TNPSC தேர்வுக்கான முக்கிய தினசரி நடப்பு நிகழ்வுகள் – 07-08-2026

முக்கிய தினங்கள்

தேசிய கைத்தறி தினம் 2026

இந்தியா, 2026 ஆகஸ்ட் 7 அன்று 12-வது தேசிய கைத்தறி தினத்தை கொண்டாடியது. கைத்தறித் துறை, இந்தியாவின் மிகப்பெரிய குடிசைத் தொழிலாக இருந்து 35 லட்சத்திற்கும் மேற்பட்ட நெசவாளர்களின் வாழ்வாதாரத்தை ஆதரிக்கிறது. இவர்களில் சுமார் 72% பேர் பெண்கள் ஆவர். இத்துறையை மேம்படுத்த மூலப்பொருள் விநியோகத் திட்டம் (Raw Material Supply Scheme), 797 கைத்தறி கிளஸ்டர்கள், மற்றும் 1.24 லட்சம் மேம்படுத்தப்பட்ட தறிகள் செயல்படுத்தப்பட்டுள்ளன. நெசவாளர்களுக்கு பயிற்சி மற்றும் சந்தை இணைப்புகளை 29 நெசவாளர் சேவை மையங்கள் (Weavers’ Service Centres) மற்றும் 11 இந்திய கைத்தறி தொழில்நுட்பக் கழகங்கள் (Indian Institutes of Handloom Technology – IIHT) வழங்குகின்றன. Handloom 4.0 முயற்சியின் கீழ் செயற்கை நுண்ணறிவு (AI) மற்றும் டிஜிட்டல் தொழில்நுட்பங்கள் உற்பத்தித் திறன் மற்றும் தரத்தை மேம்படுத்தப் பயன்படுத்தப்படுகின்றன. இந்தியாவின் முக்கிய கைத்தறி மரபுகளில் வங்காள மஸ்லின், பனாரசி பட்டு, காஞ்சிபுரம் பட்டு, மற்றும் போச்சம்பள்ளி இகாட் உலகப் புகழ்பெற்றவையாகும்.

அறிவியல் மற்றும் தொழில்நுட்பச் செய்திகள்

கர்நாடகாவில் AI அடிப்படையிலான டிஜிட்டல் பயிர் ஆய்வு

கர்நாடக அரசு, ஒருங்கிணைந்த டிஜிட்டல் பயிர் ஆய்வு (Composite Digital Crop Survey – CDCS) திட்டத்தை ஐந்து தேர்ந்தெடுக்கப்பட்ட ஹோப்ளிகளில் (கிராமக் குழுக்கள்) முன்னோடி திட்டமாக தொடங்கியுள்ளது. கர்நாடகா, 2018 முதல் மொபைல் செயலி மூலம் நில அளவிலான பயிர் தரவுகளை சேகரிக்கும் டிஜிட்டல் பயிர் ஆய்வை (Digital Crop Survey) செயல்படுத்தி வருகிறது. தற்போதைய பயிர் ஆய்வு அமைப்பில் செயற்கை நுண்ணறிவு (AI) உள்ளிட்ட நவீன தொழில்நுட்பங்களை ஒருங்கிணைத்து உருவாக்கப்பட்டுள்ள CDCS, பயிர் தரவுகளின் துல்லியம் மற்றும் அறிவியல் பூர்வமான சரிபார்ப்பை மேம்படுத்தும் நோக்கத்துடன் அறிமுகப்படுத்தப்பட்டுள்ளது.

இந்தியாவின் இரண்டாவது அறிவியல் செயற்கைக்கோள் திட்டம்

1976 ஆகஸ்ட் 7-ஆம் தேதியிட்ட ஆவணச் செய்தியின்படி, இந்தியாவின் இரண்டாவது செயற்கைக்கோளான Satellite for Earth Observation (SEO)-வின் பொறியியல் மாதிரி பெங்களூரு பீன்யாவில், இந்திய அறிவியல் செயற்கைக்கோள் திட்டம் (Indian Scientific Satellite Project – ISSP) மூலம் உருவாக்கப்பட்டு வந்தது. இந்தத் திட்டத்தின் இயக்குநராக டாக்டர் யு. ஆர். ராவ் செயல்பட்டார். SEO செயற்கைக்கோள் புவி கண்காணிப்பு தொடர்பான ஆய்வுகளை மேற்கொள்வதற்காக வடிவமைக்கப்பட்டு, வானிலையியல் (Meteorology), கடலியல் (Oceanography) மற்றும் வனவியல் (Forestry) துறைகளில் பயன்படும் வகையில் உருவாக்கப்பட்டது. இந்த செயற்கைக்கோளை 1977–78-ஆம் ஆண்டில் சோவியத் ஒன்றியம் (USSR) விண்வெளி ஏவுதளத்திலிருந்து ஏவ திட்டமிடப்பட்டது. இது இந்தியாவின் முதல் செயற்கைக்கோளான ஆரியபட்டா (Aryabhata)-வின் வெற்றிக்குப் பிந்தைய முக்கியமான கட்டமாகும்.

