TNPSC தேர்வுக்கான முக்கிய தினசரி நடப்பு நிகழ்வுகள் – 12-07-2026

முக்கிய தினங்கள்

மலாலா தினம் – ஜூலை 12

மலாலா தினம் ஆண்டுதோறும் ஜூலை 12 அன்று பெண்கள் கல்வி மற்றும் குழந்தைகளின் கல்வி உரிமைக்காக பாடுபட்ட மலாலா யூசஃப்சாய் அவர்களின் பங்களிப்பை நினைவுகூரும் வகையில் கடைபிடிக்கப்படுகிறது. ஐக்கிய நாடுகள் சபை (UN) 2013 ஆம் ஆண்டு ஜூலை 12-ஐ மலாலா தினமாக அறிவித்தது. மலாலா யூசஃப்சாய், நோபல் அமைதிப் பரிசு பெற்ற இளம் வயதுடைய நபர் என்ற பெருமையை பெற்றுள்ளார்.

விளையாட்டுச் செய்திகள்

2026 ஐசிசி ஹால் ஆஃப் ஃபேமில் கங்குலி, அஞ்சும் சோப்ரா, கெவின் பீட்டர்சன் இணைப்பு

சௌரவ் கங்குலி, அஞ்சும் சோப்ரா, மற்றும் கெவின் பீட்டர்சன் ஆகியோர் ICC Hall of Fame – Class of 2026 பட்டியலில் எடின்பரோ நகரில் நடைபெற்ற விழாவில் இணைக்கப்பட்டனர். இதன்மூலம் ICC Hall of Fame உறுப்பினர்களின் மொத்த எண்ணிக்கை 125 ஆக உயர்ந்தது. முன்னாள் இந்திய ஆடவர் அணியின் கேப்டன் சௌரவ் கங்குலி, இந்திய அணியை 2003 ஐசிசி கிரிக்கெட் உலகக் கோப்பை இறுதிப்போட்டிக்கும், 2002 ஐசிசி சாம்பியன்ஸ் டிராபி கூட்டுச் சாம்பியன் பட்டத்துக்கும் வழிநடத்தினார். அவர் 113 டெஸ்ட் போட்டிகளில் 7,212 ரன்களும், 311 ஒருநாள் போட்டிகளில் 11,363 ரன்களும் எடுத்துள்ளார். முன்னாள் இந்திய மகளிர் அணியின் கேப்டன் அஞ்சும் சோப்ரா, 2026 Hall of Fame பட்டியலில் இடம்பெற்ற ஒரே பெண் வீராங்கனையாக இருந்ததுடன், 1,000 ஒருநாள் ரன்கள் கடந்த முதல் இந்திய பெண் வீராங்கனை மற்றும் 100 ஒருநாள் போட்டிகளில் விளையாடிய முதல் இந்திய பெண் வீராங்கனை என்ற சாதனைகளைப் பெற்றார். அவர் 2002ஆம் ஆண்டு தென்னாப்பிரிக்காவில் இந்திய அணியை வெளிநாட்டு டெஸ்ட் வெற்றிக்கு வழிநடத்தி, 2,856 ஒருநாள் ரன்கள் எடுத்துள்ளார். முன்னாள் இங்கிலாந்து அணியின் கேப்டன் கெவின் பீட்டர்சன், 2005 ஆஷஸ் தொடரில் இங்கிலாந்தின் வெற்றியில் முக்கிய பங்காற்றியதுடன், 2010 ஐசிசி ஆடவர் டி20 உலகக் கோப்பையில் தொடர்நாயகன் (Player of the Tournament) விருதைப் பெற்றார். அவர் 104 டெஸ்ட் போட்டிகளில் 8,181 ரன்கள், 136 ஒருநாள் போட்டிகளில் 4,440 ரன்கள், மற்றும் 37 டி20 சர்வதேச போட்டிகளில் 1,176 ரன்கள் எடுத்துள்ளார்.

