TNPSC தேர்வுக்கான முக்கிய தினசரி நடப்பு நிகழ்வுகள் - 28-08-2026

சர்வதேசச் செய்திகள்

இந்தியா–வியத்நாம் கடலோரக் காவல் படைகளின் கூட்டுப் பயிற்சி

இந்தியக் கடலோரக் காவல் படை மற்றும் வியத்நாம் கடலோரக் காவல் படை இணைந்து நடத்திய ‘ஸஹ்யோக் ஹாப்-டாக்’ (Sahyog HOP-TAC) கூட்டுப் பயிற்சி சென்னை கடற்கரைக்கு அப்பால் 2026 ஆகஸ்ட் 27 அன்று நிறைவடைந்தது. வியத்நாம் கடலோரக் காவல் படையின் CSB 8002 கப்பல், அப்படையின் துணைத் தளபதி மேஜர் ஜெனரல் லூவாங் டின் ஹங் தலைமையிலான 6 பேர் கொண்ட குழுவுடன், 2026 ஆகஸ்ட் 24 அன்று சென்னைக்கு வந்தது. இக்குழுவினர் இந்தியக் கடலோரக் காவல் படையின் கிழக்கு பிராந்தியத் தளபதி ஐஜி யோகிந்தர் தாக்கூரை சந்தித்து கடல்சார் ஒத்துழைப்பு மற்றும் செயல்பாட்டு ஒருங்கிணைப்பு குறித்து ஆலோசித்தனர். இக்கூட்டுப் பயிற்சியில் இந்தியக் கடலோரக் காவல் படையின் 8 கப்பல்கள் மற்றும் 6 விமானங்கள், வியத்நாமின் CSB 8002 கப்பலுடன் இணைந்து பங்கேற்றன. கடலில் அவசரகால நடவடிக்கைகள், தேடுதல் மற்றும் மீட்புப் பணிகள், கடல்சார் சட்ட அமலாக்கம் மற்றும் கடல் மாசுபாட்டைக் கட்டுப்படுத்துதல் ஆகியவை பயிற்சியின் முக்கிய அம்சங்களாக இருந்தன. இப்பயிற்சி இந்தியா–வியத்நாம் கடல்சார் ஒத்துழைப்பையும், இந்தோ–பசிபிக் பிராந்திய கடல்சார் பாதுகாப்பு மற்றும் நிலைத்தன்மைக்கான ஒருங்கிணைப்பையும் வலுப்படுத்தியது.

LAC தொடர்பாக இந்தியா–சீனா 25-வது சிறப்புப் பிரதிநிதிகள் பேச்சுவார்த்தை

இந்தியா–சீனா எல்லைப் பிரச்சினை தொடர்பான 25-வது சுற்று சிறப்புப் பிரதிநிதிகள் பேச்சுவார்த்தை பெய்ஜிங்கில் நடைபெற்றது. இதில் இந்தியாவின் தேசிய பாதுகாப்பு ஆலோசகர் அஜித் தோவல் மற்றும் சீனாவின் வெளியுறவுத்துறை அமைச்சர் வாங் யீ பங்கேற்றனர். பேச்சுவார்த்தைக்குப் பின்னர் வெளியிடப்பட்ட எட்டு அம்ச முடிவு ஆவணத்தில், எல்லைக் கட்டுப்பாட்டுக் கோடு (LAC) குறித்த இருதரப்பினரின் மாறுபட்ட புரிதல்கள் மேற்கு மற்றும் கிழக்கு எல்லைப் பகுதிகளில் நிலவும் பதற்றங்களுக்கு முக்கிய காரணியாக குறிப்பிடப்பட்டன. சிறந்த எல்லை மேலாண்மைக்காக பொருத்தமான பகுதிகளில் LAC குறித்த புரிதலை மேம்படுத்த இரு நாடுகளும் ஒப்புக்கொண்டன. எல்லையில் ஏற்படும் சூழ்நிலைகளை ராஜதந்திர மற்றும் இராணுவ வழிமுறைகள், குறிப்பாக ஆலோசனை மற்றும் ஒருங்கிணைப்புக்கான பணிக்குழு (WMCC) மற்றும் உள்ளூர் தளபதி மட்டத்திலான சந்திப்புகள் மூலம் விரைந்து கையாள முடிவு செய்யப்பட்டது. எல்லை வரையறை தொடர்பான நிபுணர் குழு, எல்லை வரையறையில் “ஆரம்ப மற்றும் கணிசமான முன்னேற்றத்தை” ஏற்படுத்துவதற்கான பேச்சுவார்த்தைகளை முன்னெடுக்கும். 1996-ஆம் ஆண்டு நம்பிக்கையை வளர்க்கும் நடவடிக்கைகள் தொடர்பான ஒப்பந்தம் மற்றும் 2015-ஆம் ஆண்டு பிரதமர் நரேந்திர மோடியின் LAC தெளிவுபடுத்தும் செயல்முறையை மீண்டும் தொடங்குவதற்கான முன்மொழிவு ஆகியவையும் பேச்சுவார்த்தையில் குறிப்பிடப்பட்டன. 2020 ஏப்ரல் முதல் கிழக்கு லடாக் மற்றும் அருணாச்சலப் பிரதேசம் உள்ளிட்ட கிழக்குப் பிராந்தியங்களில் LAC நிலைப்பாடு தொடர்பான வேறுபாடுகளைத் தீர்ப்பது குறித்தும் ஆலோசிக்கப்பட்டது.

