TNPSC தேர்வுக்கான முக்கிய தினசரி நடப்பு நிகழ்வுகள் - 12-09-2026

சர்வதேசச் செய்திகள்

இந்தியா-ரஷியா இருதரப்பு வர்த்தக இலக்கு ரூ.9.56 லட்சம் கோடி

பிரதமர் நரேந்திர மோடி மற்றும் ரஷிய அதிபர் விளாடிமிர் புதின் ஆகியோர் 2026 செப்டம்பர் 11 அன்று புது டெல்லியில் இருதரப்பு பேச்சுவார்த்தை நடத்தினர். இதில் இந்தியா-ரஷியா இருதரப்பு வர்த்தகத்தை தற்போதைய 65 பில்லியன் டாலரில் (ரூ.6.21 லட்சம் கோடி) இருந்து 2030-ஆம் ஆண்டுக்குள் 100 பில்லியன் டாலராக (ரூ.9.56 லட்சம் கோடி) அதிகரிக்கும் இலக்கை இரு தலைவர்களும் உறுதி செய்தனர். வர்த்தகம், முதலீடு, பாதுகாப்பு, எரிசக்தி, முக்கிய கனிமங்கள், அணுமின் உற்பத்தி, உர விநியோகம், விண்வெளி மற்றும் திறன்மிக்க பணியாளர்கள் உள்ளிட்ட துறைகளில் இருதரப்பு ஒத்துழைப்பு குறித்து ஆலோசிக்கப்பட்டது. ரஷிய அதிபர் விளாடிமிர் புதின், பிரிக்ஸ் உச்சி மாநாட்டில் பங்கேற்பதற்காக மூன்று நாள் அரசு முறைப் பயணமாக இந்தியா வந்தார்; 2022-ஆம் ஆண்டு ரஷியா-உக்ரைன் மோதல் தொடங்கிய பின்னர், பிரிக்ஸ் மாநாட்டிற்காக அவர் வேறு நாட்டுக்கு பயணம் செய்வது இதுவே முதல் முறையாகும். பிரதமர் மோடி, புதினுக்கு திருக்குறளின் ரஷிய மொழிபெயர்ப்பு நூலை பரிசாக வழங்கினார். 24-ஆவது இந்தியா-ரஷியா ஆண்டு உச்சி மாநாட்டில் பங்கேற்க ரஷியாவுக்கு வருமாறு புதின் விடுத்த அழைப்பை பிரதமர் மோடி ஏற்றுக்கொண்டார். இரு தலைவர்களும் மேற்காசியா மோதல் மற்றும் ரஷியா-உக்ரைன் மோதல் உள்ளிட்ட பிராந்திய மற்றும் உலகளாவிய விவகாரங்கள் குறித்து ஆலோசித்து, பேச்சுவார்த்தை மற்றும் ராஜீய நடவடிக்கைகள் மூலம் மோதல்களுக்கு தீர்வு காண்பதன் முக்கியத்துவத்தை வலியுறுத்தினர். பாதுகாப்புத் துறையில் சுகோய்-57 போர் விமானங்கள், மீதமுள்ள S-400 வான் பாதுகாப்பு அமைப்புகள், பிரம்மோஸ் ஏவுகணை மேம்பாடு, ரயில்வே மற்றும் உள்கட்டமைப்பு திட்டங்கள் தொடர்பான ஒத்துழைப்பு குறித்தும் ஆலோசிக்கப்பட்டது.

பிரிக்ஸ் வர்த்தக அமைப்பு கூட்டம்: சுதந்திரமான கப்பல் போக்குவரத்து மற்றும் மாலுமிகள் பாதுகாப்பு

