TNPSC தேர்வுக்கான முக்கிய தினசரி நடப்பு நிகழ்வுகள் - 24-08-2026

தமிழ்நாடு செய்திகள்

தமிழகத்தின் 2-வது யூதக் கல்வெட்டு

கிருஷ்ணகிரி மாவட்டம் போச்சம்பள்ளி அருகேயுள்ள ஆனந்தூரில் கண்டெடுக்கப்பட்டுள்ளது. 13-ஆம் நூற்றாண்டைச் சேர்ந்த இக்கல்வெட்டு தான்தோன்றீஸ்வரர் கோயில் பகுதியில் கண்டறியப்பட்டது. சூதகர், மண்டல வணிகர், தென்னிலங்கை வளஞ்சியர், எழுநூற்றுவர் ஆகிய நான்கு வணிகக் குழுக்கள் இணைந்து கோயிலில் மண்டபம் கட்டிய செய்தியை இக்கல்வெட்டு பதிவு செய்கிறது. இதில் குறிப்பிடப்படும் ‘சூதகர்’ என்பது யூதர்களைக் குறிக்கிறது. இதற்கு முன்பு ராமநாதபுரம் மாவட்டம் பெரியபட்டணம் அருகேயுள்ள வாலாந்தரவை பகுதியில் 13-ஆம் நூற்றாண்டைச் சேர்ந்த யூதக் கல்வெட்டு கண்டறியப்பட்டது; அது ‘ஐநூற்றுவன் பெரும்பள்ளி’ என்ற யூதப் பள்ளிக்கு வழங்கப்பட்ட தானத்தைப் பதிவு செய்துள்ளது. ஆனந்தூர் கல்வெட்டு, யூத வணிகர்கள் வணிகக் குழுக்களில் இணைந்து தமிழகத்தின் உள்பகுதிகளில் வணிகம் மேற்கொண்டதற்கான வரலாற்றுச் சான்றாக அமைந்துள்ளது. இக்கண்டுபிடிப்பு கிருஷ்ணகிரி மாவட்ட அரசு அருங்காட்சியகம், வரலாற்று ஆய்வு மற்றும் ஆவணப்படுத்துதல் சங்கம், தமிழ்நாடு தொன்மையியல் ஆய்வு நிறுவனம் ஆகியவற்றின் ஆய்வு மற்றும் ஆவணப்படுத்தல் பணிகளின் மூலம் பதிவு செய்யப்பட்டது.

தமிழக பழங்குடியினருக்கான தனி நலத்துறை

தமிழ்நாடு பழங்குடி மக்கள் சங்கத்தின் 10-வது மாநில மாநாடு, செங்கல்பட்டு மாவட்டம் பையனூரில் நடைபெற்றது. இம்மாநாட்டில் தமிழகத்தில் பழங்குடியினருக்கு தனி நலத்துறை அமைத்தல், கர்நாடக மாநிலத்தைப் போன்று பழங்குடியினருக்கு சத்துணவு தொகுப்பு வழங்குதல், மலைப்பகுதி பெண்களுக்கு இலவசப் பேருந்துப் பயணம் வழங்குதல், வன உரிமைச் சட்டத்தின் கீழ் அடிப்படை வசதிகளுக்காக வன நில வகை மாற்றத்தை மறுக்காமல் செயல்படுத்துதல் உள்ளிட்ட தீர்மானங்கள் நிறைவேற்றப்பட்டன. மேலும் மலைப்பகுதிகளில் பட்டா வழங்குவதற்கான தடைகளை மறுபரிசீலனை செய்தல் மற்றும் பழங்குடியினருக்கு சாதிச் சான்றிதழ்கள் எளிதாகக் கிடைக்க நடவடிக்கை எடுத்தல் ஆகியவை வலியுறுத்தப்பட்டன. சமூக நீதி துறை அமைச்சர் வன்னியரசு மற்றும் இந்திய கம்யூனிஸ்ட் கட்சியின் மாநிலச் செயலாளர் மு. வீரபாண்டியன் ஆகியோர் மாநாட்டில் பங்கேற்றனர்.