தமிழ்நாடு செய்திகள்

முஸ்லிம் மாணவிகளின் உயர்கல்விக் கட்டணத்தை அரசே ஏற்கும் திட்டம்

தமிழ்நாடு சிறுபான்மையினர் நலத்துறை அமைச்சர் ஏ.எம். ஷாஜஹான் சட்டப்பேரவையில் அறிவித்ததன்படி, அரசு மற்றும் அரசு உதவி பெறும் பள்ளிகளில் 9, 10-ஆம் வகுப்பு பயிலும் முஸ்லிம் மாணவிகளுக்கு ஆண்டுக்கு ரூ.2,000 கல்வி உதவித்தொகை வழங்கப்படும். அரசு, அரசு உதவி பெறும் மற்றும் தனியார் கல்லூரிகளில் அரசு ஒதுக்கீட்டின் கீழ் இளநிலைப் படிப்புகளில் சேரும் முஸ்லிம் மாணவிகளின் கல்விக் கட்டணத்தை அரசே வழங்கும் புதிய திட்டம் செயல்படுத்தப்பட்டுள்ளது. சிறுபான்மையினர் அதிகம் வசிக்கும் 10 மாவட்டங்களில் மாவட்ட சிறுபான்மையினர் நல அலுவலர் பணியிடங்கள் ரூ.4.45 கோடி செலவில் புதிதாக உருவாக்கப்படும். முஸ்லிம் மற்றும் கிறிஸ்தவ வழிபாட்டுத் தலங்களின் சொத்துகளைப் பாதுகாத்தல் மற்றும் மேம்படுத்துதல், கட்டிடங்கள் கட்டுதல் ஆகியவற்றுக்காக வட்டியில்லாக் கடன் திட்டம் செயல்படுத்தப்பட்டு, இதற்காக ரூ.100 கோடி சுழல் நிதி ஒதுக்கப்படும். தமிழ்நாடு வக்பு வாரியத்திற்கான மானியம் ரூ.5 கோடியாக உயர்த்தப்படும் என்றும், வாரியத்தின் புதிய தலைமை அலுவலகக் கட்டிடம் ரூ.40 கோடி செலவில் கட்டப்படும் என்றும் அறிவிக்கப்பட்டுள்ளது.