ICC Hall of Fame-இல் இடம்பெற்ற இந்திய கிரிக்கெட் வீரர்கள் (ஆண்டு வாரியாக)

1. சுனில் கவாஸ்கர் – 2009

2. பிஷன் சிங் பேடி – 2009

3. கபில் தேவ் – 2010

4. அனில் கும்ப்ளே – 2015

5. ராகுல் டிராவிட் – 2018

6. சச்சின் டெண்டுல்கர் – 2019

7. வினூ மங்கட் – 2021

8. டயானா எடுல்ஜி – 2023

9. வீரேந்தர் சேவாக் – 2023

10. நீத்து டேவிட் – 2024

11. எம். எஸ். தோனி – 2025

12. சௌரவ் கங்குலி – 2026

13. அஞ்சும் சோப்ரா – 2026

லார்ட்ஸ் கவுரவப் பலகையில் இடம்பிடித்த முதல் பெண்மணி கிராந்தி கவுட்

இந்தியாவின் கிராந்தி கவுட், லண்டன் லார்ட்ஸ் மைதானத்தில் நடைபெற்ற இங்கிலாந்துக்கு எதிரான மகளிர் டெஸ்ட் போட்டியில் 17 ஓவர்களில் 37 ரன்கள் மட்டுமே விட்டுக்கொடுத்து 5 விக்கெட்டுகள் வீழ்த்தி, லார்ட்ஸ் கவுரவப் பலகையில் (Honours Board) இடம்பெற்ற முதல் பெண்மணி என்ற பெருமையை பெற்றார். 22 வயதான வேகப்பந்து வீச்சாளரான அவர், இங்கிலாந்து அணியை 170 ரன்களுக்கு சுருட்டி, 285 ரன்கள் எடுத்திருந்த இந்திய அணிக்கு 115 ரன்கள் முதல் இன்னிங்ஸ் முன்னிலை பெற உதவினார். இந்தச் சாதனையின் மூலம், டெஸ்ட் இன்னிங்ஸில் 5 அல்லது அதற்கு மேற்பட்ட விக்கெட்டுகள் எடுத்த வீரர்களின் பட்டியலில் இடம்பெறும் லார்ட்ஸ் வெளிநாட்டு அணி ஓய்வறை கவுரவப் பலகையில், பகவத் சந்திரசேகர், பிஷன் சிங் பேடி, கபில் தேவ் ஆகிய இந்திய ஆடவர் கிரிக்கெட் வீரர்களுடன் இணைந்தார். மேலும், இது லார்ட்ஸில் நடைபெற்ற முதல் மகளிர் டெஸ்ட் போட்டி ஆகும். இந்தப் போட்டி, அங்கு ஆடவர் டெஸ்ட் கிரிக்கெட் தொடங்கி 142 ஆண்டுகள் கடந்த பின்னரும், இங்கிலாந்து–ஆஸ்திரேலியா அணிகள் மோதிய முதல் முக்கிய மகளிர் சர்வதேசப் போட்டி நடைபெற்ற 50 ஆண்டுகளுக்குப் பிறகும் நடைபெற்ற முக்கிய மைல்கல்லாகும்.

விம்பிள்டன் பட்டத்தை வென்ற லிண்டா நோஸ்கோவா

செக் குடியரசைச் சேர்ந்த லிண்டா நோஸ்கோவா, லண்டனில் நடைபெற்ற விம்பிள்டன் மகளிர் ஒற்றையர் இறுதிப்போட்டியில் சகநாட்டு வீராங்கனையான கரோலினா முச்சோவாவை 6-2, 5-7, 6-3 என்ற செட் கணக்கில் வீழ்த்தி தனது முதல் கிராண்ட் ஸ்லாம் பட்டத்தை வென்றார். 21 வயதான நோஸ்கோவா, மார்கெட்டா வோண்ட்ரூசோவா (2023) மற்றும் பார்போரா க்ரெஜ்சிகோவா (2024) ஆகியோருக்குப் பிறகு, நான்கு ஆண்டுகளில் விம்பிள்டன் பட்டத்தை வென்ற மூன்றாவது செக் பெண்வீராங்கனை என்ற பெருமையை பெற்றார். 2011 மற்றும் 2014-ஆம் ஆண்டுகளில் விம்பிள்டன் பட்டம் வென்ற பெட்ரா கிவிட்டோவா மற்றும் ஆல் இங்கிலாந்து கிளப்பில் ஒன்பது ஒற்றையர் விம்பிள்டன் பட்டங்கள் வென்ற சாதனையாளர் மார்டினா நவ்ரதிலோவா இறுதிப்போட்டியை நேரில் பார்வையிட்டனர். வேல்ஸ் இளவரசி கேட், வீனஸ் ரோஸ்வாட்டர் டிஷ் கோப்பையை லிண்டா நோஸ்கோவாவுக்கு வழங்கினார்.