புற்றுநோயாளிகளுக்கு இலவச இயற்கை முடி விக் வழங்கும் திட்டம்

டாடா மெமோரியல் சென்டர் (TMC) மற்றும் செரியன் ஃபவுண்டேஷன் இணைந்து பொருளாதார ரீதியாக பின்தங்கிய புற்றுநோயாளிகளுக்கு இலவசமாக இயற்கையான மனித முடியால் தயாரிக்கப்பட்ட உயர்தர விக்குகளை வழங்குவதற்காக புரிந்துணர்வு ஒப்பந்தம் (MoU) மேற்கொண்டுள்ளன. இக்கூட்டாண்மையின் கீழ், மும்பையில் உள்ள டாடா மெமோரியல் மருத்துவமனை, டாடா மெமோரியல் சென்டர் குழுமம் முழுவதற்கும் விக்குகளைப் பெறுதல், ஒருங்கிணைத்தல் மற்றும் விநியோகித்தல் ஆகியவற்றுக்கான ஒருங்கிணைப்பு முகமையாக செயல்படும். செரியன் ஃபவுண்டேஷன் தனது முதன்மைத் திட்டமான ‘கிஃப்ட் ஹேர் – கிஃப்ட் கான்ஃபிடன்ஸ் (GHGC)’ மூலம் ₹1.5 கோடி மதிப்பிலான 500 இயற்கையான மனித முடியால் தயாரிக்கப்பட்ட விக்குகளை டாடா மெமோரியல் சென்டருக்கு நன்கொடையாக வழங்குகிறது. புற்றுநோய் சிகிச்சையின்போது ஏற்படும் முடி உதிர்வு மற்றும் முடி இழப்பு போன்ற பாதிப்புகளைக் குறைக்க நோயாளிகளுக்கு ஆதரவளிப்பது இத்திட்டத்தின் முக்கிய நோக்கமாகும்.

தேசியச் செய்திகள்

131-ஆவது அரசியலமைப்புத் திருத்த மசோதா 2026

ஏப்ரலில் நாடாளுமன்றத்தில் அறிமுகப்படுத்தப்பட்டது. இதன் மூலம் தொகுதி மறுசீரமைப்பை மேற்கொண்டு மக்களவை, மாநில சட்டப்பேரவைகள் மற்றும் யூனியன் பிரதேச சட்டப்பேரவைகளில் பெண்களுக்கு 33% இடஒதுக்கீடு வழங்கவும், மக்களவைத் தொகுதிகளின் அதிகபட்ச எண்ணிக்கையை 850 ஆக உயர்த்தவும் முன்மொழியப்பட்டது. இம்மசோதாவை நிறைவேற்ற மக்களவையில் மூன்றில் இரண்டு பங்கு பெரும்பான்மை தேவைப்பட்ட நிலையில், தேவையான ஆதரவு கிடைக்கவில்லை. ஆந்திரப் பிரதேசத்தைத் தவிர தென்மாநிலங்கள் இம்முன்மொழிவுக்கு எதிர்ப்பு தெரிவித்தன; மக்கள் தொகையைக் கட்டுப்படுத்திய மாநிலங்களின் மக்களவைப் பிரதிநிதித்துவம் பாதிக்கப்படலாம் என்ற அச்சம் இதற்குக் காரணமாக இருந்தது. 2026 நாடாளுமன்ற மழைக்காலக் கூட்டத்தொடர் ஜூலை 20 முதல் ஆகஸ்ட் 13 வரை நடைபெற்றது. ஆகஸ்ட் 13 அன்று மக்களவையும் மாநிலங்களவையும் தேதி குறிப்பிடாமல் ஒத்திவைக்கப்பட்டன. வழக்கமாக, அவைகள் தேதி குறிப்பிடாமல் ஒத்திவைக்கப்பட்ட பின்னர் சில நாள்களுக்குள், மத்திய அரசின் பரிந்துரையின் பேரில் குடியரசுத் தலைவர் நாடாளுமன்றக் கூட்டத்தொடரை முறைப்படி முடித்துவைப்பார். இம்மசோதாவை சில திருத்தங்களுடன் மீண்டும் கொண்டுவரும் முயற்சியில், அனைத்து மாநிலங்களிலும் மக்களவைத் தொகுதிகளை 50% அதிகரிக்கும் அம்சம் சேர்க்கப்படலாம் எனத் தகவல்கள் வெளியாகியுள்ளன. 2029 மக்களவைத் தேர்தலுக்கு முன்பு பெண்களுக்கு 33% இடஒதுக்கீட்டை நடைமுறைப்படுத்துவது இதன் முக்கிய நோக்கமாகக் கூறப்படுகிறது.

