TNPSC தேர்வுக்கான முக்கிய தினசரி நடப்பு நிகழ்வுகள் – 01-12-2025

முக்கிய தினங்கள்

நாகாலாந்து மாநில தினம் – டிசம்பர் 1

நாகாலாந்து, State of Nagaland Act, 1962 என்ற சட்டத்தின் அடிப்படையில், 1963 டிசம்பர் 1 அன்று இந்தியாவின் 16வது மாநிலமாக உருவாக்கப்பட்டது. நாகா மக்களுக்கு தனித்த நிர்வாக மற்றும் அரசியல் அடையாளத்தை வழங்கும் நோக்கில் இந்த மாநிலம் அமைக்கப்பட்டது. கோஹிமா மாநிலத்தின் தலைநகராக அறிவிக்கப்பட்டது மற்றும் ஆங்கிலம் அதிகாரப்பூர்வ மொழியாக ஏற்றுக்கொள்ளப்பட்டது. பி. சிலு ஆவ் மாநிலத்தின் முதல் முதலமைச்சராக பதவியேற்றார். இதனை நினைவுகூர்ந்து ஒவ்வோர் ஆண்டும் டிசம்பர் 1 அன்று நாகாலாந்து மாநில தினம் கொண்டாடப்படுகிறது.

உலக எய்ட்ஸ் தினம்

உலக எய்ட்ஸ் தினம் ஒவ்வோர் ஆண்டும் டிசம்பர் 1 அன்று கடைப்பிடிக்கப்படுகிறது. இதை உலக சுகாதார நிறுவனம் (WHO) 1988ஆம் ஆண்டு தொடங்கியது. இதன் நோக்கம் எய்ட்ஸ் மற்றும் எச்ஐவி நோய் குறித்து விழிப்புணர்வு ஏற்படுத்துதல் மற்றும் பாதிக்கப்பட்டவர்களுக்கு ஆதரவளித்தல் ஆகும். 2025ஆம் ஆண்டிற்கான தலைப்பு — “தடைசெயல்களை கடந்து, எய்ட்ஸ் எதிர்வினையை மாற்றுதல்” (Overcoming Disruption, Transforming the AIDS Response) — எனும் இந்தத் தீம், அரசியல் தலைமைத்துவம், சர்வதேச ஒத்துழைப்பு, மற்றும் மனித உரிமை மையக் கண்ணோட்டம் மூலம் 2030க்குள் எய்ட்ஸை முற்றிலுமாக ஒழிப்பது எனும் இலக்கை வலியுறுத்துகிறது. சிவப்பு ரிப்பன் (Red Ribbon) எய்ட்ஸ் எதிர்ப்பு உலகச் சின்னமாக பயன்படுத்தப்படுகிறது.

விளையாட்டுச் செய்திகள்

சுல்தான் அஸ்லான் ஷா கோப்பை 2025 – பெல்ஜியம் சாம்பியன்

மலேசியாவின் ஈப்போவில் நடைபெற்ற சுல்தான் அஸ்லான் ஷா கோப்பை இறுதிப் போட்டியில், பெல்ஜியம், இந்தியாவை 1-0 என்ற கோல் கணக்கில் தோற்கடித்து கோப்பையை வென்றது. 34வது நிமிடத்தில் திபியோ ஸ்டாக்ப்ரோக்ஸ் அடித்த கோல் வெற்றிக்கான முடிவாக அமைந்தது. இது பெல்ஜியத்தின் இந்தத் தொடரில் முதல் பட்டம் ஆகும்.

AFC U-17 ஆசிய கோப்பை 2026க்கு இந்தியா தகுதி பெற்றது

அகமதாபாத் EKA அரங்கில் நடைபெற்ற AFC U-17 ஆசிய கோப்பை 2026 தகுதிச் சுற்றில், இந்தியா, ஈரான் அணியை 2-1 என்ற கோல் கணக்கில் தோற்கடித்து தகுதி பெற்றது. 19வது நிமிடத்தில் அமிரேசா வாலிபூர் ஈரானுக்காக முதல் கோலை அடித்தார். பின்னர் இந்திய அணியின் கேப்டன் டல்லால்முன் காங்டே, 45+1வது நிமிடத்தில் பெனால்டி வாய்ப்பை பயன்படுத்தி சமன் கோல் அடித்தார். 52வது நிமிடத்தில் குன்லைபா வாங்கேராக்பாம் அடித்த கோலின் மூலம் இந்தியா முன்னிலை பெற்று AFC U-17 ஆசிய கோப்பை 2026 போட்டிக்கான தகுதியை உறுதி செய்தது.

