TNPSC தேர்வுக்கான முக்கிய தினசரி நடப்பு நிகழ்வுகள் - 02-09-2026

அறிவியல் மற்றும் தொழில்நுட்பச் செய்திகள்

செப்டம்பர் 4-இல் EOS-05 செயற்கைக்கோளை ஏவ இஸ்ரோ திட்டம்

இந்திய விண்வெளி ஆராய்ச்சி நிறுவனம் (ISRO), EOS-05 (GISAT-1A) பூமி கண்காணிப்பு செயற்கைக்கோளை, GSLV-F17 ராக்கெட் மூலம் செப்டம்பர் 4 அதிகாலை 2.55 மணிக்கு ஏவ திட்டமிட்டுள்ளது. இந்த ராக்கெட் ஆந்திரப் பிரதேசம், ஸ்ரீஹரிகோட்டாவில் உள்ள சதீஷ் தவான் விண்வெளி மையத்தின் இரண்டாவது ஏவுதளத்திலிருந்து விண்ணில் செலுத்தப்படும். EOS-05 செயற்கைக்கோள் பூமியில் இருந்து சுமார் 36,000 கி.மீ. உயரத்தில் உள்ள புவிநிலைச் சுற்றுப்பாதையில் (Geostationary Orbit) நிலைநிறுத்தப்படும். இது இந்திய துணைக்கண்டத்தைத் தொடர்ந்து கண்காணித்து நிகழ்நேரத்திற்கு நெருக்கமான படங்களை வழங்கும். மல்டி-ஸ்பெக்ட்ரல் மற்றும் ஹைப்பர்-ஸ்பெக்ட்ரல் கேமராக்கள் பொருத்தப்பட்டுள்ள இந்த செயற்கைக்கோள், வெள்ளம், புயல், நிலநடுக்கம், காட்டுத்தீ, பயிர் வளர்ச்சி, வனப்பரப்பு மாற்றங்கள் மற்றும் நீர்நிலைகள் ஆகியவற்றைக் கண்காணிக்க உதவும். இந்தியாவின் எல்லைப் பகுதிகளைக் கண்காணித்து தேசிய பாதுகாப்பிற்குத் தேவையான தரவுகளையும் இது வழங்கும். புவிநிலைச் சுற்றுப்பாதையில் இருந்து இந்தியாவைக் கண்காணிக்கும் நாட்டின் முதல் இமேஜிங் செயற்கைக்கோள் EOS-05 ஆகும். மேலும், இந்த ஏவுதல் GSLV வகை ராக்கெட்டின் 19-வது பயணமாகும்.

தமிழ்நாடு செய்திகள்

தாய்மாமன் தங்க மோதிரம் திட்டத்திற்கான வழிகாட்டு நெறிமுறைகள் வெளியீடு

தமிழக அரசு, அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் தாய்மாமன் தங்க மோதிரம் திட்டத்திற்கான வழிகாட்டு நெறிமுறைகளை வெளியிட்டுள்ளது. மறைந்த முன்னாள் தமிழக முதலமைச்சர் சி.என். அண்ணாதுரை (அண்ணா) அவர்களின் பிறந்தநாளான செப்டம்பர் 15 முதல் இத்திட்டம் தொடங்கப்படவுள்ளது. இத்திட்டம் சுகாதாரத் துறை மூலம் செயல்படுத்தப்படுவதுடன், ஆண்டுதோறும் ₹755.83 கோடி நிதி ஒதுக்கப்பட்டுள்ளது; தங்க மோதிரங்களை வழங்குவதற்காக இரண்டு விற்பனையாளர்கள் தேர்வு செய்யப்பட்டுள்ளனர். இத்திட்டத்தின் பயனாளிகள் தமிழகத்தைப் பூர்வீகமாகக் கொண்டவர்களாக இருக்க வேண்டும்; கர்ப்பிணிப் பெண்கள் அரசு மருத்துவமனைகளில் பிரசவித்திருக்க வேண்டும் மற்றும் PICME (Pregnancy and Infant Cohort Monitoring and Evaluation) மற்றும் RCH-ID (Reproductive and Child Health ID) ஆகியவற்றில் பதிவு செய்திருக்க வேண்டும். தமிழகத்தைச் சேர்ந்தவர் என்பதற்கான ஆதாரமாக ரேஷன் அட்டை, வாக்காளர் அடையாள அட்டை, ஆதார் அட்டை, தொழிலாளர் நல வாரிய அடையாள அட்டை, அஞ்சல் துறை முகவரி அடையாள அட்டை அல்லது இருப்பிடச் சான்றிதழ் ஆகியவற்றில் ஏதேனும் ஒன்றை சமர்ப்பிக்கலாம். தகுதியுள்ள அனைத்து புதிதாகப் பிறக்கும் குழந்தைகளுக்கும், முதல், இரண்டாவது அல்லது அதற்குப் பிந்தைய குழந்தை என்ற வேறுபாடின்றி, தங்க மோதிரம் வழங்கப்படும்.