அக்னி-4 ஏவுகணை வெற்றிகரமான சோதனை

அக்னி-4 (Agni-4) என்ற நடுத்தர தூர பாலிஸ்டிக் ஏவுகணை, ஒடிசா மாநிலம், சந்திப்பூரில் உள்ள ஒருங்கிணைந்த சோதனைத் தளம் (Integrated Test Range – ITR) இலிருந்து வெற்றிகரமாகச் சோதனை செய்யப்பட்டது. இந்தச் சோதனை ஸ்ட்ராடஜிக் போர்சஸ் கமாண்ட் (Strategic Forces Command – SFC) மேற்பார்வையில் நடத்தப்பட்டது. இந்த ஏவுதல் மூலம் ஏவுகணையின் செயல்பாட்டு மற்றும் தொழில்நுட்ப அளவீடுகள் அனைத்தும் உறுதிப்படுத்தப்பட்டன. அக்னி-4 என்பது உள்நாட்டிலேயே உருவாக்கப்பட்ட நடுத்தர தூர பாலிஸ்டிக் ஏவுகணையாகும். இது வழக்கமான மற்றும் அணு ஆயுத சுமைகளை ஏந்திச் செல்லும் திறன் கொண்டது. இந்தச் சோதனை ஏவுகணையின் செயல்பாட்டுத் தயார்நிலையை உறுதிப்படுத்தியுள்ளது.

தமிழ்நாடு வேளாண்மையில் செயற்கை நுண்ணறிவு தொழில்நுட்பம்

தமிழ்நாடு அரசு, வேளாண் உற்பத்தித் திறனை மேம்படுத்தவும், காலநிலை அபாயங்களை குறைக்கவும், மகசூலை அதிகரிக்கவும் தொழில்நுட்ப அடிப்படையிலான திட்டங்களை செயல்படுத்துகிறது. 285 ஒழுங்குமுறை விற்பனைக்கூடங்கள், 213 தேசிய வேளாண் சந்தைகள் (e-NAM) மற்றும் 194 உழவர் சந்தைகள் ஆகியவற்றின் தரவுகளை ஒருங்கிணைத்து வேளாண் நுண்ணறிவு மற்றும் சந்தைப்படுத்தல் சிறப்பு மையம் (Agriculture Intelligence and Marketing Excellence Centre – AIMEC) அமைக்கப்பட உள்ளது. விவசாய இயந்திரமயமாக்கலுக்காக ₹227 கோடி ஒதுக்கப்பட்டுள்ளது. செயற்கை நுண்ணறிவு (AI) மற்றும் இயந்திரக் கற்றல் (Machine Learning) தொழில்நுட்பங்கள், செயற்கைக்கோள் படங்கள் மற்றும் இந்திய வானிலை ஆய்வு மையம் (IMD) தரவுகளுடன் இணைந்து வானிலை எச்சரிக்கை, மண் வளத் தகவல் மற்றும் நோய் கட்டுப்பாட்டு ஆலோசனைகளை வழங்க பயன்படுத்தப்படும். வெற்றி வான்மகள் திட்டத்தின் கீழ் 100 பெண்கள் உட்பட 500 விவசாயிகளுக்கு ட்ரோன் இயக்கப் பயிற்சி வழங்கப்பட்டு, 50 பெண்களுக்கு 50% மானியத்தில் ட்ரோன்கள் வழங்கப்பட உள்ளன. இதற்காக ₹2.5 கோடி ஒதுக்கப்பட்டுள்ளது. அறுவடைக்குப் பிந்தைய இழப்புகளை குறைக்க குளிர்பதனக் கிடங்குகள், ஏற்றுமதி மையங்கள், மற்றும் உணவு பதப்படுத்துதல் மையங்கள் ஆகியவற்றில் முதலீடுகள் மேற்கொள்ளப்படுகின்றன. கும்பகோணம் அருகே சாக்கோட்டையில், இயற்கை விவசாய முன்னோடி கோ. நம்மாழ்வார் பெயரில் ₹15 கோடி செலவில் இயற்கை விவசாய நிறுவனம் அமைக்கப்பட உள்ளது.