2026 செப்டம்பர் 11 அன்று புது டெல்லியில் நடைபெற்ற பிரிக்ஸ் வர்த்தக அமைப்பு கூட்டத்தில், பிரதமர் நரேந்திர மோடி உலக வர்த்தகத்தை மேம்படுத்த சுதந்திரமான கப்பல் போக்குவரத்து மற்றும் மாலுமிகளின் பாதுகாப்பு முக்கியம் என்பதை வலியுறுத்தினார். இந்தியாவில் 1 லட்சத்துக்கும் மேற்பட்ட புத்தாக்க நிறுவனங்கள் (ஸ்டார்ட்அப்கள்) மற்றும் 1 பில்லியன் டாலருக்கும் அதிகமான மதிப்புடைய 120 யூனிகார்ன் நிறுவனங்கள் உள்ளன. 2014-ஆம் ஆண்டு முதல், இந்தியா 40 நாடுகளுடன் தடையற்ற வர்த்தக ஒப்பந்தங்களில் ஈடுபட்டுள்ளது. பிரிக்ஸ் உறுப்பு மற்றும் கூட்டாளர் நாடுகளின் மக்கள் தொகை உலக மக்கள் தொகையில் சுமார் 50% ஆகும்; உலகின் ஒட்டுமொத்த பொருளாதார உற்பத்தியில் பிரிக்ஸின் பங்கு சுமார் 40% ஆகவும், உலக வர்த்தகத்தில் கால்வாசிக்கும் அதிகமாகவும் உள்ளது. கடந்த 20 ஆண்டுகளில், பிரிக்ஸ் நாடுகளின் பொருளாதாரம் உலக பொருளாதாரத்தை விட வேகமாக வளர்ந்துள்ளது. ரஷிய அதிபர் விளாடிமிர் புதின், உலக எரிசக்தி பாதுகாப்பு மற்றும் உணவுப் பாதுகாப்புக்கு ரஷியா பங்களிக்கத் தயாராக இருப்பதாக தெரிவித்தார். கடந்த 5 ஆண்டுகளில், உலகளாவிய உற்பத்தியில் பிரிக்ஸ் நாடுகளின் பங்கு 40% ஆகவும், ஜி7 நாடுகளின் பங்கு 29% ஆகவும் இருந்ததாக அவர் குறிப்பிட்டார். பிரிக்ஸ் உச்சி மாநாடு 2026 செப்டம்பர் 12–13 ஆகிய தேதிகளில் புது டெல்லியில் நடைபெறுவதற்கு முன்னதாக இந்த பிரிக்ஸ் வர்த்தக அமைப்பு கூட்டம் நடைபெற்றது.

தமிழ்நாடு செய்திகள்

பொ.சங்கர் தொல்லியல் துறை ஆணையராக நியமனம்

ஐஏஎஸ் அதிகாரி பொ.சங்கர், வேளாண்மைத் துறை செயலராக பணியாற்றி வந்த நிலையில், இடமாற்றம் செய்யப்பட்டு தமிழ்நாடு தொல்லியல் துறை ஆணையராக நியமிக்கப்பட்டுள்ளார். இதற்கான அறிவிப்பை தமிழ்நாடு தலைமைச் செயலர் எம்.சாய்குமார் வெளியிட்டார். இதையடுத்து, சமூக நீதித் துறை செயலர் என்.சுப்பையன், வேளாண்மைத் துறை செயலர் பதவியை கூடுதல் பொறுப்பாக கவனிப்பார். பொ.சங்கர், 2026 மே மாதத்தில் வேளாண்மைத் துறை செயலராக நியமிக்கப்பட்டிருந்தார்.

பட்டிமன்ற நடுவர் பேராசிரியர் சாலமன் பாப்பையா காலமானார்

புகழ்பெற்ற தமிழ் அறிஞரும் பட்டிமன்ற நடுவருமான பேராசிரியர் சாலமன் பாப்பையா, 90-வது வயதில் மதுரையில் 2026 செப்டம்பர் 11 அன்று காலமானார். இவர் 1936 பிப்ரவரி 22 அன்று மதுரையில் பிறந்தார்; மதுரை ஞானஒளிபுரத்தைச் சேர்ந்தவர். மாநகராட்சி வெள்ளந்தியார் பள்ளியில் பயின்று, தியாகராசர் கல்லூரியில் கல்லூரிக் கல்வியை முடித்த அவர், அமெரிக்கன் கல்லூரி, மதுரையில் பேராசிரியராக பணியாற்றினார். பட்டிமன்றங்களை அறிவு மற்றும் சமூக விழிப்புணர்வுக்கான தளமாக மாற்றியதில் முக்கிய பங்காற்றினார். தமிழ் மொழிக்கு ஆற்றிய சேவைக்காக, தமிழ்நாடு அரசு 2000-ஆம் ஆண்டு கலைமாமணி விருதையும், இந்திய அரசு 2021-ஆம் ஆண்டு பத்மஸ்ரீ விருதையும் வழங்கியது. இவரது மனைவி ஜெயபாய், ஓய்வுபெற்ற ஆசிரியர், 2025-ஆம் ஆண்டு காலமானார். இவருக்கு தியாகமூர்த்தி என்ற மகனும், விமலா என்ற மகளும் உள்ளனர். இவரது இறுதிச்சடங்கு மதுரை தத்தனேரி மின்மயானத்தில் நடைபெற உள்ளது.