பழங்குடியின மற்றும் ஆதிதிராவிடர் நலத் திட்டங்கள்

தமிழ்நாடு சமூக நீதித்துறை அமைச்சர் வன்னி அரசு தலைமையில் ஆதிதிராவிடர் மற்றும் பழங்குடியின மக்களின் நலன் மற்றும் மேம்பாட்டிற்கான பல்வேறு திட்டங்கள் அறிவிக்கப்பட்டன. பழங்குடியின மக்கள் உற்பத்தி செய்யும் பொருள்களுக்கு புவிசார் குறியீடு (GI Tag) பெற நடவடிக்கை எடுக்கப்படும். ஆதிதிராவிடர் மற்றும் பழங்குடியின பள்ளி விடுதி மாணவர்களுக்கான மாத உணவுக் கட்டணம் ரூ.1,400-இல் இருந்து ரூ.1,800-ஆகவும், கல்லூரி விடுதி மாணவர்களுக்கான உணவுக் கட்டணம் ரூ.1,500-இல் இருந்து ரூ.2,000-ஆகவும் உயர்த்தப்படும். ரூ.160 கோடி செலவில் 150 சமூக நீதி விடுதிகள் கட்டப்படும் மற்றும் ஆதிதிராவிடர்கள் அதிகம் வசிக்கும் பகுதிகளில் 100 சமுதாயக் கூடங்கள் அமைக்கப்படும். நலப் பள்ளிகள் மற்றும் விடுதிகளில் சிறப்பாகப் பணியாற்றுவோருக்கு ‘அறிவொளி ஆசிரியர்’ மற்றும் ‘அறிவொளி காப்பாளர்’ விருதுகள் வழங்கப்படும். கோவையில் வணிக மையமும், சென்னை நந்தனத்தில் பழங்குடியின பண்பாட்டு மையமும் அமைக்கப்படும். விடுதிகளில் ‘அம்பேத்கர் படிப்பகம்’ ஏற்படுத்தப்படுவதுடன், சமூக நீதி நல வாரியம் அமைக்கப்படும். ‘அகம்’ திட்டத்தின் கீழ் தூய்மைப் பணியாளர்களுக்கு 2,500 கான்கிரீட் வீடுகள் வழங்கப்படும்; வீடற்ற ஆதிதிராவிடர் குடும்பங்களுக்காக ‘இனிய இல்லம்’ குடியிருப்புத் திட்டமும், மனைகள் வழங்க ‘சமத்துவ வீட்டுமனைத் திட்டமும் செயல்படுத்தப்படும். பழங்குடியினருக்கான சிறப்பு கல்வி உதவித் திட்டம் செயல்படுத்தப்பட்டு, ஆதிதிராவிடர் மற்றும் பழங்குடியின பள்ளிகளில் 100 வகுப்பறைகள் மற்றும் கழிப்பறைகள் கட்டப்படும். தனியார் நிறுவனங்களில் வேலைவாய்ப்பு வழங்க ‘சரிநிகர்–சம வேலைவாய்ப்புத் திட்டமும்’, இளைஞர்களுக்கு திறன் பயிற்சி மற்றும் வேலைவாய்ப்பை வழங்க ‘வெற்றிப்படி’ திட்டமும் அறிமுகப்படுத்தப்படும். ‘சூரிய ஆற்றல்’ திட்டத்தின் மூலம் பழங்குடியின பெண்களுக்கு சோலார் அடுப்புகள் மற்றும் பிற வசதிகள் வழங்கப்படும்; பழங்குடியின மொழிகள் தொடர்பான சான்றிதழ் வகுப்புகள் மற்றும் இளைஞர்களுக்கான கலைப் பட்டறைகள் நடத்தப்படும்.

29 சமூகநீதி பள்ளி விடுதிகள் கல்லூரி விடுதிகளாக தரம் உயர்வு

பிற்படுத்தப்பட்டோர் மற்றும் மிகவும் பிற்படுத்தப்பட்டோர் நலத்துறை அமைச்சர் வே. சம்பத் குமார் அறிவித்ததன்படி, தமிழகம் முழுவதும் 29 சமூகநீதி பள்ளி விடுதிகள் கல்லூரி விடுதிகளாக தரம் உயர்த்தப்படும். பெரம்பலூர், கள்ளக்குறிச்சி, சென்னை, செங்கல்பட்டு உள்ளிட்ட 14 இடங்களில் வாடகைக் கட்டிடங்களில் இயங்கும் 14 சமூகநீதி கல்லூரி மாணவர் மற்றும் மாணவியர் விடுதிகளுக்கு சொந்தக் கட்டிடங்கள் கட்டப்படும். 960 சமூகநீதி விடுதிகளுக்கு இன்வெர்ட்டர், ஃபிரிட்ஜ் மற்றும் தண்ணீர் சுத்திகரிப்பு கருவிகள் ரூ.25.76 கோடி செலவில் வழங்கப்படும். 517 சமூகநீதி விடுதிகளில் தங்கிப் பயிலும் 28,000 மாணவிகளுக்கு தற்காப்புக் கலைப் பயிற்சிக்கான சீருடைகள் மற்றும் பயிற்சிப் பொருள்கள் ரூ.2.52 கோடி செலவில் வழங்கப்படும். சென்னையில் 100 மாணவிகள் தங்கும் வசதியுடன் புதிய சமூகநீதி கல்லூரி மாணவியர் விடுதி ரூ.54 லட்சம் செலவில் தொடங்கப்படும். மிகவும் பிற்படுத்தப்பட்டோர் சமூகப் பொருளாதார மேம்பாட்டிற்காக ரூ.3 கோடி செலவில் மிகவும் பிற்படுத்தப்பட்டோர் நல வாரியம் அமைக்கப்படும். மதுரை, தேனி மற்றும் திண்டுக்கல் மாவட்டங்களில் உள்ள கள்ளர் சீரமைப்பு உயர்நிலை மற்றும் மேல்நிலைப் பள்ளிகளில் ‘சூப்பர் கிளீன், சூப்பர் கேம்பஸ்’ திட்டம் செயல்படுத்தப்படும்.