பயோ எனர்ஜி வளர்ச்சிக்கான கோபர்தன் திட்டத்திற்கு ஒப்புதல்

மத்திய அமைச்சரவை தேசிய வட்டார பயோ எனர்ஜி திட்டம் (GOBARdhan) செயல்படுத்த ₹23,731 கோடி நிதி ஒதுக்கீட்டிற்கு ஒப்புதல் அளித்துள்ளது. இத்திட்டம் 2026-27 முதல் 2035-36 நிதியாண்டு வரை செயல்படுத்தப்பட்டு, உள்நாட்டு சுருக்கப்பட்ட பயோகேஸ் (Compressed Biogas - CBG) உற்பத்தியை 10 மடங்கு அதிகரிப்பதை நோக்கமாகக் கொண்டுள்ளது. விவசாய கழிவுகள், கால்நடை சாணம், பிரஸ் மட், நகராட்சி கரிமக் கழிவுகள் மற்றும் பிற உயிரிப்பொருட்களை தூய்மையான எரிபொருள் மற்றும் கரிம உரமாக மாற்றுவது இத்திட்டத்தின் முக்கிய நோக்கமாகும். உறுதியான கொள்முதல், விலை நிலைத்தன்மை, மூலதன உதவி, குழாய் உள்கட்டமைப்பு, கடன் உத்தரவாதம் மற்றும் கண்டுபிடிப்பு ஆதரவு ஆகியவற்றின் மூலம் CBG மதிப்புச் சங்கிலியை ஒருங்கிணைக்கிறது. SATAT (Sustainable Alternative Towards Affordable Transportation), Market Development Assistance (MDA) திட்டம், Biomass Aggregation Machinery (BAM) திட்டம், Development of Pipeline Infrastructure (DPI) திட்டம் மற்றும் தேசிய பயோ எனர்ஜி திட்டம் ஆகியவற்றின் தொடர்ச்சியாக இத்திட்டம் அமைந்துள்ளது. CNG (போக்குவரத்து) மற்றும் PNG (உள்நாட்டு) பயன்பாட்டிற்கான கலப்பு இலக்காக 2026-27ல் 3%, 2027-28ல் 4%, 2028-29 முதல் 5% நிர்ணயிக்கப்பட்டுள்ளது. பசுமைத் திட்டங்களுக்கு ஒரு நாளுக்கு ஒரு டன் உற்பத்திக்கு (TPD) அதிகபட்சம் ₹2 கோடி வரை மூலதன உதவி வழங்கப்படும். மேலும் MSME திட்டங்களுக்கு கடன் உத்தரவாத ஆதரவு வழங்கப்படுகிறது. இதனுடன், பொருளாதார விவகாரங்களுக்கான அமைச்சரவைக் குழு (CCEA), அசாம் மாநிலம் NH-15 இல் உள்ள 135.87 கி.மீ. குவஹாத்தி–தேஜ்பூர் நான்கு வழிச்சாலை திட்டத்திற்கு ₹8,970.20 கோடி செலவில் Build-Operate-Transfer (BOT) Toll முறையில் ஒப்புதல் அளித்துள்ளது.

பொருளாதாரச் செய்திகள்

வரிவிதிப்பு மற்றும் இதர சட்டங்கள் (திருத்த) மசோதா, 2026

மக்களவை, வரிவிதிப்பு மற்றும் இதர சட்டங்கள் (திருத்த) மசோதா, 2026-ஐ நிறைவேற்றியது. இந்த மசோதா, 2026 ஜூன் 5 அன்று வெளியிடப்பட்ட அவசரச் சட்டத்திற்கு (Ordinance) மாற்றாக கொண்டு வரப்பட்டுள்ளது. இது உள்நாட்டு மின்னணு உற்பத்தியை ஊக்குவித்தல், வெளிநாட்டு முதலீடுகளை ஈர்த்தல் மற்றும் UPI மற்றும் RuPay பரிவர்த்தனைகளுக்கான பூஜ்ஜிய வணிக தள்ளுபடி விகித (Zero Merchant Discount Rate – Zero-MDR) அமைப்பில் மாற்றங்களைச் செய்வதற்கு சட்டப்பூர்வ ஆதரவை வழங்குகிறது. மேலும், பணம் செலுத்துதல் மற்றும் தீர்வு முறைச் சட்டம் (Payment and Settlement Systems Act) மற்றும் வருமான வரிச் சட்டம் (Income Tax Act) ஆகியவற்றுக்கு இடையிலான இணைப்பை நீக்க இந்த மசோதா முன்மொழிகிறது. அரசுப் பத்திரங்களில் (Government Securities – G-Secs) முதலீடு செய்த வெளிநாட்டு போர்ட்ஃபோலியோ முதலீட்டாளர்களுக்கு (Foreign Portfolio Investors – FPIs) கிடைக்கும் வட்டி வருமானம் மற்றும் மூலதன ஆதாயங்களுக்கு வழங்கப்பட்ட வருமான வரி விலக்கு தொடர்கிறது. மேலும், தேர்ந்தெடுக்கப்பட்ட UPI பரிவர்த்தனைகளுக்கு வணிகக் கட்டணங்களை (Merchant Charges) விதிக்க அரசுக்கு அதிகாரம் வழங்கும் வகையிலும் இந்த மசோதா அமைந்துள்ளது.