கிரேட்டர் மாலி இணைப்புத் திட்டம் (GMCP)

திலமாலி பாலத் திட்டம் என்றும் அழைக்கப்படுகிறது. இது மாலத்தீவின் மிகப்பெரிய உள்கட்டமைப்புத் திட்டமாகும். இத்திட்டத்தின் கீழ் மாலி நகரை வில்லிங்கிலி, குல்ஹிஃபாலு, திலாஃபுஷி ஆகிய தீவுகளுடன் இணைக்கும் வகையில் கடலுக்கு குறுக்கே 6.74 கி.மீ. நீளமுள்ள பாலம் மற்றும் சாலை அமைக்கப்படுகிறது. இத்திட்டத்திற்கு இந்தியா 400 மில்லியன் அமெரிக்க டாலர் கடனும், அமெரிக்கா 100 மில்லியன் அமெரிக்க டாலர் நிதியுதவியும் வழங்குகின்றன. இத்திட்டத்திற்கான ஒப்பந்தம் 2021-ஆம் ஆண்டு இந்திய நிறுவனமான அஃப்கான்ஸ் உள்கட்டமைப்பு நிறுவனம் (Afcons Infrastructure) உடன் மேற்கொள்ளப்பட்டது. தற்போது 75%-க்கும் அதிகமான பணிகள் நிறைவடைந்துள்ளன. மாலி–வில்லிங்கிலி இணைப்புப் பாலத்தின் கடைசிப் பகுதி வெற்றிகரமாக பொருத்தப்பட்டுள்ளது.

சத்தீஸ்கர் நக்சல் இல்லாத மாநிலமாக அறிவிப்பு

சத்தீஸ்கரில் நக்சலிசம் 1980-களில் வேரூன்றத் தொடங்கியது; 1967-ஆம் ஆண்டு மேற்கு வங்கத்தில் நக்சல் இயக்கம் தொடங்கியது. பஸ்தார் மண்டலம் நக்சல் நடவடிக்கைகளின் முக்கிய மையமாகவும், குறிப்பாக 2004–2014 காலகட்டத்தில் மாவோயிஸ்டுகளின் முக்கியத் தளமாகவும் இருந்தது. பஸ்தார் மண்டலத்தின் பஸ்தார், பீஜாப்பூர், தந்தேவாடா, சுக்மா, நாராயண்பூர், காங்கேர் மற்றும் கொண்டகாவ் ஆகிய 7 மாவட்டங்கள் நக்சல் பாதிப்புக்குள்ளான பகுதிகளாக இருந்தன. சத்தீஸ்கர் மத்தியப் பிரதேசம், மகாராஷ்டிரம், உத்தரப் பிரதேசம், ஜார்க்கண்ட், ஒடிசா, தெலங்கானா மற்றும் ஆந்திரப் பிரதேசம் ஆகிய 7 மாநிலங்களுடன் எல்லையைப் பகிர்கிறது. 2014-க்குப் பிறகு, மத்திய அரசு நக்சல் பாதிப்பு பகுதிகளில் பாதுகாப்பை வலுப்படுத்தி, சுமார் 5 முதல் 10 கி.மீ. இடைவெளியில் சிஆர்பிஎஃப் மையங்களை அமைத்தது. 2024 முதல் 2026 நடுப்பகுதி வரை மேற்கொள்ளப்பட்ட தீவிர பாதுகாப்பு நடவடிக்கைகளின் விளைவாக நக்சல்கள் பெருமளவில் சரணடைந்தனர்; 2024–25-ஆம் ஆண்டில் பஸ்தார் பகுதியில் 454 நக்சல்கள் சரணடைந்தனர். 2026 மார்ச் மாதத்திற்குள் சத்தீஸ்கர் நக்சல் இல்லாத மாநிலமாக அறிவிக்கப்பட்டது. சரணடைந்த நக்சல்களுக்கு ₹1 லட்சம் முதல் ₹45 லட்சம் வரை நிதியுதவி, மேலும் விவசாயம், சுயதொழில், கல்வி மற்றும் தொழிற்பயிற்சி சார்ந்த மறுவாழ்வு உதவிகள் வழங்கப்பட்டன. நக்சல் நடவடிக்கைகள் குறைந்ததைத் தொடர்ந்து பஸ்தார் பகுதியில் சாலை, போக்குவரத்து, மின்சாரம், குடிநீர், சுகாதாரம், தொலைத்தொடர்பு, வங்கி, ரேஷன் கடைகள், சுற்றுலா மற்றும் கல்வி உள்ளிட்ட அடிப்படை வசதிகள் மேம்படுத்தப்பட்டுள்ளன.