சென்னையில் 11 நவீன குளிரூட்டப்பட்ட பேருந்து நிறுத்தங்கள் அமைக்க திட்டம்

பெருநிறுவனங்களின் சமூகப் பொறுப்பு நிதி (Corporate Social Responsibility - CSR) மூலம் சென்னையில் 11 நவீன குளிரூட்டப்பட்ட பேருந்து நிறுத்தங்கள் அமைப்பதற்காக பெருநகர சென்னை மாநகராட்சி மற்றும் பெருநிறுவனப் பங்களிப்பாளர்கள் இடையே புரிந்துணர்வு ஒப்பந்தங்கள் கையெழுத்தாகின. இந்த பேருந்து நிறுத்தங்கள் அண்ணாசாலை டிஎம்எஸ், மயிலாப்பூர், வடபழனி ஜவஹர்லால் நேரு சாலை, வேளச்சேரி விஜயநகர் பேருந்து முனையம், வடபழனி சிம்ஸ் மருத்துவமனை நுழைவு மற்றும் வெளியேறும் வழிகள், கிண்டி சின்னமலை, ஆற்காடு சாலை ஆவிச்சி பள்ளி, ஆலந்தூர் மெட்ரோ, எழும்பூர் வடக்கு மற்றும் எழும்பூர் தெற்கு ஆகிய இடங்களில் அமைக்கப்படவுள்ளன. இதற்கான ஒப்பந்தங்கள் சென்னை ரிப்பன் மாளிகையில் மாநகராட்சி ஆணையர் ஜி.எஸ். சமீரன் மற்றும் காவல் ஆணையர் ஏ. அமல்ராஜ் முன்னிலையில் கையெழுத்தாகின. புதிய பேருந்து நிறுத்தங்களில் குளிரூட்டப்பட்ட காத்திருப்பு அறை, 24 மணி நேர சிசிடிவி கண்காணிப்பு, இலவச வைஃபை, மாற்றுத்திறனாளிகளுக்கான சாய்வுதள வசதி, பேருந்து வழித்தட தகவல் திரைகள், மின் விளக்குகள், வெப்பத்தைத் தாங்கும் கூரை, பாதுகாப்புக் கண்ணாடி மற்றும் யுஎஸ்பி செல்போன் சார்ஜிங் வசதி இடம்பெறவுள்ளது.