சுற்றுச்சூழல் செய்திகள்

தமிழ்நாட்டில் சூப்பர் எல் நினோ தாக்கத்திற்கான அவசரகாலத் திட்டங்கள்

சூப்பர் எல் நினோ நிகழ்வின் சாத்தியமான தாக்கங்களை எதிர்கொள்ள தமிழ்நாடு அரசு, மாவட்ட அளவிலான அவசரகாலத் திட்டங்களை (Contingency Plans) தயாரித்துள்ளது. அரியலூர், தர்மபுரி, திண்டுக்கல், கிருஷ்ணகிரி, நாமக்கல், நீலகிரி, பெரம்பலூர், ராமநாதபுரம், திருச்சிராப்பள்ளி, திருப்பத்தூர், வேலூர் மற்றும் விருதுநகர் ஆகிய 12 மாவட்டங்கள் பாதிப்புக்குள்ளாகும் பகுதிகளாக அடையாளம் காணப்பட்டுள்ளன. காலநிலை மாற்றத்தின் தாக்கத்தை கருத்தில் கொண்டு, நடப்பு நிதியாண்டிற்கான உணவு தானிய உற்பத்தி இலக்கு 1.25 கோடி டன்னாக நிர்ணயிக்கப்பட்டுள்ளது. தமிழ்நாடு வேளாண்மைப் பல்கலைக்கழகம் (TNAU) தயாரித்த மாவட்ட அளவிலான அவசரகாலத் திட்டங்கள் மாவட்ட நிர்வாகங்களுக்கு அனுப்பப்பட்டுள்ளன. விவசாயிகள் வறட்சியைத் தாங்கும் மற்றும் குறுகிய கால நெல் ரகங்களை பயிரிடவும், பொட்டாசியம் குளோரைடு, கயோலின், மற்றும் பிங்க்-பிக்மென்டட் ஃபாகுல்டேடிவ் மெத்திலோட்ரோஃப் (PPFM) தெளிப்புகளைப் பயன்படுத்தவும் அறிவுறுத்தப்பட்டுள்ளனர். தமிழ்நாட்டில் குறுவை நெல் சாகுபடி பரப்பு 8.4 லட்சம் ஏக்கராக உள்ளது; குறுகிய காலப் பயிர்களுக்கான பயிர் காப்பீட்டு பரப்பு 4 லட்சம் ஏக்கராக அதிகரித்துள்ளது. மண்டல வானிலை ஆய்வு மையம் (Regional Meteorological Centre), எல் நினோ காரணமாக மழை குறைய வாய்ப்புள்ளதாகவும், நேர்மறை இந்தியப் பெருங்கடல் இருமுனை (Positive Indian Ocean Dipole – IOD) அதன் தாக்கத்தை ஓரளவு குறைக்கக்கூடும் என்றும் தெரிவித்துள்ளது.