தேசியச் செய்திகள்

உணவுப் பொருள் பாக்கெட்டுகளின் முன்புற ஊட்டச்சத்து லேபிள் குறித்து உச்சநீதிமன்றம் விளக்கம் கோரல்

உணவுப் பொருள்களில் உள்ள கொழுப்பு, சர்க்கரை மற்றும் உப்பு அளவைக் குறிப்பிடும் முன்புற ஊட்டச்சத்து எச்சரிக்கை லேபிள்களை நடைமுறைப்படுத்துவது குறித்து இந்திய உணவு பாதுகாப்பு மற்றும் தரநிர்ணய ஆணையத்திடம் (FSSAI) உச்சநீதிமன்றம் விளக்கம் கோரியது. நீதிபதி ஜே.பி.பார்திவாலா மற்றும் நீதிபதி கே.வினோத் சந்திரன் ஆகியோர் அடங்கிய அமர்வு, உணவுப் பொருள் பாக்கெட்டுகளின் முன்புறத்தில் கொழுப்பு, சர்க்கரை மற்றும் உப்பு அளவுகளை கட்டாயமாக குறிப்பிடக் கோரி 3எஸ் மற்றும் நமது சுகாதார சமூகம் (3S and Our Health Society) தாக்கல் செய்த மனுவை விசாரித்தது. FSSAI, ஊட்டச்சத்து எச்சரிக்கை லேபிள்களை இரண்டு கட்டங்களாக நடைமுறைப்படுத்த உள்ளதாகத் தெரிவித்தது; இதில் குறிப்பிட்ட இனிப்பூட்டப்பட்ட பானங்களும் அடங்கும். ஊட்டச்சத்து அளவுகளை நிர்ணயிக்கும் FSSAI-யின் நடைமுறைகள் மற்றும் ஊட்டச்சத்து தகவல்களை எழுத்து மற்றும் பட வடிவங்களில் குறிப்பிடுவது குறித்தும் நீதிமன்றம் விளக்கம் கோரியது. இந்த விவகாரம் தொடர்பாக 10 நாள்களுக்குள் பதில் மனு (Counter-Affidavit) தாக்கல் செய்ய FSSAI-க்கு உத்தரவிட்ட உச்சநீதிமன்றம், அடுத்த விசாரணையை 2026 செப்டம்பர் 28 அன்று நடைபெறுமாறு ஒத்திவைத்தது.

பிரிக்ஸ் மாநாட்டில் பீஹாரின் உணவு வகைகள்

பீஹார் மாநிலத்தின் பிரபல உணவு வகைகளான சாத்து மற்றும் மகானா லட்டு, 2026 செப்டம்பர் 12–13 ஆகிய தேதிகளில் புதுடெல்லியில் நடைபெற்ற பிரிக்ஸ் உச்சி மாநாட்டில் பங்கேற்ற விருந்தினர்கள் மற்றும் பத்திரிகையாளர்களுக்கான வரவேற்புக் கிட்-ல் இடம்பெற்றன. வரவேற்புக் கிட்-ல் தண்ணீர் பாட்டில், காபி கோப்பை, பிரிக்ஸ் மாநாட்டு டைரி, பேனா, பேட்ஜ், சாத்து, மகானா லட்டு ஆகியவற்றுடன் ஒடிசாவின் கோராபுட் காபி பொடி மற்றும் குஜராத் மாநிலத்தின் கைவினைப் பொருட்களும் இடம்பெற்றன. பீஹாரின் மகானா 2022-ஆம் ஆண்டு புவிசார் குறியீடு (GI Tag) பெற்றது. சாத்து, வறுத்த கடலை மாவிலிருந்து தயாரிக்கப்படுகிறது மற்றும் அதிக ஊட்டச்சத்து கொண்ட உணவாகும்.

பிரிக்ஸ் உச்சி மாநாடு: ‘நமஸ்தே தாமரை’ சின்னம்

18-வது பிரிக்ஸ் உச்சி மாநாடு புதுடெல்லி பாரத் மண்டபத்தில் தொடங்கிய நிலையில், ‘நமஸ்தே தாமரை’ சின்னம் மாநாட்டின் முக்கிய அடையாளமாக இடம்பெற்றுள்ளது. இச்சின்னத்தில் தாமரை மலரின் நடுவில் ‘நமஸ்தே’ வடிவம் இடம்பெற்றுள்ளது. தாமரையின் இதழ்கள் வெவ்வேறு வண்ணங்களில் வடிவமைக்கப்பட்டுள்ளன. அவற்றில் பிரிக்ஸ் அமைப்பின் அடிப்படை உறுப்பு நாடுகளான பிரேசில், ரஷியா, இந்தியா, சீனா மற்றும் தென் ஆப்பிரிக்கா ஆகிய நாடுகளின் தேசியக் கொடிகளின் வண்ணங்கள் இடம்பெற்றுள்ளன.