உலக தடகள போட்டியில் அனிமேஷ் குஜூர் சாதனை

ஜெர்மனியின் வெட்ஸ்லார் நகரில் நடைபெற்ற உலக தடகள காண்டினெண்டல் டூர் சாலஞ்சர்ஸ் போட்டியில், இந்தியாவின் அனிமேஷ் குஜூர், 100 மீட்டர் ஓட்டத்தில் 10.14 விநாடிகளில் இலக்கை எட்டி 2-ஆம் இடம் பெற்றார். இந்தச் சாதனையின் மூலம், வெளிநாட்டு மண்ணில் 100 மீட்டர் ஓட்டத்தை மிக விரைவாக கடந்த இந்திய வீரர் என்ற பெருமையை 23 வயதான அனிமேஷ் குஜூர் பெற்றார். மேலும், 10.14 விநாடிகள் என்பது அவரது சிறந்த தனிப்பட்ட செயல்திறன் (Personal Best) ஆகும். இதற்கு முன், இதே தொடரின் தகுதிச் சுற்றில் அவர் 10.19 விநாடிகளில் ஓடி இருந்த நிலையில், தற்போது தனது நேரத்தை மேலும் மேம்படுத்தியுள்ளார்.

டைமண்ட் லீக்கில் சர்வேஷ் குஷாரே வரலாற்றுச் சாதனை

மோனாக்கோவில் நடைபெற்ற டைமண்ட் லீக் தடகளப் போட்டியில், இந்தியாவின் சர்வேஷ் குஷாரே, ஆடவருக்கான உயரம் தாண்டுதல் போட்டியில் 2.26 மீட்டர் உயரம் தாண்டி 3-ஆம் இடம் பெற்றார். டைமண்ட் லீக் தொடரில் இந்திய உயரம் தாண்டுதல் வீரர் ஒருவர் முதன்முறையாக பதக்க மேடையில் இடம்பிடித்தது இதுவே முதல் முறையாகும். மேலும், நீரஜ் சோப்ரா, முரளி ஸ்ரீசங்கர், விகாஸ் கவுடா ஆகியோருக்குப் பிறகு டைமண்ட் லீக் தொடரில் முதல் மூன்று இடங்களுக்குள் நிறைவு செய்த 4-வது இந்திய வீரர் என்ற பெருமையை சர்வேஷ் குஷாரே பெற்றார். உக்ரைனின் ஒலே டொரோஷ்சுக் 2.32 மீட்டர் உயரம் தாண்டி முதலிடத்தையும், கிரேட் பிரிட்டனின் ஜாக் கிமானி 2.30 மீட்டர் உயரம் தாண்டி இரண்டாம் இடத்தையும் பெற்றனர்.