பிரபலமானவர்கள், விருதுகள் மற்றும் நிகழ்வுகள்

காலநிலை மாற்ற விழிப்புணர்வுக்கான கட்டைக்கூத்து

கட்டைக்கூத்து, மகாபாரதம் மற்றும் புராணக் கதைகளை அடிப்படையாகக் கொண்ட பாரம்பரியத் தமிழ் நாடகக் கலை வடிவமாகும். இந்தக் கலை வடிவத்தைப் பயன்படுத்தி காலநிலை மாற்ற விழிப்புணர்வை கலைஞர் திலகவதி பழனி ஏற்படுத்தி வருகிறார். இவர் ஸ்ரீ திலகம் கட்டைக்கூத்து குழு என்ற அமைப்பைத் தொடங்கி, “வெப்பத்தின் வெறியாட்டம்” என்ற நிகழ்ச்சியை நடத்தி வருகிறார். இந்நிகழ்ச்சியில் புவி வெப்பமடைதல், பசுமை இல்ல விளைவு, மரங்களைப் பாதுகாத்தல் மற்றும் நீர் சேமிப்பு போன்ற காலநிலை தொடர்பான கருத்துகள் எடுத்துரைக்கப்படுகின்றன. இவர் ராணிப்பேட்டை, வாலாஜாபேட்டை, மற்றும் திருவண்ணாமலை மாவட்டங்களில் உள்ள பள்ளிகளில் விழிப்புணர்வு நிகழ்ச்சிகளை நடத்தி வருகிறார். மேலும் சென்னை பல்கலைக்கழகத்தின் கிண்டி வளாகம் மற்றும் எம்.எஸ். சுவாமிநாதன் ஆராய்ச்சி நிறுவனம் (MSSRF) ஆகிய இடங்களிலும் நிகழ்ச்சிகள் நடத்தப்பட்டுள்ளன. பாரம்பரியக் கலை வடிவத்தின் மூலம் மாணவர்களிடம் காலநிலை மாற்றம் குறித்த விழிப்புணர்வு ஏற்படுத்தப்படுகிறது.

தேசியச் செய்திகள்

வெளிநாட்டு நிதி (ஒழுங்குமுறை) திருத்த மசோதா, 2026

வெளிநாட்டு நிதி (ஒழுங்குமுறை) திருத்த மசோதா, 2026 (Foreign Contribution (Regulation) Amendment Bill, 2026 – FCRA), 2026 ஆகஸ்ட் 12 அன்று நாடாளுமன்றத்தில் விவாதத்திற்கு எடுத்துக்கொள்ளப்பட உள்ளது. மத்திய உள்துறை அமைச்சர் அமித் ஷா, மிசோரம் முதலமைச்சர் லால்டுஹோமா உள்ளிட்ட கிறிஸ்தவ அமைப்புகளின் பிரதிநிதிகளைச் சந்தித்து மசோதா தொடர்பான கருத்துகளை கேட்டறிந்தார். இந்த மசோதாவின் முக்கிய அம்சமாக, ஒரு தன்னார்வத் தொண்டு நிறுவனத்தின் (NGO) FCRA பதிவு இடைநிறுத்தப்பட்டாலோ, ரத்து செய்யப்பட்டாலோ அல்லது புதுப்பிக்கப்படாவிட்டாலோ, வெளிநாட்டு நிதியால் உருவாக்கப்பட்ட சொத்துகளை நிர்வகிக்க அல்லது கையாள குறிப்பிடப்பட்ட அதிகாரியை (Designated Authority) நியமிக்கும் விதி இடம்பெற்றுள்ளது. இந்த மசோதாவை விரிவாக ஆய்வு செய்ய நாடாளுமன்றக் கூட்டுக் குழுவிற்கு (Joint Parliamentary Committee – JPC) அனுப்ப வேண்டும் என்று பிரதிநிதிகள் கோரிக்கை விடுத்தனர். திமுக நாடாளுமன்ற உறுப்பினர் பி. வில்சன் மசோதாவில் உள்ள சொத்து நிர்வாகம் தொடர்பான விதிகளை மறுபரிசீலனை செய்ய வேண்டுமென வலியுறுத்தினார்.

எஸ்சி/எஸ்டி இடஒதுக்கீட்டில் கிரீமி லேயர் குறித்து மத்திய அரசின் நிலைப்பாடு

மத்திய அரசு, பட்டியலினத்தினர் (SC) மற்றும் பழங்குடியினர் (ST) இடஒதுக்கீட்டில் கிரீமி லேயர் கொள்கையை அமல்படுத்தக் கோரிய மனுக்களை உச்ச நீதிமன்றத்தில் எதிர்த்துள்ளது. சமூக நீதி மற்றும் அதிகாரமளித்தல் அமைச்சகம் தாக்கல் செய்த சத்தியப்பிரமாண வாக்குமூலத்தில், கிரீமி லேயர் கொள்கை SC மற்றும் ST பிரிவுகளுக்குப் பொருந்தாது என்று முந்தைய நீதிமன்றத் தீர்ப்புகள் தெளிவுபடுத்தியுள்ளதாக குறிப்பிடப்பட்டுள்ளது. மேலும், கல்வி நிறுவனங்கள் மற்றும் அரசுப் பணிகளில் உள்ள இடஒதுக்கீட்டைத் தவிர, SC, ST, OBC பிரிவினருக்கான பெரும்பாலான நலத்திட்டங்களில் வருமான வரம்புத் தேர்வு (Means Test) ஏற்கனவே நடைமுறையில் இருப்பதாக அரசு தெரிவித்துள்ளது. இடஒதுக்கீட்டு கொள்கையில் வருமான அடிப்படையிலான மாற்றங்களை மேற்கொள்வதற்கு முன் சமூக-பொருளாதாரத் தரவுகள் அடிப்படையிலான விரிவான அனுபவ ஆய்வு மேற்கொள்ளப்பட வேண்டும் என்றும் மத்திய அரசு வலியுறுத்தியுள்ளது. இந்த விவகாரம் SC மற்றும் ST பிரிவுகளுக்குள் உள்-ஒதுக்கீட்டை அனுமதித்த 2024 உச்ச நீதிமன்றத் தீர்ப்பை தொடர்ந்து பரிசீலனையில் உள்ளது.