சையத் மோடி சூப்பர் 300 போட்டியில் காயத்ரி கோபிசந்த்–ட்ரீஸா ஜாலி சாம்பியன் பட்டம்

உத்தரபிரதேசம் லக்னோவில் நடைபெற்ற சையத் மோடி சூப்பர் 300 சர்வதேச பேட்மிண்டன் போட்டியில், இந்திய வீராங்கனைகள் காயத்ரி கோபிசந்த் மற்றும் ட்ரீஸா ஜாலி மகளிர் இரட்டையர் பிரிவில் சாம்பியன் பட்டத்தை வென்றனர். உலக 35-ஆம் நிலை ஜப்பான் ஜோடி ஷோனா ஒயோவா – மியா லான் ஆகியோரை 17-21, 21-13, 21-15 என்ற புள்ளி கணக்கில் தோற்கடித்தனர். காயத்ரி தோள்பட்டை காயத்திலிருந்து மீண்ட பின்னர், இருவரும் 5 மாதங்கள் கழித்து இணைந்து விளையாடினர். ஆடவர் ஒற்றையர் பிரிவில், இந்தியாவின் கிடாம்பி ஸ்ரீகாந்த், ஹாங்காங் வீரர் ஜோன் ஹொவாங்கிடம் 16-21, 21-8, 20-22 என்ற புள்ளி கணக்கில் தோற்று இரண்டாம் இடம் பெற்றார். ஸ்ரீகாந்த் கடைசியாக 2017-இல் ஒரு BWF பட்டத்தை வென்றிருந்தார்.

அதிக சிக்ஸர்கள்: ரோஹித் சர்மா உலக சாதனை முறியடித்தார்

ஒருநாள் சர்வதேச கிரிக்கெட்டில் (ODI) ரோஹித் சர்மா அதிக சிக்ஸர்கள் அடித்த உலக சாதனையை முறியடித்தார். இதற்கு முன் பாகிஸ்தானின் ஷாஹித் அப்ரிடி 351 சிக்ஸர்களுடன் முதலிடத்தில் இருந்தார். ரோஹித், 349 சிக்ஸர்களுடன் இரண்டாம் இடத்தில் இருந்த நிலையில், தென் ஆப்பிரிக்கா அணிக்கு எதிரான ஆட்டத்தில் 352 சிக்ஸர்கள் அடித்து முதலிடத்தைப் பிடித்தார். அவர் இந்த சாதனையை 20-ஆவது ஓவரில், அப்ரிடியை விட 100 இன்னிங்ஸ் குறைவாக விளையாடி முறியடித்தார். மேற்கு இந்தியாவின் கிறிஸ் கெயில் 331 சிக்ஸர்களுடன் மூன்றாவது இடத்தில் உள்ளார்.

விராட் கோலி – சச்சின் டெண்டுல்கர் சாதனையை முறியடித்தார்

ஒருநாள் சர்வதேச கிரிக்கெட்டில் (ODI) விராட் கோலி, சச்சின் டெண்டுல்கர் வைத்திருந்த அதிக சதங்கள் என்ற சாதனையை முறியடித்தார். கோலி 135 ரன்கள் எடுத்துத் தனது 52-ஆவது ஒருநாள் சதத்தை பதிவு செய்து சச்சின் சாதனையை முறியடித்தார். இது அவர் 10 மாதங்கள் கழித்து அடைந்த ஒருநாள் சதமாகும்.

அறிக்கைகள் மற்றும் குறியீடுகள்

ஜம்மு-காஷ்மீரில் வணிக நிறுவனங்கள் 24 மணி நேரமும் செயல்பட புதிய சட்டம் அமல்படுத்தப்பட்டது

ஜம்மு-காஷ்மீர் அரசு, ஜம்மு-காஷ்மீர் கடைகள் மற்றும் நிறுவனங்கள் மசோதா, 2025 எனும் புதிய சட்டத்தை அமல்படுத்தியுள்ளது, இதன் மூலம் யூனியன் பிரதேசத்திலுள்ள வணிக நிறுவனங்கள் 24 மணி நேரமும், வாரத்தில் ஏழு நாட்களும் செயல்பட அனுமதிக்கப்பட்டுள்ளன. இந்த அறிவிப்பை துணை முதல்வர் சுரிந்தர் சவுத்ரி, “அதிகாரம் பெற்ற தொழிலாளர் சக்தி: சவால்களை வாய்ப்புகளாக மாற்றுதல்” என்ற தலைப்பில் ஜம்முவில் நடைபெற்ற ஒரு நாள் மாநாட்டில் வெளியிட்டார். அக்டோபர் 2025இல் ஜம்மு-காஷ்மீர் சட்டமன்றம் நிறைவேற்றிய இந்த மசோதா, பொருளாதார புத்துயிர்ப்பை ஊக்குவிக்கும் முக்கிய நடவடிக்கையாக கருதப்படுகிறது.