தேசியச் செய்திகள்

இந்தியாவில் முதன்முறையாக கண்டறியப்பட்ட PaBV-4 பறவை வைரஸ்

அசாம் கால்நடை மற்றும் மீன்வளப் பல்கலைக்கழகத்தின் பங்கஜ் தேகா மற்றும் சங்கீதா தாஸ் தலைமையிலான ஆய்வுக் குழு, இந்தியாவில் முதன்முறையாக பேரட் போர்னாவைரஸ்-4 (PaBV-4) வைரஸைக் கண்டறிந்து அதன் மரபணுவை வகைப்படுத்தியுள்ளது. Scientific Reports இதழில் வெளியிடப்பட்ட இந்த ஆய்வில், 2020–2024 காலத்தில் அசாம், கர்நாடகா மற்றும் மேற்கு வங்காளம் ஆகிய மாநிலங்களில் உள்ள பறவைக்கூடங்களில் வளர்க்கப்பட்ட 13 இனங்களைச் சேர்ந்த 83 சிட்டாசின் (Psittacine) பறவைகள் ஆய்வு செய்யப்பட்டன. Orthobornavirus alphapsittaciforme இனத்தைச் சேர்ந்த PaBV-4 வைரஸ், பறவைகளின் செரிமான மற்றும் நரம்பு மண்டலங்களைப் பாதிக்கும் புரோவென்ட்ரிகுலர் டைலேஷன் நோய் (PDD) ஏற்படுத்துகிறது. பரிசோதிக்கப்பட்ட 83 பறவைகளில் 44 பறவைகளுக்கு தொற்று உறுதி செய்யப்பட்டது. இதில் இறந்த பறவைகளில் சுமார் 88% மற்றும் வெளிப்படையான அறிகுறிகள் இல்லாத ஆரோக்கியமாகத் தோன்றிய பறவைகளில் 19% தொற்று கண்டறியப்பட்டது. மரபணு பகுப்பாய்வில், அனைத்து தொற்று மாதிரிகளும் PaBV-4 வகையைச் சேர்ந்தவை என்றும், இந்த வகை முன்னதாக கனடா, இஸ்ரேல், ஜப்பான், தென் கொரியா மற்றும் அமெரிக்கா ஆகிய நாடுகளில் பதிவாகியிருந்தது என்றும் உறுதி செய்யப்பட்டது. இந்தக் கண்டுபிடிப்பு சிட்டாசின் பறவைகளின் பாதுகாப்பு மற்றும் கூண்டுப் பறவை இனப்பெருக்கம் தொடர்பான ஆபத்துகளை எடுத்துக்காட்டுகிறது.

சிறப்பு தீவிர திருத்தம் (SIR) – வரைவு வாக்காளர் பட்டியல் வெளியீடு

இந்திய தேர்தல் ஆணையம் (ECI), சிறப்பு தீவிர திருத்தம் (Special Intensive Revision – SIR) திட்டத்தின் ஒரு பகுதியாக ஒடிசா, மணிப்பூர், மிசோரம், சிக்கிம் மற்றும் தாத்ரா மற்றும் நகர் ஹவேலி, டாமன் மற்றும் டையூ யூனியன் பிரதேசத்திற்கான வரைவு வாக்காளர் பட்டியலை வெளியிட்டது. 3.72 கோடி வாக்காளர்களில் இருந்து 23,82,014 பெயர்கள் (6.39%) நீக்கப்பட்டுள்ளன. தாத்ரா மற்றும் நகர் ஹவேலி, டாமன் மற்றும் டையூ பகுதியில் 30% என்ற அதிகபட்ச நீக்க விகிதம் பதிவாகியுள்ளது; மிசோரம் மாநிலத்தில் 5.2% என்ற குறைந்தபட்ச நீக்க விகிதம் பதிவாகியுள்ளது. ஒடிசா மாநிலத்தில் 20.12 லட்சம் பெயர்கள் நீக்கப்பட்டதால், அதிகபட்ச எண்ணிக்கையிலான நீக்கங்கள் அங்கு பதிவாகின. நிரந்தர இடம்பெயர்வு, வாக்காளர் மரணம், ஒன்றுக்கும் மேற்பட்ட இடங்களில் பதிவு செய்தல் மற்றும் கண்டறிய முடியாத வாக்காளர்கள் ஆகியவை முக்கிய காரணங்களாகக் குறிப்பிடப்பட்டுள்ளன. வரைவு பட்டியல் தொடர்பாக ஒரு மாத காலம் கோரிக்கைகள் மற்றும் ஆட்சேபனைகள் அளிக்கலாம்; இறுதி வாக்காளர் பட்டியல் செப்டம்பர் 11 அன்று வெளியிடப்படும்.

ஹிந்துஸ்தான் காப்பர் நிறுவனத்தின் தலைவர் மற்றும் மேலாண்மை இயக்குநராக அனுபம மிஸ்ரா

அனுபம மிஸ்ரா, ஹிந்துஸ்தான் காப்பர் லிமிடெட் (HCL) நிறுவனத்தின் தலைவர் மற்றும் மேலாண்மை இயக்குநராக (CMD) பொறுப்பேற்றுள்ளார். அவர் ஐஐடி காரக்பூர் (IIT Kharagpur)-இல் சிவில் இன்ஜினியரிங் பி.டெக் பட்டமும், ஐஐஎம் லக்னோ (IIM Lucknow)-வில் PGDM பட்டமும் பெற்றுள்ளார். தாதுக்கள், உலோகங்கள், இரசாயனங்கள், பொறியியல் பொருட்கள் மற்றும் திட்டப்பணிகள் தொடர்பான துறைகளில் பணியாற்றிய அனுபவம் பெற்றவர். ஹிந்துஸ்தான் காப்பர் லிமிடெட் (HCL) நிறுவனத்தில் சேருவதற்கு முன்பு, ஃபெர்டிலைசர்ஸ் அண்ட் கெமிக்கல்ஸ் திருவிதாங்கூர் லிமிடெட் (FACT) நிறுவனத்தில் சந்தைப்படுத்துதல் துறை இயக்குநராக (Director – Marketing) பணியாற்றினார்.