கட்டுமான மற்றும் கிக் தொழிலாளர்களுக்கு புதிய நலத்திட்ட அறிவிப்புகள்

தமிழ்நாடு சட்டப்பேரவையில் தொழிலாளர் நலன் மற்றும் திறன் மேம்பாட்டுத் துறை மானியக் கோரிக்கை மீதான விவாதத்தின்போது அமைச்சர் ஜா. முகமது பர்வேஸ் 15 புதிய அறிவிப்புகளை வெளியிட்டார். சிறந்த கட்டுமானத் தொழிலாளர்களுக்கு மாவட்ட மற்றும் மாநில அளவிலான போட்டிகள் மூலம் ஆண்டுதோறும் முதல்வரின் கட்டுமானத் தொழிலாளர் வெற்றி விருதுகள் மற்றும் பரிசுத்தொகை வழங்கப்படும். நவீன தொழில்நுட்பப் பயிற்சிக்காக 5 அரசு தொழிற்பயிற்சி நிலையங்களில் (ITI) ரூ.76.46 கோடி செலவில் கட்டுமானத் தொழில் திறன்மிகு மையங்கள் அமைக்கப்படும்; வேலை தேடி வரும் தொழிலாளர்களுக்காக சென்னை மற்றும் கோவையில் ரூ.14 கோடி செலவில் தங்குமிட வசதிகள் ஏற்படுத்தப்படும். தமிழ்நாடு கட்டுமான வெற்றிக் கரங்கள் திட்டத்தின் கீழ் ரூ.15.06 கோடி செலவில் 1,000 தொழிலாளர்களுக்கு வெளிநாட்டு வேலைவாய்ப்புக்கான சர்வதேச தரப் பயிற்சி வழங்கப்படும். மேலும், 50,000 தொழிலாளர்களுக்கு தச்சு, மின்பணி மற்றும் பிளம்பிங் துறைகளில் 7 நாள் பயிற்சி அளிக்கப்பட்டு, பயிற்சிக் காலத்தில் நாள் ஒன்றுக்கு ரூ.800 ஊதிய இழப்பீடு வழங்கப்படும். இணையவழி தளங்களில் பணிபுரியும் கிக் தொழிலாளர்களுக்கு ரூ.10 லட்சம் விபத்துக் காப்பீடு வழங்கப்படும்; 1,000 கிக் தொழிலாளர்கள் இ-பைக் வாங்க பெறும் கடனுக்கான வட்டித் தொகையை அரசே ஏற்கும். புதிய மின்சார ஆட்டோ வாங்க 1,000 அமைப்புசாரா ஓட்டுநர்களுக்கு 50% மானியம் அல்லது அதிகபட்சம் ரூ.75,000 வழங்கப்படும்; பயன்பாட்டில் உள்ள ஆட்டோக்களை CNG-க்கு மாற்ற 1,000 ஓட்டுநர்களுக்கு 50% மானியம் அல்லது அதிகபட்சம் ரூ.30,000 வழங்கப்படும். TNPSC மற்றும் ஆசிரியர் தேர்வுகளுக்குத் தயாராகும் மாணவர்களுக்கான மெய்நிகர் கற்றல் தளத்தின் நிதி ஒதுக்கீடு ரூ.25 லட்சமாக உயர்த்தப்படும். மேலும், ரூ.7.33 கோடி செலவில் ஐடிஐ - வெளிநாட்டு வேலைவாய்ப்பு வெற்றி திட்டம் செயல்படுத்தப்பட்டு, ஐடிஐ மாணவர்களுக்கு வெளிநாட்டு வேலைவாய்ப்பு வாய்ப்புகள் ஏற்படுத்தப்படும்.

இந்திய விமானப்படையின் முதல் பெண் ஏர் வைஸ் மார்ஷலாக சக்தி சர்மா நியமனம்

இந்திய விமானப்படையின் (Indian Air Force - IAF) மருத்துவம் அல்லாத பிரிவின் முதல் பெண் ஏர் வைஸ் மார்ஷலாக சக்தி சர்மா நியமிக்கப்பட்டுள்ளார். முன்னதாக ஏர் கமோடார் பதவியில் இருந்த அவர், தற்போது புதுதில்லியில் உள்ள விமானப்படை தலைமையகத்தில் உதவி விமானப்படை தலைமை அதிகாரி (கல்வி) [Assistant Chief of Air Staff (Education)] ஆகப் பொறுப்பேற்றுள்ளார். சக்தி சர்மா 1994 ஜூன் 18 அன்று இந்திய விமானப்படையின் கல்விப் பிரிவில் தனது பணியைத் தொடங்கினார். மேலும், முப்படைகளைச் சேர்ந்த பெண் அதிகாரிகளில் கபூர்தலா சைனிக் பள்ளியின் முதல்வராகப் பணியாற்றிய முதல் பெண் அதிகாரி என்ற சாதனையையும் அவர் படைத்துள்ளார்.