மாநிலச் செய்திகள்

ஹோய்சாள வம்சம் தொடர்பான நடுகல் கண்டுபிடிப்பு

கர்நாடக மாநிலம், அரிசிகெரே தாலுகா, நீராகுண்டா கிராமத்தில் லட்சுமி நாராயண சுவாமி கோயில் புதுப்பிப்புப் பணிகளின்போது கன்னடக் கல்வெட்டுடன் கூடிய நடுகல் (வீரகல்லு) கண்டெடுக்கப்பட்டது. இக்கிராமத்தில் மல்லேஸ்வரா கோயிலும், லட்சுமி நாராயண சுவாமி கோயிலும் ஹோய்சாளர் காலத்தைச் சேர்ந்தவை. ஹோய்சாள வம்சம், 11-ஆம் நூற்றாண்டு முதல் 14-ஆம் நூற்றாண்டு வரை, இன்றைய கர்நாடகா மற்றும் தமிழ்நாட்டின் பல பகுதிகளை ஆட்சி செய்தது. இந்த நடுகல்லை, 600-க்கும் மேற்பட்ட ஹோய்சாளர் கோயில்களை ஆவணப்படுத்திய சஷிதர் எச்.ஜி. ஆய்வு செய்து அடையாளம் கண்டார். கல்வெட்டில், ஹோய்சாள மன்னர் விஷ்ணுவர்தனன் இறந்த பிறகு உயிர்நீத்த ஒரு வீரனின் நினைவாக இந்த நடுகல் நிறுவப்பட்டதாகக் குறிப்பிடப்பட்டுள்ளது. கல்வெட்டில் உள்ள தேதி 11 டிசம்பர் 1141 (கிரிகோரியன் நாட்காட்டி) என்பதற்கு இணையானதாகும். மேலும், விஷ்ணுவர்தனன் பங்காபுராவில் இறந்ததாக இக்கல்வெட்டு முக்கியமான வரலாற்றுச் சான்றை வழங்குகிறது.

தமிழ்நாடு செய்திகள்

TNHB மறுமேம்பாட்டு விவகாரத்தில் அரசு நடவடிக்கை

தமிழ்நாடு பதிவுத் துறை, மத்திய சென்னை மாவட்டப் பதிவாளருக்கு, தமிழ்நாடு அடுக்குமாடி குடியிருப்பு உரிமைச் சட்டம், 2022-ன் விதிகளின்படி தமிழ்நாடு வீட்டுவசதி வாரியம் (TNHB) உருவாக்கிய குடியிருப்புகளின் மறுமேம்பாட்டு பிரச்சனைகள் குறித்து நடவடிக்கை எடுக்கவும், குறைந்த வருமானப் பிரிவினர் (LIG) மற்றும் நடுத்தர வருமானப் பிரிவினர் (MIG) ஆகியோரின் உரிமைகளைப் பாதுகாக்கவும் உத்தரவிட்டுள்ளது. தமிழ்நாடு அடுக்குமாடி குடியிருப்பு உரிமைச் சட்டம், 2022-ன் பிரிவு 27-ன் கீழ், கோல்டன் ஜூபிலி சென்னை பிளாட் உரிமையாளர்கள் நலச் சங்கம் மேற்கொண்ட மறுமேம்பாட்டு டெண்டர் செயல்முறையில் முறைகேடுகள் ஏற்பட்டதாகக் கூறி சில குடியிருப்பாளர்கள் விசாரணை கோரியுள்ளனர். இந்த மறுமேம்பாடு சென்னை அண்ணா நகரில் அமைந்துள்ள 11.91 ஏக்கர் பரப்பளவு கொண்ட, LIG மற்றும் MIG குடியிருப்புகளுக்காக ஒதுக்கப்பட்ட TNHB நிலத்தைச் சார்ந்ததாகும். மேலும், 2023-ல் தொடங்கப்பட்டு ₹10 லட்சம் முதலீடு கொண்ட நிறுவனத்திற்கு, டெண்டர் நிபந்தனைகள் பூர்த்தி செய்யப்படவில்லை என்ற குற்றச்சாட்டுகள் எழுந்த நிலையிலும், ₹1,000 கோடி மதிப்பிலான மறுமேம்பாட்டு திட்டம் வழங்கப்பட்டதாக குடியிருப்பாளர்கள் தெரிவித்துள்ளனர். TNHB மறுமேம்பாட்டு திட்டங்கள் மலிவு விலை குடியிருப்புகளின் தன்மையைத் தக்கவைக்கும் வகையில் கொள்கை வழிகாட்டுதல்களை உருவாக்க வேண்டும் என்ற கோரிக்கையும் முன்வைக்கப்பட்டுள்ளது.