புராஜெக்ட் 17ஏ திட்டத்தின் கீழ் ஐஎன்எஸ் மகேந்திரகிரி கடற்படையில் இணைப்பு

உள்நாட்டில் தயாரிக்கப்பட்ட ஐஎன்எஸ் மகேந்திரகிரி போர்க்கப்பல் விசாகப்பட்டினத்தில் நடைபெற்ற விழாவில் இந்திய கடற்படையில் இணைக்கப்பட்டது. 2009-ஆம் ஆண்டு ₹45,000 கோடி செலவில் இந்திய கடற்படைக்காக 7 போர்க்கப்பல்கள் தயாரிக்கும் நோக்கில் புராஜெக்ட் 17ஏ (Project 17A) திட்டம் தொடங்கப்பட்டது. இந்தப் போர்க்கப்பல்கள் மும்பையின் மசகான் டாக் ஷிப் பில்டர்ஸ் லிமிடெட் (MDL) மற்றும் கொல்கத்தாவின் கார்டன் ரீச் ஷிப் பில்டர்ஸ் அண்ட் இன்ஜினியர்ஸ் (GRSE) நிறுவனங்களால் தயாரிக்கப்பட்டு வருகின்றன. இத்திட்டத்தின் முதல் போர்க்கப்பலான ஐஎன்எஸ் நீலகிரி, ஜனவரி 2025-இல் கடற்படையில் இணைக்கப்பட்டது. ஐஎன்எஸ் மகேந்திரகிரி, இந்தத் திட்டத்தின் ஆறாவது போர்க்கப்பலாக இந்திய கடற்படையில் இணைக்கப்பட்டு, மத்திய பாதுகாப்புத் துறை அமைச்சர் ராஜ்நாத் சிங் நாட்டிற்கு அர்ப்பணித்தார். 149 மீட்டர் நீளம், 6,670 டன் எடை கொண்ட இந்தப் போர்க்கப்பல் மணிக்கு 52 கி.மீ. வேகத்தில் பயணிக்கக் கூடியது மற்றும் 230 வீரர்கள் பணியாற்றும் திறன் கொண்டது. மேலும், மேற்கு ஆசியப் போருக்குப் பிறகு ஆபரேஷன் ஊர்ஜா சுரக்ஷா நடவடிக்கையின் கீழ் ₹9,000 கோடிக்கும் அதிக மதிப்புள்ள அத்தியாவசியப் பொருட்களை ஏற்றிச் சென்ற 18 வணிகக் கப்பல்களுக்கு இந்திய கடற்படை பாதுகாப்பு வழங்கியதாகவும் தெரிவிக்கப்பட்டது.

பின்னணிப் பாடகி எஸ். ஜானகி மறைவு

பிரபல பின்னணிப் பாடகி எஸ். ஜானகி வயது முதிர்ச்சியால் கர்நாடக மாநிலம் மைசூருவில், 88 வயதில் காலமானார். 1938-ஆம் ஆண்டு, அப்போதைய மெட்ராஸ் மாகாணத்தின் தற்போதைய ஆந்திரப் பிரதேசம், குண்டூர் மாவட்டம், ரெபல்லி அருகிலுள்ள பள்ளபட்லா கிராமத்தில் பிறந்த அவர், 19-வது வயதில் திரைத்துறையில் அறிமுகமானார். 1956-ஆம் ஆண்டு அகில இந்திய வானொலி நடத்திய பாடல் போட்டியில் வெற்றி பெற்று அப்போதைய குடியரசுத் தலைவர் டாக்டர் ராஜேந்திர பிரசாத் அவர்களிடம் பரிசு பெற்றார். 1957-ஆம் ஆண்டு விதியின் விளையாட்டு திரைப்படத்தின் மூலம் தமிழில் அறிமுகமாகி, ஏ.வி.எம். ஸ்டூடியோவில் தனது திரைப்படப் பாடகர் வாழ்க்கையைத் தொடங்கினார். சுமார் 60 ஆண்டுகள் நீண்ட இசைப் பயணத்தில் 20 மொழிகளில் 48,000-க்கும் மேற்பட்ட பாடல்களை பாடி சாதனை படைத்தார். மேலும், மவுனப் போராட்டம் என்ற தெலுங்குத் திரைப்படத்திற்கு இசையமைத்துள்ளார். பின்னணிப் பாடலுக்காக 4 தேசிய திரைப்பட விருதுகளை பெற்றுள்ளார்: 1977 – 16 வயதினிலே (செந்தூரப் பூவே), 1981 – ஒப்போல் (எட்டுமுனூராம்பலத்தில்), 1984 – சிதாரா (வெண்ணல்லோ கோதாரி அந்தம்), 1992 – தேவர் மகன் (இஞ்சி இடுப்பழகா).