ரூ.237.56 கோடியில் 9 புதிய மகளிர் தொழிற்பூங்காக்கள் அமைக்கப்படும்

தமிழக சட்டப்பேரவையில் குறு, சிறு மற்றும் நடுத்தரத் தொழில் நிறுவனங்கள் (MSME) துறை மானியக் கோரிக்கை விவாதத்தின்போது அமைச்சர் பெ. மதன்ராஜா பல்வேறு தொழில் வளர்ச்சி மற்றும் நிதியுதவி அறிவிப்புகளை வெளியிட்டார். 8 மாவட்டங்களில் 9 இடங்களில் ரூ.237.56 கோடி செலவில் புதிய மகளிர் தொழிற்பூங்காக்கள் அமைக்கப்படவுள்ளன; இதில் மதுரை, திருச்சிராப்பள்ளி, திருப்பத்தூர், தூத்துக்குடி மற்றும் திருநெல்வேலி உள்ளிட்ட மாவட்டங்கள் அடங்கும். திருவள்ளூர் மற்றும் காஞ்சிபுரம் மாவட்டங்களில் ரூ.234.38 கோடி செலவில் 5 புதிய தொழிற்பேட்டைகள் அமைக்கப்படும். கிருஷ்ணகிரியில் 60.36 ஏக்கரில் ரூ.48.08 கோடி செலவில் மருந்தியல் பூங்கா, திருச்சிராப்பள்ளி சூரியூரில் 5 ஏக்கரில் ரூ.2.06 கோடி செலவில் மருத்துவத் தொழில்நுட்பப் பூங்கா, திருவண்ணாமலை மாவட்டம் செங்கத்தில் 75 ஏக்கரில் ரூ.18 கோடி செலவில் தொழிற்பூங்கா மற்றும் விழுப்புரத்தில் 26.85 ஏக்கரில் ரூ.20.60 கோடி செலவில் புதிய சிட்கோ தொழிற்பேட்டை அமைக்கப்படும். மேலும், கன்னியாகுமரி மற்றும் சேலத்தில் ரூ.30.88 கோடி செலவில் புதிய தொழிற்பேட்டைகள், கோவையில் ரூ.11.50 கோடி செலவில் தென்னை நார் தொழிற்பேட்டை அமைக்கப்படும். நிலுவையிலுள்ள முதலீட்டு மானியங்களை வழங்க ரூ.600 கோடி, செயற்கை நுண்ணறிவு மற்றும் நவீன தொழில்நுட்பங்களைப் பயன்படுத்தும் நிறுவனங்களுக்கு ரூ.30 கோடி, மின்சார வாகன உதிரிபாக உற்பத்தியை ஊக்குவிக்க ரூ.20 கோடி மற்றும் குறு உற்பத்தி நிறுவனங்களுக்கான விளிம்புத் தொகை உதவித் திட்டத்திற்கு ரூ.100 கோடி ஒதுக்கப்படும். ரூ.100 கோடியில் புத்தொழில் முதலீட்டு நிதி உருவாக்கப்படும்; ஸ்டார்ட்-ஸ்மார்ட் சிட்டி ஃபண்ட் மூலம் புதிய தொழில் நிறுவனங்களுக்கு ரூ.25 லட்சம் நிதியுதவி வழங்கப்படும். திண்டுக்கல் பூட்டு, ஆத்தங்குடி டைல்ஸ் மற்றும் தென்னை நார் பொருட்கள் உள்ளிட்டவற்றுக்காக ரூ.32.95 கோடியில் 4 புதிய பொது வசதி மையங்கள் அமைக்கப்படும்; சேலம் பெரிய சீரகப்பாடியில் உள்ள இளம்பிள்ளை நெசவுக் குழுமத்திற்கு ரூ.9.89 கோடியில் பொது வசதி மையம் அமைக்கப்படும். சிட்கோ தொழிற்பேட்டைகளில் ஒதுக்கீடு பெறும் நிறுவனங்கள் செயல்பாட்டைத் தொடங்குவதற்கான கால அவகாசம் 3 ஆண்டுகளாகவும், மனை ஒதுக்கீட்டுத் தொகையைச் செலுத்துவதற்கான கால அவகாசம் 9 மாதங்களாகவும் நீட்டிக்கப்படும். மேலும், ஒரு மாவட்டம் ஒரு தயாரிப்பு (ODOP) காட்சிப்படுத்தும் நிகழ்ச்சிகள் செயல்படுத்தப்படவுள்ளன.