நிலவரி வசூல் முறை ரத்து

தமிழ்நாடு அரசு, 1793-ல் தொடங்கிய நிலவரி வசூல் முறையை, நில வருவாய் நிர்வாகத்தை எளிமைப்படுத்தும் நோக்கில் ஜூலை 1, 2026 முதல், 1436-ஆம் பசலி ஆண்டு முதல் ரத்து செய்துள்ளது. வருவாய்த் துறை அமைச்சர் கே.ஏ.செங்கோட்டையன், 2026 ஆகஸ்ட் 18 அன்று தமிழ்நாடு சட்டப்பேரவையில் இதனை அறிவித்தார்; வருவாய்த் துறை செயலர் கே.எஸ்.பழனிசாமி இதற்கான விளக்கத்தை அளித்தார். வரலாற்றில் ஷெர்ஷா சூரி நில அளவை அடிப்படையிலான நில நிர்வாக முறையைத் தொடங்கினார்; அக்பர் மொகலாயர் ஆட்சிக் காலத்தில் இதனை வட இந்தியா முழுவதும் விரிவுபடுத்தினார்; கார்ன்வாலிஸ் பிரபு 1793-ல் நிரந்தர நிலவரித் திட்டத்தை அறிமுகப்படுத்தினார்; சர் தாமஸ் மன்ரோ 1820-ல் மெட்ராஸ் மாகாணத்தில் ரயத்துவாரி முறையை அறிமுகப்படுத்தி சாகுபடியாளர்களிடமிருந்து நேரடியாக வரி வசூலிக்கும் முறையைக் கொண்டுவந்தார். நிலவரி என்பது ஒவ்வொரு பசலி ஆண்டிற்கும் (ஜூலை 1 முதல் ஜூன் 30 வரை) அரசுக்கு செலுத்தப்படும் வரியாகும். 2009–10 நிலவரி சீர்திருத்தக் குழுவின் பரிந்துரைப்படி, 2010-ல் புஞ்சை நிலத்திற்கு ஹெக்டேருக்கு ₹5, நஞ்சை நிலத்திற்கு ஹெக்டேருக்கு ₹12 என நிலவரி நிர்ணயிக்கப்பட்டது. நிலவரியுடன் தலைமேல் வரி, பசலி ஜாஸ்தி, தீர்வை ஜாஸ்தி, கூடுதல் தண்ணீர் வரி மற்றும் பாசன மேம்பாட்டு வரி உள்ளிட்ட வரிகளும் ரத்து செய்யப்பட்டுள்ளன.