தேசியப் பாடல் மற்றும் தேசிய கீதம் குறித்த மத்திய உள்துறை அமைச்சகத்தின் புதிய வழிகாட்டுதல்

மத்திய உள்துறை அமைச்சகம் (MHA) வெளியிட்ட புதிய உத்தரவின்படி, அரசு விழாக்களில் முதலில் மாநிலப் பாடல் பாடப்படலாம்; அதனைத் தொடர்ந்து தேசியப் பாடல் – வந்தே மாதரம் மற்றும் தேசிய கீதம் – ஜன கண மன கட்டாயமாக பாடப்பட வேண்டும். இந்திய குடியரசுத் தலைவர், மாநில ஆளுநர்கள், துணைநிலை ஆளுநர்கள் பங்கேற்கும் அதிகாரப்பூர்வ அரசு விழாக்கள், அரசு விருது வழங்கும் விழாக்கள், அகில இந்திய வானொலி (All India Radio) மற்றும் தூர்தர்ஷன் மூலம் குடியரசுத் தலைவரின் நாட்டு மக்களுக்கான உரைக்கு முன்பும் பின்பும், மேலும் அணிவகுப்பில் தேசியக் கொடி கொண்டு வரப்படும் நிகழ்வுகளிலும் தேசியப் பாடல் மற்றும் தேசிய கீதம் விதிமுறைகளின்படி பாடப்பட வேண்டும் என உத்தரவிடப்பட்டுள்ளது. தேசியப் பாடல் மற்றும் தேசிய கீதத்தைப் பாடும் போது சரியான வரிகள் மற்றும் உச்சரிப்பு பின்பற்றப்பட வேண்டும் என்றும் தெரிவிக்கப்பட்டுள்ளது. இதற்கு முன் ஜனவரி 28 அன்று வெளியிடப்பட்ட வழிகாட்டுதலின்படி, 3 நிமிடம் 10 விநாடிகள் கொண்ட வந்தே மாதரம் பாடலின் 6 சரணங்கள் குறிப்பிட்ட அதிகாரப்பூர்வ நிகழ்வுகளில் பாடப்பட வேண்டும் என அறிவுறுத்தப்பட்டது. ஜனவரி 24, 1950 அன்று அரசியல் நிர்ணய சபை நிறைவேற்றிய தீர்மானத்தின்படி ஜன கண மன இந்தியாவின் தேசிய கீதமாக ஏற்கப்பட்டது; மேலும் இந்திய விடுதலைப் போராட்டத்தில் முக்கிய பங்கு வகித்த வந்தே மாதரம் பாடலுக்கு தேசிய கீதத்துக்கு இணையான மரியாதை மற்றும் அந்தஸ்து வழங்கப்பட வேண்டும் என்றும் தீர்மானிக்கப்பட்டது.