பிரபலமானவர்கள், விருதுகள் மற்றும் நிகழ்வுகள்

பஞ்சாப்பில் தீஜ் திருவிழா கொண்டாட்டம்

பஞ்சாப் மாநிலத்தில் பருவமழைக் காலத்தை வரவேற்கும் பாரம்பரியத் திருவிழாவான ‘தீஜ்’ கொண்டாடப்பட்டது. பஞ்சாப் முதல்வர் பகவந்த் மான் அவர்களின் மனைவி குர்ப்ரீத் கவுர் விழாவில் பங்கேற்றார்

முக்கிய தினங்கள்

தேசிய விண்வெளி தினம் ஆண்டுதோறும் ஆகஸ்ட் 23 அன்று அனுசரிக்கப்படுகிறது

2023 ஆகஸ்ட் 23 அன்று சந்திரயான்-3 விண்கலம் நிலவின் தென் துருவப் பகுதியில் வெற்றிகரமாக தரையிறங்கியதை நினைவுகூரும் வகையில் இத்தினம் கடைப்பிடிக்கப்படுகிறது. இதன் மூலம் நிலவின் தென் துருவப் பகுதியில் முதன்முதலில் தரையிறங்கிய நாடு இந்தியா என்ற சாதனையைப் பெற்றது. தேசிய விண்வெளி தினத்தை முன்னிட்டு பிரதமர் நரேந்திர மோடி, விண்வெளித் துறையைச் சேர்ந்த 20 ஸ்டார்ட் அப் நிறுவனங்களின் தலைமைச் செயல் அதிகாரிகளுடன் கலந்துரையாடினார். இந்திய விண்வெளித் துறை தனியார் பங்களிப்புக்கு திறக்கப்பட்டுள்ள நிலையில், ராக்கெட் ஏவுதல், விண்வெளியில் மருந்து உற்பத்தி, விண்வெளிக் குப்பை மேலாண்மை மற்றும் வேளாண்மையில் விண்வெளித் தொழில்நுட்பப் பயன்பாடு உள்ளிட்ட துறைகளில் ஸ்டார்ட் அப் நிறுவனங்கள் செயல்பட்டு வருகின்றன. ஸ்கைரூட் ஏரோஸ்பேஸ் நிறுவனத்தின் தலைமைச் செயல் அதிகாரி பவன் குமார் சந்தனா ஆவார். செரண்டிபிட்டி ஸ்பேஸ் நிறுவனத்தின் தலைமைச் செயல் அதிகாரி அந்தரீஷ் பரிச்சா ஆவார்; இந்நிறுவனம் விண்வெளியில் குறைந்த ஈர்ப்பு விசையைப் பயன்படுத்தி மருந்துகளை உற்பத்தி செய்வதற்கான திட்டங்களை மேற்கொண்டு வருகிறது.