தமிழ்நாடு விவசாயிகள் நலன் மற்றும் தோட்டக்கலைத் திட்டங்கள்

தமிழ்நாடு அரசு, உயர் மதிப்புள்ள தோட்டக்கலைப் பயிர்கள் மற்றும் விவசாயிகள் நலன் தொடர்பாக பல்வேறு திட்டங்களை அறிவித்துள்ளது. புளூபெர்ரி, ரம்பூட்டான், டிராகன் ஃபுரூட், கிவி, மங்கொஸ்டீன் போன்ற உயர் மதிப்புள்ள பழப்பயிர்கள் 930 ஏக்கரில், ₹1.87 கோடி நிதியுடன் சாகுபடி செய்யப்படவுள்ளன. மேலும் தாய்லாந்து இனிப்பு புளி மற்றும் சமவெப்ப மண்டலம் அல்லாத ஆப்பிள் வகைகளும் ஊக்குவிக்கப்படுகின்றன. 2026–27 ஆம் ஆண்டில் குறுவை, சம்பா, ரபி பருவங்களில் அறிவிக்கப்பட்ட அனைத்து பயிர்களுக்கும் 37 மாவட்டங்கள் மற்றும் 14 தொகுப்புகளில், ₹648.55 கோடி ஒதுக்கீட்டுடன் பயிர் காப்பீட்டுத் திட்டம் செயல்படுத்தப்பட்டு 36 லட்சம் ஏக்கர் நிலப்பரப்பும் 15 லட்சம் விவசாயிகளும் பயனடைவார்கள். LED சாமந்தி சாகுபடி மற்றும் 10 ப்ளூ கிரீன் சூரிய சக்தி பூங்காக்கள் அமைக்க ₹5 கோடி, விவசாயிகள் வருமான மேம்பாட்டு ஆணையம் மற்றும் சென்னையில் வேளாண் வணிக வழிகாட்டுதல் மையம் அமைக்க ₹23 கோடி, எஸ்சி/எஸ்டி விவசாயிகளுக்கு 20% கூடுதல் மானியம் மற்றும் 100% ஆழ்துளைக் கிணறு/சூரிய சக்தி பம்ப் மானியம் வழங்க ₹56.72 கோடி ஒதுக்கப்பட்டுள்ளது. மேலும், 2026 பயிர் கடன் தள்ளுபடிக்காக ₹5,267 கோடி முழுமையாக விடுவிக்கப்பட்டுள்ளது. 23.98 லட்சம் விவசாய மின் இணைப்புகளுக்கு 100% இலவச மும்முனை மின்சாரம் தொடர்ந்து வழங்கப்படும். தமிழ்நாடு வேளாண்மைப் பல்கலைக்கழகம் (TNAU) காட்டுப்பன்றிகளை விரட்டும் திரவத்தை உருவாக்கியுள்ளது