தமிழ்நாடு செய்திகள்

பருவமழை மழைத்துளி ஆவியாதல் குறித்து IITM ஆய்வு

இந்திய வெப்பமண்டல வானிலை ஆய்வு மையம் (IITM), புனே மேற்கொண்ட ஆய்வில், தென்மேற்கு பருவமழையின் போது வடக்கு மேற்குத் தொடர்ச்சி மலையில் பெய்யும் மழையில் சராசரியாக 25% மழைத்துளிகள் தரையை அடையும் முன்பே ஆவியாகின்றன என்பது கண்டறியப்பட்டுள்ளது. இது இந்தியாவில் மழைத்துளி ஆவியாதல் குறித்த முதல் கண்காணிப்பு அடிப்படையிலான மதிப்பீடு ஆகும். இந்த ஆய்வு Atmospheric Chemistry and Physics என்ற சக மதிப்பாய்வு செய்யப்பட்ட இதழில் வெளியிடப்பட்டுள்ளது. சைகத் செங்குப்தா தலைமையிலான ஆய்வில், ஜூன் முதல் செப்டம்பர் வரையிலான பருவமழைக் காலத்தில் ஆவியாதல் 4% முதல் 61% வரை மாறுபடுவதாக கணக்கிடப்பட்டுள்ளது. இந்த ஆய்வில் மழைநீர் ஐசோடோப் பகுப்பாய்வு, லேசர் ஸ்பெக்ட்ரோமீட்டர் மற்றும் Below Cloud Interaction Model பயன்படுத்தப்பட்டன. இந்த ஆய்வு முடிவுகள் வானிலை மற்றும் காலநிலை மாதிரிகளை மேம்படுத்தவும், இந்திய பருவமழையை மேலும் துல்லியமாகப் புரிந்துகொள்ளவும் உதவும்.

சிவகங்கை மாவட்டத்தில் 13-ஆம் நூற்றாண்டு கல்வெட்டு கண்டுபிடிப்பு

சிவகங்கை மாவட்டம், திருப்பத்தூர் அருகிலுள்ள காரையூர் புதுவளவு பகுதியில் வண்ணிக் கண்மாய் கரையில் 13-ஆம் நூற்றாண்டைச் சேர்ந்த கல்வெட்டு கண்டறியப்பட்டுள்ளது. இந்த கல்வெட்டை சிவகங்கை தொல்நடைக் குழு நிறுவனர் புலவர் காளிராசா, செயலர் நரசிம்மன், மற்றும் காரைக்குடி அழகப்பா அரசு கலைக் கல்லூரி வரலாற்றுத் துறை இணைப் பேராசிரியர் வேலாயுதராஜா ஆகியோர் ஆய்வு செய்தனர். 2 அடி நீளமுள்ள இந்த கல்வெட்டில் 7 வரிகள் காணப்படுகின்றன. எழுத்தமைதி (Palaeography) அடிப்படையில் இது 13-ஆம் நூற்றாண்டைச் சேர்ந்தது என உறுதி செய்யப்பட்டுள்ளது. கல்வெட்டின் மூலம், அப்பகுதி வண்ணக்க நல்லூர் என அழைக்கப்பட்டதையும், அங்கு வாழ்ந்த சீயர் (வைணவ ஆச்சாரியார்) மக்களின் நல்வாழ்விற்காக வேத நெறிகளை கற்பித்து பாதுகாத்ததையும் அறிய முடிகிறது. மேலும், அதே பகுதியில் உள்ள அழகிய மணவாளப் பெருமாள் கோயிலில் முதலாம் மாறவர்மன் சுந்தரபாண்டியன் மற்றும் சடையவர்மன் சுந்தரபாண்டியன் கல்வெட்டுகளிலும் வண்ணக்க நல்லூர் என்ற பெயர் இடம்பெற்றுள்ளது. அருகிலுள்ள அய்யனார் சிற்பம் 12-ஆம் அல்லது 13-ஆம் நூற்றாண்டைச் சேர்ந்ததாக கருதப்படுகிறது.