தேசியச் செய்திகள்

19-வது சர்வதேச பூமி அறிவியல் ஒலிம்பியாட்டில் இந்தியா 9 பதக்கங்கள் வென்றது

இத்தாலியின் டோரினோ நகரில் நடைபெற்ற 19-வது சர்வதேச பூமி அறிவியல் ஒலிம்பியாட் (International Earth Science Olympiad - IESO) போட்டியில் இந்தியா 9 பதக்கங்களை வென்றது. இப்போட்டியில் 42-க்கும் மேற்பட்ட நாடுகளைச் சேர்ந்த அணிகள் பங்கேற்றன. சௌமிக் மண்டல், ஆரோன் மைதி, ரித்தி ரஞ்சன் மற்றும் முகமது எஹ்தேஷாம் ரிஸ்வி ஆகியோர் இந்தியா சார்பில் பங்கேற்றனர். பன்னாட்டு கூட்டு கள ஆய்வுப் பிரிவில், ரித்தி ரஞ்சன் மற்றும் சௌமிக் மண்டல் தங்கப் பதக்கங்களையும், எஹ்தேஷாம் ரிஸ்வி வெள்ளிப் பதக்கத்தையும், ஆரோன் மைதி வெண்கலப் பதக்கத்தையும் வென்றனர். பூமி அறிவியல் திட்டப் பிரிவில், ஆரோன் மைதி தங்கப் பதக்கத்தையும், ரித்தி ரஞ்சன் மற்றும் சௌமிக் மண்டல் வெள்ளிப் பதக்கங்களையும், எஹ்தேஷாம் ரிஸ்வி வெண்கலப் பதக்கத்தையும் வென்றனர். தனிநபர் எழுத்து மற்றும் செய்முறைத் தேர்வில், சௌமிக் மண்டல் தங்கப் பதக்கம் வென்றதுடன், சர்வதேச பூமி அறிவியல் ஒலிம்பியாட்டின் 19 ஆண்டுகால வரலாற்றில் மூன்றாவது உயர்ந்த தனிநபர் தரவரிசையையும் பெற்றார்.

EVM வாக்கு எண்ணிக்கையில் டோட்டலைசர் பயன்பாடு குறித்து மத்திய அரசுக்கு உச்சநீதிமன்ற நோட்டீஸ்