பிரபலமானவர்கள், விருதுகள் மற்றும் நிகழ்வுகள்

டெல்லியில் பிரிக்ஸ் உச்சி மாநாடு

பிரிக்ஸ் உச்சி மாநாடு 2026 செப்டம்பர் 12–13 ஆகிய தேதிகளில் புது டெல்லியில், இந்தியாவின் தலைமைப் பொறுப்பின் கீழ் நடைபெறுகிறது. பிரிக்ஸ் அமைப்பின் 11 உறுப்பு நாடுகள் பிரேசில், ரஷ்யா, இந்தியா, சீனா, தென்னாப்பிரிக்கா, எகிப்து, எத்தியோப்பியா, ஈரான், ஐக்கிய அரபு அமீரகம், சவுதி அரேபியா மற்றும் இந்தோனேசியா ஆகும்; பெலாரஸ், பொலிவியா, கஜகஸ்தான், கியூபா, மலேசியா, நைஜீரியா, தாய்லாந்து, உகண்டா, உஸ்பெகிஸ்தான் மற்றும் வியட்நாம் ஆகியவை கூட்டாளர் நாடுகளாக உள்ளன. பிரிக்ஸ் நாடுகள் உலகின் மொத்த பொருளாதார உற்பத்தியில் சுமார் 40% மற்றும் உலக வர்த்தகத்தில் 26% பங்கைக் கொண்டுள்ளன. மாநாடு புது டெல்லி பாரத் மண்டபத்தில் நடைபெறுகிறது; மாநாட்டின் நிறைவில் டெல்லி பிரகடனம் வெளியிடப்படுகிறது. மாநாட்டில் பிரதமர் நரேந்திர மோடி, ரஷ்ய அதிபர் விளாடிமிர் புதின், சீன அதிபர் ஷி ஜின்பிங், ஈரான் அதிபர் மசூத் பெஸஷ்கியான், தென்னாப்பிரிக்க அதிபர் சிரில் ராமபோசா, இந்தோனேசிய அதிபர் பிரபோவோ சுபியாந்தோ, எகிப்து அதிபர் அப்தெல் பத்தா அல் சிசி, எத்தியோப்பிய அதிபர் தயே அட்ஸ்கே செலஸ்ஸி, மலேசிய பிரதமர் அன்வர் இப்ராஹிம் உள்ளிட்ட தலைவர்கள் பங்கேற்கின்றனர். இந்தியா தற்போது பிரிக்ஸ் அமைப்பின் தலைமைப் பொறுப்பை வகித்து, புது டெல்லியில் மாநாட்டை நடத்துகிறது.

இந்தியா–இஏஇயு வர்த்தக ஒப்பந்த பேச்சுவார்த்தை தீவிரம்

இந்தியா மற்றும் யுரேசிய பொருளாதார ஒன்றியம் (EAEU) இடையே வர்த்தக ஒப்பந்தத்திற்கான பேச்சுவார்த்தைகள் தீவிரமாக நடைபெற்று வருகின்றன என்று ரஷிய பொருளாதார மேம்பாட்டுத் துறை அமைச்சர் மேக்சிம் ரேஷெட்னிகோவ் 2026 செப்டம்பர் 11 அன்று புது டெல்லியில் நடைபெற்ற பிரிக்ஸ் வர்த்தக அமைப்பு கூட்டத்தில் தெரிவித்தார். EAEU அமைப்பில் ரஷியா, கஜகஸ்தான், பெலாரஸ், ஆர்மீனியா மற்றும் கிர்கிஸ்தான் ஆகிய 5 நாடுகள் உறுப்பினர்களாக உள்ளன. ரஷியாவின் ஏற்றுமதி பரிவர்த்தனைகளில் அமெரிக்க டாலர் மற்றும் யூரோவின் பங்கு மூன்று ஆண்டுகளுக்கு முன்பு 85% ஆக இருந்த நிலையில் தற்போது 11% ஆகக் குறைந்துள்ளது. ரஷியா பல்வேறு நாடுகளில் உள்ள ஆயிரக்கணக்கான வங்கிகளுடன் நிதியியல் தொடர்புகளை ஏற்படுத்தியுள்ளது. மேலும், பிரிக்ஸ் நாடுகளிடையே தானிய வர்த்தக சந்தை தளம் மற்றும் சிறப்பு பொருளாதார மண்டலங்கள் அமைப்பது தொடர்பாக கவனம் செலுத்தப்பட்டது.