தமிழ்நாட்டில் கனிமப் போக்குவரத்து விதிகளில் திருத்தம்

தமிழ்நாடு அரசு, மாநிலத்தில் கனிமத் தட்டுப்பாடு ஏற்படும் சூழலில், கனிமங்களை பிற மாநிலங்களுக்கு எடுத்துச் செல்வதற்கு தற்காலிக தடை விதிக்கும் அதிகாரத்தை சுரங்கம் மற்றும் புவியியல் துறை இயக்குநருக்கு வழங்கி அரசாணை வெளியிட்டுள்ளது. இதற்காக தமிழ்நாடு சட்டவிரோத சுரங்கம், போக்குவரத்து, சேமிப்பு மற்றும் கனிம விற்பனையாளர் விதிகள், 2011-ல் திருத்தம் செய்து அரசிதழில் வெளியிடப்பட்டுள்ளது. இந்தத் திருத்தத்தின்படி, செயற்கை மணல் (M-Sand), கருங்கற்கள், பெரிய கல் துண்டுகள், பாறாங்கற்கள், ஜல்லிக்கற்கள், அரைவைக் கற்கள் மற்றும் கைக்கல் அரைவை உள்ளிட்ட அனைத்து வகையான கட்டுமானக் கற்களும் தமிழ்நாட்டின் தேவையை பூர்த்தி செய்வதை உறுதி செய்யும் நோக்கில், அவற்றை பிற மாநிலங்களுக்கு எடுத்துச் செல்வதற்கு தற்காலிக தடை விதிக்கும் அதிகாரம் சுரங்கம் மற்றும் புவியியல் துறை இயக்குநருக்கு வழங்கப்பட்டுள்ளது.

சர்வதேசச் செய்திகள்

இந்தியா–நியூஸிலாந்து உத்திசார் கூட்டுறவு

இந்தியா மற்றும் நியூஸிலாந்து நாடுகளின் உயர்மட்ட இருதரப்பு பேச்சுவார்த்தை ஜூலை 11 அன்று ஆக்லாந்தில், பிரதமர் நரேந்திர மோடி மற்றும் பிரதமர் கிறிஸ்டோபர் லக்ஸன் தலைமையில் நடைபெற்றது. இதில் கடல்சார் பாதுகாப்பு, கடற்படை தளவாட ஒத்துழைப்பு, பேரிடர் மேலாண்மை, கால்நடை பராமரிப்பு, பால்வள தொழில்நுட்பம், சுற்றுலா, கலாசாரம் மற்றும் விளையாட்டு உள்ளிட்ட துறைகளில் 10 ஒப்பந்தங்கள் கையொப்பமிடப்பட்டன; மேலும் 8 முக்கிய முடிவுகள் அறிவிக்கப்பட்டன. இரு நாடுகளும் தங்களின் உறவை உத்திசார் கூட்டுறவு (Strategic Partnership) நிலைக்கு உயர்த்தவும், அதற்கான 4 ஆண்டு செயல்திட்டத்தை செயல்படுத்தவும் ஒப்புக்கொண்டன. அடுத்த 5 ஆண்டுகளில் இருதரப்பு வர்த்தகத்தை ₹35,000 கோடி (7 பில்லியன் நியூஸிலாந்து டாலர்கள்) ஆக உயர்த்த இலக்கு நிர்ணயிக்கப்பட்டது; தற்போதைய வர்த்தக மதிப்பு ₹18,000 கோடி ஆகும். ஏப்ரல் மாதத்தில் கையொப்பமிடப்பட்ட இந்தியா–நியூஸிலாந்து தடையற்ற வர்த்தக ஒப்பந்தத்தை (Free Trade Agreement) விரைந்து அமல்படுத்தவும், அதன்படி இந்திய ஏற்றுமதிகளுக்கு 100% வரியில்லா அணுகல் மற்றும் நியூஸிலாந்தின் 95% இறக்குமதிகளுக்கு வரிச் சலுகை வழங்கவும் இரு நாடுகளும் உறுதி செய்தன. இந்தியா தொடங்கிய உலகளாவிய உயிரி எரிபொருள் கூட்டமைப்பில் (Global Biofuels Alliance) நியூஸிலாந்து இணைந்தது. கூட்டறிக்கையில் சுதந்திரமான, திறந்த மற்றும் வளமான இந்தோ-பசிபிக் பிராந்தியம், 1982-ஆம் ஆண்டின் ஐ.நா. கடல்சார் சட்ட ஒப்பந்தம் (UNCLOS), கடல் வழிச் சுதந்திரம் மற்றும் பயங்கரவாத எதிர்ப்பு ஆகியவற்றில் இரு நாடுகளும் உறுதிப்பாட்டை மீண்டும் வலியுறுத்தின. மேலும், இந்தியா–நியூஸிலாந்து விளையாட்டு உறவுகளின் 100-ஆவது ஆண்டு நினைவாக விளையாட்டுத் துறை கூட்டுச் செயல்திட்ட ஒப்பந்தமும் கையொப்பமிடப்பட்டது.