ரூ.160 கோடியில் 150 புதிய சமூகநீதி விடுதிகள்

சமூக நீதித்துறை அமைச்சர் வன்னியரசு, தமிழ்நாடு சட்டப்பேரவையில் சமூக நீதித்துறை மானியக் கோரிக்கையின்போது 67 புதிய அறிவிப்புகளை வெளியிட்டார். சமூகநீதி பள்ளி விடுதி மாணவர்களுக்கான மாத உணவுக் கட்டணம் ரூ.1,400-ல் இருந்து ரூ.1,800-ஆகவும், கல்லூரி விடுதி மாணவர்களுக்கான உணவுக் கட்டணம் ரூ.1,500-ல் இருந்து ரூ.2,000-ஆகவும் உயர்த்தப்படும். ஆண்டு பராமரிப்புத் தொகை பள்ளி விடுதிகளுக்கு ரூ.75,000-ஆகவும், கல்லூரி விடுதிகளுக்கு ரூ.1 லட்சமாகவும் உயர்த்தப்படும். ரூ.160 கோடி மதிப்பீட்டில் 150 புதிய சமூகநீதி விடுதிகள் கட்டப்படும். விடுதி நிர்வாகம் மற்றும் மாணவர் பாதுகாப்பைக் கண்காணிக்க ‘அரண் – விடுதி பராமரிப்பு மேலாண்மை அமைப்பு’ உருவாக்கப்படும். அனைத்து விடுதிகளிலும் ‘அம்பேத்கர் படிப்பகம்’ அமைக்கப்படும். பொருளாதாரத்தில் பின்தங்கிய ஒரு லட்சம் ஆதிதிராவிடர் மற்றும் பழங்குடியின குடும்பத் தலைவிகளின் வாழ்வாதாரத்தை மேம்படுத்த ‘விடிவெள்ளி – மகளிர் வாழ்வாதாரத் திட்டம்’ செயல்படுத்தப்படும். ‘அகம்’ திட்டத்தின் மூலம் தூய்மைப் பணியாளர்களுக்கு 2,500 கான்கிரீட் வீடுகள் வழங்கப்படும்; வீடற்ற பழங்குடியினருக்கு ‘உறையுள்’ திட்டத்தின் மூலம் 2,000 கான்கிரீட் வீடுகள் கட்டப்படும்; மேலும் தகுதியான 5,000 ஆதிதிராவிடர் குடும்பங்களுக்கு கான்கிரீட் வீடுகள் கட்டித் தரப்படும். தூய்மைப் பணியாளர்களின் குடும்பத்தினரை தொழில்முனைவோராக மாற்ற ‘ஏற்றம்’ திட்டம் ரூ.50 கோடி மதிப்பீட்டில் அறிமுகப்படுத்தப்படும். 10,000 ஆதிதிராவிடர் மற்றும் பழங்குடியின இளைஞர்களுக்கு செயற்கை நுண்ணறிவு (AI) தொழில்நுட்பப் பயிற்சி வழங்கப்படும். ‘வளமிகு வேளாண்மை உதவித் திட்டத்தின்’ கீழ் 1,000 ஆதிதிராவிடர் விவசாயிகளுக்கு 90 சதவீத மானியத்தில் மின் இணைப்புகள் வழங்கப்படும். பழங்குடியின மக்களின் விளைபொருட்களை ‘முல்லை’ என்ற தனி அடையாளத்துடன் சந்தைப்படுத்துவதற்கான மதிப்புக்கூட்டல் அலகுகள் ரூ.12.50 கோடி செலவில் அமைக்கப்படும். சிறப்பாகப் பணியாற்றும் ஆசிரியர்கள் மற்றும் காப்பாளர்களுக்கு ‘அறிவொளி விருதுகள்’ வழங்கப்படும்.

பட்டியலின மற்றும் பழங்குடியின விடுதி மாணவர்களுக்கு உணவுப் படி உயர்வு

தமிழ்நாடு சமூகநீதித் துறை அமைச்சர் வன்னி அரசு, சட்டப்பேரவையில் அறிவித்ததன்படி, பட்டியலின (SC) மற்றும் பழங்குடியின (ST) பள்ளி விடுதி மாணவர்களுக்கான மாதாந்திர உணவுப் படி ரூ.1,400-லிருந்து ரூ.1,800-ஆகவும், கல்லூரி விடுதி மாணவர்களுக்கான உணவுப் படி ரூ.1,500-லிருந்து ரூ.2,000-ஆகவும் உயர்த்தப்படும். இதற்காக தமிழ்நாடு அரசு ரூ.200 கோடி நிதி ஒதுக்கியுள்ளது. SC/ST பள்ளி விடுதிகளுக்கான ஆண்டு பராமரிப்புத் தொகை ரூ.50,000-லிருந்து ரூ.75,000-ஆகவும், SC/ST கல்லூரி விடுதிகளுக்கான ஆண்டு பராமரிப்புத் தொகை ரூ.50,000-லிருந்து ரூ.1 லட்சமாகவும் உயர்த்தப்படும்.

