள்ளன; இந்நிறுவனம் புனேவில் அமைக்கப்பட உள்ளது. இந்த நிறுவனம் ஆரம்பத்தில் ₹1,00,000 அங்கீகரிக்கப்பட்ட பங்கு மூலதனத்துடன், தலா ₹100 மதிப்புள்ள 1,000 ஈக்விட்டி பங்குகளுடன் பதிவு செய்யப்படும்; தேவைக்கேற்ப இது ₹10 கோடி வரை உயர்த்தப்படலாம். இந்த புரிந்துணர்வு ஒப்பந்தம், பிரான்ஸ் அதிபர் இம்மானுவேல் மக்ரோன் இந்தியாவுக்கு மேற்கொள்ளும் மூன்று நாள் அதிகாரப்பூர்வ பயணத்தின் போது கையெழுத்தாகும் என எதிர்பார்க்கப்படுகிறது. இவ்வொப்பந்தம் ஆறாவது இந்தியா–பிரான்ஸ் வருடாந்திர பாதுகாப்பு கலந்துரையாடலில், பாதுகாப்பு அமைச்சர் ராஜ்நாத் சிங் மற்றும் பிரான்ஸ் ஆயுதப் படைகள் மற்றும் படைவீரர் விவகாரங்களுக்கான அமைச்சர் கேத்தரின் வாட்ரின் தலைமையில் பெங்களூருவில் கையெழுத்திடப்படும். உள்நாட்டில் தயாரிக்கப்படும் ஹேமர் ஏவுகணைகள் இந்திய கடற்படையில் பயன்படுத்தப்படும் கடல்சார் போர் விமானங்களிலும் பொருத்தப்படும்.

தமிழ்நாட்டின் முதல் பவளப்பாறை காட்சியகம் – அரியமான், ராமநாதபுரம்

தமிழ்நாடு வனத்துறை, மாநிலத்தின் முதல் பவளப்பாறை காட்சியகத்தை (Corallarium) ராமநாதபுரம் மாவட்டம் அரியமான் கிராமத்தில் அமைக்க ₹92 லட்சம் மதிப்பீட்டில் திட்டமிட்டுள்ளது; இதற்கான டெண்டர் பிப்ரவரி 12 அன்று கோரப்பட்டது. இந்தத் திட்டம் மன்னார் வளைகுடா கடல்சார் தேசியப் பூங்காவின் வனவிலங்குப் பிரிவு மூலம் செயல்படுத்தப்படுவதுடன், கடல் பல்லுயிர் விளக்க மையமாக செயல்படும். ராமேஸ்வரம் கடல்சார் சுற்றுலா மேம்பாட்டை நோக்கமாகக் கொண்ட இந்தக் காட்சியகம், பாம்பன் பாலம் அருகில் 2,420 சதுர அடி பரப்பளவில் அமைக்கப்படவுள்ளது; இதில் கோமாளி மீன், கடல் குதிரை, சிங்க மீன் உள்ளிட்ட உள்ளூர் இனங்களைக் கொண்ட நேரடி கடல் மீன்வளம் மற்றும் நெறிமுறைப்படி பெறப்பட்ட பவளப்பாறை மாதிரிகள் காட்சிப்படுத்தப்படும். கட்டிடம் உயர் அலைக் கோட்டிலிருந்து 270 மீட்டர் நிலப்பகுதியில், கடலோர ஒழுங்குமுறை மண்டலத்தின் (CRZ) வளர்ச்சி இல்லாத மண்டலத்திற்கு வெளியே அமைக்கப்படும்; ஆமைக்கு உகந்த விளக்குகள், உப்பு-எதிர்ப்புப் பொருட்கள், இரட்டைக் கூரை அமைப்பு மற்றும் பாரம்பரிய ஆத்தங்குடி ஓடுகள் பயன்படுத்தப்படுகின்றன. திட்டம் ஒப்படைப்பு செய்யப்பட்ட நாளிலிருந்து 180 நாட்களில் நிறைவு செய்யப்படும் என தெரிவிக்கப்பட்டுள்ளது.

இந்தியா ஏஐ தாக்க உச்சிமாநாடு 2026 – யுபிஐ ஒன் வேர்ல்டு சேவை நீட்டிப்பு

இந்திய தேசிய கொடுப்பனவு கழகம் (NPCI), பிப்ரவரி 16 முதல் 20, 2026 வரை புது தில்லியில் நடைபெறும் இந்தியா ஏஐ தாக்க உச்சிமாநாடு 2026 நிகழ்வில் பங்கேற்கும் 40-க்கும் மேற்பட்ட நாடுகளைச் சேர்ந்த சர்வதேசப் பார்வையாளர்களுக்காக, ‘யுபிஐ ஒன் வேர்ல்டு’ வாலட் சேவையை நீட்டித்துள்ளது. இந்த முன்னோட்ட முயற்சியின் மூலம், இந்தியாவிற்கு வருகை தரும் வெளிநாட்டு பயணிகள் நிகழ்நேர நபர்-க்கு-வணிகர் (P2M) யுபிஐ பரிவர்த்தனைகளை மேற்கொள்ள முடியும்.

ஜனவரி 2026 – வேலையின்மை விகிதம் 5% ஆக உயர்வு

அரசு வெளியிட்ட சமீபத்திய காலமுறை தொழிலாளர் சக்தி கணக்கெடுப்பு (Periodic Labour Force Survey - PLFS) அறிக்கையின் படி, நாட்டில் 15 வயது மற்றும் அதற்கு மேற்பட்டவர்களிடையே வேலையின்மை விகிதம் டிசம்பர் 2025-ல் 4.8% இருந்த நிலையில், ஜனவரி 2026-ல் 5% ஆக உயர்ந்துள்ளது. ஜனவரி மாதத்தில் கிராமப்புற மற்றும் நகர்ப்புற பகுதிகளிலும் வேலையின்மை விகிதம் சிறிய அளவில் அதிகரித்துள்ளது. மேலும், தொழிலாளர் சக்தி பங்கேற்பு விகிதம் (LFPR) மற்றும் தொழிலாளர் மக்கள்தொகை விகிதம் (WPR) ஆகியவை கிராமப்புறம் மற்றும் நகர்ப்புறம் ஆகிய இரண்டிலும் குறைந்துள்ளன என்று அறிக்கை குறிப்பிடுகிறது.