தமிழ்நாடு சுகாதார பட்ஜெட் 2026–27 முக்கிய அம்சங்கள்

தமிழ்நாடு அரசு, 2026–27 பட்ஜெட்டில் சுகாதாரம் மற்றும் குடும்ப நலத்துறைக்கு ₹23,357 கோடி ஒதுக்கியுள்ளது. இது கடந்த ஆண்டை விட 6.6% அதிகரிப்பு ஆகும். இந்த நிதி புற்றுநோய் சிகிச்சை, முதியோர் பராமரிப்பு, நாட்பட்ட நோய் மேலாண்மை மற்றும் அதிக ஆபத்துள்ள கர்ப்ப பராமரிப்பு ஆகியவற்றுக்கு பயன்படுத்தப்படும். ஐந்து மண்டல புற்றுநோய் மருத்துவமனைகளுக்கான விரிவான திட்ட அறிக்கை (DPR) தயாரிக்க ₹10 கோடி ஒதுக்கப்பட்டுள்ளது. தமிழ்நாட்டில் புதிய புற்றுநோய் பாதிப்புகள் 2017-ல் 69,517 ஆக இருந்தது 2021-ல் 76,968 ஆக உயர்ந்துள்ளது என்றும், இது 2026-ல் 1,03,707 ஆக உயரும் என கணிக்கப்பட்டுள்ளது. முதியோர் சுகாதார சேவையை மேம்படுத்த 1,000 நடமாடும் முதியோர் சிகிச்சை பிரிவுகளுக்கு ₹33 கோடி ஒதுக்கப்பட்டுள்ளது. ஹப்-அண்ட்-ஸ்போக் (Hub-and-Spoke) மாதிரி அடிப்படையிலான தொலை மருத்துவ (Telemedicine) வலையமைப்பு மூலம் 5 சிறப்பு மையங்கள், 200 ஆரம்ப சுகாதார நிலையங்கள் (PHCs) மற்றும் அரசு மருத்துவமனைகளுடன் இணைக்கப்படும்; இதற்காக ₹18.5 கோடி ஒதுக்கப்பட்டுள்ளது. மாநில அரசு மருந்து நிதியை ₹100 கோடி உயர்த்தியுள்ளது. தாய் சேய் நலனை மேம்படுத்த அரசு மருத்துவமனைகளில் பிறக்கும் குழந்தைகளுக்கு ஒரு கிராம் தங்க மோதிரம் வழங்கும் “தாய் மாமன் தங்க மோதிரம் திட்டத்திற்கு” ₹560 கோடி மற்றும் மகப்பேறு ஆதரவு மையங்களுக்கான “தாய் கேர் திட்டத்திற்கு” ₹23 கோடி ஒதுக்கப்பட்டுள்ளது.

தமிழக வேளாண் பட்ஜெட்டில் வெற்றி வான்மகள் திட்டம்

ஐக்கிய நாடுகள் சபை 2026-ஆம் ஆண்டை சர்வதேச பெண் விவசாயிகள் ஆண்டாக அறிவித்ததைத் தொடர்ந்து, தமிழ்நாடு அரசு 2026-27 திருத்தப்பட்ட வேளாண் பட்ஜெட்டில் பெண்களை மையமாகக் கொண்ட பல்வேறு திட்டங்களை அறிவித்துள்ளது. வெற்றி வான்மகள் திட்டத்தின் கீழ், தமிழ்நாடு வேளாண்மைப் பல்கலைக்கழகத்தின் (TNAU) தொலைதூர பைலட் பயிற்சி அமைப்பு மூலம் 100 பெண்கள் உட்பட 500 நபர்களுக்கு ட்ரோன் இயக்கப் பயிற்சி மற்றும் பைலட் உரிமம் வழங்க ₹1.5 கோடி ஒதுக்கப்பட்டுள்ளது. பயிற்சி பெற்றவர்களில் 50 பெண்களுக்கு வேளாண் ட்ரோன்கள் 50% மானியத்தில் வழங்க ₹2.50 கோடி ஒதுக்கப்பட்டுள்ளது. இந்தத் திட்டம் உரம் மற்றும் பூச்சிக்கொல்லி தெளித்தல், பயிர் கண்காணிப்பு மற்றும் துல்லிய வேளாண்மை பணிகளுக்கு உதவுவதுடன், வேளாண் தொழிலாளர் பற்றாக்குறையை சமாளிக்க உதவும். தோட்டக்கலைத் துறையில், நகர்ப்புற மற்றும் கிராமப்புற வீடுகளில் வீட்டுத் தோட்டங்களை ஊக்குவிக்க வெற்றி இல்லத்தரசி வீட்டுத் தோட்டம் திட்டத்திற்கு ₹10 கோடி, நகரங்களில் மைக்ரோ கிரீன்ஸ் சாகுபடியை ஊக்குவிக்க தமிழ்நாடு மைக்ரோ கிரீன்ஸ் திட்டத்திற்கு ₹1.20 கோடி ஒதுக்கப்பட்டுள்ளது. மேலும், கிராமப்புற பெண்கள் மற்றும் இளைஞர்களின் வருமானத்தை அதிகரிக்க 50 சிறு அளவிலான காளான் உற்பத்தி நிலையங்கள் அமைக்க முன்மொழியப்பட்டுள்ளது. வேளாண் இயந்திரமயமாக்கல் திட்டத்தில் பெண்கள் விவசாயிகள் மற்றும் மகளிர் சுய உதவிக்குழுக்களுக்கு (SHGs) முன்னுரிமை வழங்கப்படும்.