மின்னணு வாக்குப்பதிவு இயந்திரங்களின் (EVM) வாக்கு எண்ணிக்கை முறையில் டோட்டலைசர்களை (Totalisers) பயன்படுத்துவது தொடர்பாக மத்திய அரசின் பதிலை உச்சநீதிமன்றம் கோரியுள்ளது. வழக்கறிஞர் அஸ்வினி குமார் உபாத்யாய தாக்கல் செய்த மனுவை விசாரித்தபோது இந்த நடவடிக்கை எடுக்கப்பட்டது. டோட்டலைசர் என்பது கேபிள் மூலம் அதிகபட்சம் 14 EVM கட்டுப்பாட்டு அலகுகளை (Control Units) இணைத்து, ஒவ்வொரு வாக்குச்சாவடியின் தனிப்பட்ட வாக்கு விவரங்களை வெளியிடாமல் ஒருங்கிணைந்த முடிவை வழங்கும் கருவியாகும். இந்திய தேர்தல் ஆணையம் (ECI) டோட்டலைசர்களின் பயன்பாடு வெளிப்படைத்தன்மையைப் பாதிக்கக்கூடும் என்றும், தனித்தனி EVM இயந்திரங்களின் செயல்பாட்டைச் சரிபார்ப்பதில் சிரமம் ஏற்படலாம் என்றும் தெரிவித்துள்ளது. மேலும், மக்கள் பிரதிநிதித்துவச் சட்டம் (Representation of the People Act) மற்றும் 1961-ஆம் ஆண்டு தேர்தல் நடத்தை விதிகள் (Conduct of Election Rules, 1961) ஆகியவற்றில் டோட்டலைசர் பயன்பாட்டிற்கான சட்டப்பூர்வ ஏற்பாடு தற்போது இல்லை என்று தேர்தல் ஆணையம் சுட்டிக்காட்டியுள்ளது. தற்போதைய வாக்கு எண்ணிக்கை முறையில் படிவம் 17C (Form 17C) மற்றும் வாக்குச்சாவடி வாரியான, EVM வாரியான வாக்கு விவரங்கள் முக்கியமானவை என்றும் தெரிவிக்கப்பட்டுள்ளது. இந்திய சட்ட ஆணையம் (Law Commission of India) தனது 255-வது அறிக்கையில், டோட்டலைசர்களைத் தேர்ந்தெடுக்கப்பட்ட முறையில் பயன்படுத்த பரிந்துரைத்துள்ளது.

இந்திய ஆயுள் காப்பீட்டுக் கழகம் 70 ஆண்டுகளை நிறைவு செய்தது

இந்திய ஆயுள் காப்பீட்டுக் கழகம் (LIC) தனது 70 ஆண்டுகால சேவையை 2026 செப்டம்பர் 1 அன்று நிறைவு செய்தது. எல்ஐசி 1956 செப்டம்பர் 1 அன்று இந்திய அரசின் ரூ.5 கோடி ஆரம்ப மூலதனப் பங்களிப்புடன் நிறுவப்பட்டது. 245 இந்திய மற்றும் வெளிநாட்டு காப்பீட்டு நிறுவனங்கள் மற்றும் சேமநிதி அமைப்புகள் இணைக்கப்பட்டு ஒரே சட்டப்பூர்வக் கழகமாக எல்ஐசி உருவாக்கப்பட்டது. குடும்பங்களின் சேமிப்புக்கு பாதுகாப்பான வாய்ப்பை வழங்குவதும், மக்களின் சேமிப்பை நாட்டின் வளர்ச்சிக்கான மூலதனமாகத் திரட்டுவதும் எல்ஐசியின் முக்கிய நோக்கங்களாகும். சுமார் ரூ.400 கோடி மதிப்பிலான சொத்துகளுடன் தனது பயணத்தைத் தொடங்கிய எல்ஐசி, தற்போது ரூ.57.29 லட்சம் கோடி மதிப்பிலான நிர்வகிக்கப்படும் சொத்துகளை (Assets Under Management - AUM) கொண்டுள்ளது. இதில், புத்தக மதிப்பின் அடிப்படையில் ரூ.34.85 லட்சம் கோடி மத்திய மற்றும் மாநில அரசுப் பத்திரங்களில் முதலீடு செய்யப்பட்டுள்ளது. அனைத்து தனியார் காப்பீட்டு நிறுவனங்களும் இணைந்து தீர்வு கண்ட கோரிக்கைகளை விட அதிகமான காப்பீட்டு கோரிக்கைகளுக்கு எல்ஐசி தீர்வு கண்டுள்ளது.