தாம்பரம்–செங்கல்பட்டு உயர்த்தப்பட்ட சாலைத் திட்டம்

தமிழ்நாடு பொதுப்பணித்துறை அமைச்சர் ஆதவ் அர்ஜுனா அறிவித்ததன்படி, திருவள்ளூர், செங்கல்பட்டு மற்றும் மாமல்லபுரத்தை சென்னையுடன் இணைக்கும் சாலைகள் மற்றும் தாம்பரம்–செங்கல்பட்டு உயர்த்தப்பட்ட மேம்பாலச் சாலைத் திட்டம் தொடர்பாக விரிவான திட்ட அறிக்கை (DPR) தயாரிக்கப்படும். மேலும் சென்னை–கன்னியாகுமரி இடையே 8 வழிச்சாலை அமைக்கும் திட்டத்திற்கும் DPR தயாரிக்க அதிகாரிகளுக்கு உத்தரவிடப்பட்டுள்ளது. இத்திட்டங்களில் சென்னை–கன்னியாகுமரி, தாம்பரம்–செங்கல்பட்டு, திருவள்ளூர்–சென்னை மற்றும் மாமல்லபுரம்–சென்னை ஆகிய முக்கியச் சாலை வழித்தடங்கள் அடங்குகின்றன.

தமிழகத்தில் 3 புதிய யானை வழித்தடங்கள் அறிவிப்பு

தமிழக அரசு, யானைகள் பாதுகாப்பு மற்றும் மனித–வனவிலங்கு மோதலைக் குறைக்கும் நோக்கில், ஓசூர் வனக் கோட்டத்தின் காவிரி வட பகுதி வனவிலங்கு சரணாலயத்தில் 3 புதிய யானை வழித்தடங்களை அறிவித்துள்ளது. சென்னை உயர்நீதிமன்றத்தின் இடைக்கால உத்தரவின்படி, பாலக்காட்டு கணவாயை எல்லையாகக் கொண்ட இரண்டு நிலப்பரப்புகளில் யானை வழித்தடங்களைக் கண்டறிய 2 குழுக்கள் அமைக்கப்பட்டன. இக்குழுக்கள் ஜவளகிரி–உல்பண்டா–தகட்டி வழித்தடம் (18.50 கி.மீ.), ஜவளகிரி–பனை–அஞ்செட்டி வழித்தடம் (20.90 கி.மீ.), பிலிக்கல்–ஜவளகிரி வழித்தடம் (2.20 கி.மீ.) ஆகிய 3 வழித்தடங்களை அடையாளம் கண்டன. இவ்வழித்தடங்கள் தமிழ்நாடு–கர்நாடகா மாநிலங்களுக்கு இடையேயான எல்லைப் பகுதியில் யானைகளின் இடம்பெயர்வுக்கு முக்கிய இணைப்பாகச் செயல்படுகின்றன. பருவமழை மாற்றங்கள் மற்றும் வாழ்விடத் தேவைகளுக்கு ஏற்ப யானைகள் மாநில எல்லையைக் கடந்து இடம்பெயர்கின்றன. முதன்மை தலைமை வனப் பாதுகாவலர் (PCCF) மற்றும் முதன்மை வனவிலங்கு காப்பாளர் அளித்த பரிந்துரைகளின் அடிப்படையில், தமிழக அரசு இந்த 3 யானை வழித்தடங்களை அதிகாரப்பூர்வமாக அறிவித்துள்ளது.

தேசியச் செய்திகள்

பிஷ்கெக்கில் எஸ்சிஓ உச்சி மாநாடு

பிரதமர் நரேந்திர மோடி, கிர்கிஸ்தான் தலைநகர் பிஷ்கெக்கில் ஆகஸ்ட் 31 மற்றும் செப்டம்பர் 1, 2026 ஆகிய தேதிகளில் நடைபெறும் ஷாங்காய் ஒத்துழைப்பு அமைப்பு (SCO) உச்சி மாநாட்டில் பங்கேற்கிறார். இதற்கு முன்னதாக உஸ்பெகிஸ்தான் தலைநகர் தாஷ்கண்டிற்கு சென்று அந்நாட்டு அதிபர் ஷவ்கத் மிர்சியோயேவை சந்தித்து, வர்த்தகம், முதலீடு, பாதுகாப்பு, டிஜிட்டல் தொழில்நுட்பம், எரிசக்தி மற்றும் கல்வி ஆகிய துறைகளில் இருதரப்பு ஒத்துழைப்பு குறித்து ஆலோசனை நடத்துகிறார். SCO அமைப்பில் சீனா, ரஷ்யா, கஜகஸ்தான், கிர்கிஸ்தான், தஜிகிஸ்தான், உஸ்பெகிஸ்தான், இந்தியா, பாகிஸ்தான், ஈரான் மற்றும் பெலாரஸ் ஆகிய 10 நாடுகள் உறுப்பினர்களாக உள்ளன. ரஷ்ய அதிபர் விளாடிமிர் புதின், சீன அதிபர் ஜி ஜின்பிங், பாகிஸ்தான் பிரதமர் ஷெபாஸ் ஷெரீப் மற்றும் ஈரான் அதிபர் மசூத் பெசஷ்கியான் உள்ளிட்டோர் மாநாட்டில் பங்கேற்கின்றனர். பிரதமர் நரேந்திர மோடி 2025-ஆம் ஆண்டு சீனாவின் தியான்ஜின் நகரில் நடைபெற்ற SCO உச்சி மாநாட்டிலும் பங்கேற்று விளாடிமிர் புதின் மற்றும் ஜி ஜின்பிங் ஆகியோருடன் பேச்சுவார்த்தை நடத்தினார். 2026 செப்டம்பர் 12 மற்றும் 13 ஆகிய தேதிகளில் புதுதில்லியில் BRICS உச்சி மாநாடு நடைபெற உள்ளது.

பிரபலமானவர்கள், விருதுகள் மற்றும் நிகழ்வுகள்

உயிர்ம வேளாண்மைக்கான ‘நம்மாழ்வார்’ விருது

தமிழ்நாடு அரசு, உயிர்ம வேளாண்மையை ஊக்குவிக்கும் வகையில் சிறந்து விளங்கும் விவசாயிகளுக்கு ஆண்டுதோறும் ‘நம்மாழ்வார் விருது’ வழங்கி வருகிறது. 2025–26 ஆம் ஆண்டிற்கான விருது நாமக்கல் மாவட்டத்தைச் சேர்ந்த செ.நல்லசிவம், புதுக்கோட்டை மாவட்டத்தைச் சேர்ந்த அ.சுப்பிரமணியன், செங்கல்பட்டு மாவட்டத்தைச் சேர்ந்த சாதனா ஆகிய மூன்று விவசாயிகளுக்கு வழங்கப்பட்டது. ஒவ்வொருவருக்கும் பதக்கம் மற்றும் ரூ.2 லட்சம் ரொக்கப் பரிசு வழங்கப்பட்டது. செ.நல்லசிவம் கடந்த 4 ஆண்டுகளுக்கும் மேலாக உயிர்ம வேளாண்மை முறையில் சோளம், கரும்பு, மா, தென்னை மற்றும் காய்கறிகள் சாகுபடி செய்து வருவதுடன், 2,000-க்கும் மேற்பட்ட விவசாயிகளுக்கு பயிற்சி அளித்துள்ளார். அ.சுப்பிரமணியன் கடந்த 10 ஆண்டுகளாக உயிர்ம வேளாண்மை முறையில் நெல், நிலக்கடலை, குறுமிளகு, தென்னை மற்றும் வால்நட் சாகுபடி செய்து வருவதுடன், 675 விவசாயிகளுக்கு மதிப்பு கூட்டுதல் குறித்து விழிப்புணர்வு ஏற்படுத்தியுள்ளார். சாதனா கடந்த 11 ஆண்டுகளாக உயிர்ம வேளாண்மை முறையில் கம்பு, கேழ்வரகு, உளுந்து, நிலக்கடலை, பச்சைப்பயிறு, வாழை, தென்னை, மா, பலா மற்றும் கீரை வகைகள் சாகுபடி செய்து வருவதுடன், 470-க்கும் மேற்பட்ட விவசாயிகளுக்கு பயிற்சி அளித்துள்ளார்.