லட்சத்தீவு மற்றும் அந்தமான் நிகோபார் தீவுகளில் மக்கள் தொகை 2051-ஆம் ஆண்டுக்குள் அதிகரிக்கும்: அறிக்கை

சர்வதேச இடப்பெயர்வு மற்றும் மேம்பாட்டு நிறுவனம் (IIMAD) மற்றும் இந்தியாவின் மக்கள் தொகை அறக்கட்டளை (PFI) வெளியிட்ட தேசிய அளவிலான அறிக்கையின்படி, லட்சத்தீவு மற்றும் அந்தமான் நிகோபார் தீவுகளின் மக்கள் தொகை முறையே 9.68% மற்றும் 5.73% அளவுக்கு 2051ஆம் ஆண்டுக்குள் அதிகரிக்கும் என கணிக்கப்பட்டுள்ளது. லட்சத்தீவின் மக்கள் தொகை 2016இல் 67,642 ஆக இருந்து 2051இல் 74,194 ஆக உயரும் எனவும், அந்தமான் நிகோபார் தீவுகளின் மக்கள் தொகை 3,98,310இல் இருந்து 4,21,135 ஆக உயரும் எனவும் அறிக்கை கூறுகிறது. “Unravelling India’s Demographic Future: Population Projections for States and Union Territories 2021–2051” என்ற தலைப்பில் வெளியிடப்பட்ட இந்த அறிக்கை, சிறிய மாநிலங்கள் மற்றும் யூனியன் பிரதேசங்களுக்கு மக்கள் தொகைக் கணிப்பை உருவாக்க கணித மற்றும் தளவாட முறைகள் பயன்படுத்தியுள்ளது. இதற்காக மக்கள் தொகைக் கணக்கெடுப்பு, SRS, தேசிய குடும்ப சுகாதார ஆய்வு (NFHS), சிவில் பதிவு அமைப்பு (CRS) மற்றும் தேசிய மாதிரி ஆய்வு (NSS) போன்ற தரவுகள் பயன்படுத்தப்பட்டுள்ளன.

ஆசியா பவர் இன்டெக்ஸ் 2025: ஆசியாவின் மூன்றாவது சக்திவாய்ந்த நாடாக இந்தியா

ஆஸ்திரேலியாவின் லோவி ஆய்வு நிறுவனம் வெளியிட்ட ஆசியா பவர் இன்டெக்ஸ் 2025 பட்டியலில் இந்தியா மூன்றாவது இடத்தில் 40 புள்ளிகளுடன் ஆசியாவின் முக்கிய சக்தியாக உருவெடுத்துள்ளது. இந்த ஆய்வு பொருளாதார திறன், ராணுவ வலிமை, இராஜதந்திர செல்வாக்கு, கலாசார உறவுகள் ஆகிய அடிப்படைகளில் நடத்தப்பட்டது. இதில் அமெரிக்கா 80.5 புள்ளிகளுடன் முதலிடத்திலும், சீனா 73.7 புள்ளிகளுடன் இரண்டாவது இடத்திலும் உள்ளன. பொருளாதார திறனை வளர்த்துக்கொண்ட நாடுகள் பிரிவில் இந்தியா கடந்த ஆண்டு பெற்ற மூன்றாவது இடத்திலிருந்து முதலிடத்திற்கு முன்னேறி, ஜப்பானை பின்னுக்குத் தள்ளியுள்ளது. இணைய குற்றங்கள், பொருளாதார உறவுகள், ராணுவ தகவல் பரிமாற்றம் போன்ற பிரிவுகளில் இந்தியா 11-ஆவது இடத்தில் உள்ளது. எனினும், வெளிநாட்டு முதலீடுகளைப் பெறும் நாடுகளில் இந்தியா சீனாவைவிட முன்னிலை வகிக்கிறது. முதல் 10 நாடுகள் அமெரிக்கா, சீனா, இந்தியா, ஜப்பான், ரஷ்யா, ஆஸ்திரேலியா, தென் கொரியா, சிங்கப்பூர், இந்தோனேசியா மற்றும் மலேசியா ஆகும்.

பிரபலமானவர்கள், விருதுகள் மற்றும் நிகழ்வுகள்

பி. ஓபுல் ரெட்டியின் பிறந்த நூற்றாண்டை முன்னிட்டு அஞ்சல் தலை வெளியீடு

தபால் துறை (India Post) சார்பில் தொழிலதிபர் மற்றும் பரோபகாரர் பி. ஓபுல் ரெட்டியின் 100வது பிறந்தநாள் விழாவையொட்டி, சிறப்பு 'மை ஸ்டாம்ப்' அஞ்சல் தலை சென்னையில் வெளியிடப்பட்டது. இந்த அஞ்சல் தலையை அஞ்சல் சேவைகள் சென்னை மண்டல இயக்குநர் மேஜர் மனோஜ் எம்., அப்பல்லோ மருத்துவமனை குழுமத்தின் நிறுவனர்-தலைவர் டாக்டர் பிரதாப் சி. ரெட்டி முன்னிலையில் வெளியிட்டார். பி. ஓபுல் ரெட்டி, 1972ஆம் ஆண்டு, மட்சுஷிதா (பானாசோனிக்) நிறுவனத்துடன் இணைந்து இந்தோ நேஷனல் லிமிடெட் (நிப்போ பேட்டரிகள்) நிறுவினார். அவர் இந்திய பாரம்பரிய கலைகளின் புரவலராகவும் விளங்கினார். விழாவில் அப்பல்லோ மருத்துவமனை குழுமத்தினரும், ஓபுல் ரெட்டியின் குடும்பத்தினரும் கலந்து கொண்டனர்.

சர்வதேசச் செய்திகள்

துருக்கியின் நீல மசூதியைப் பார்வையிட்டார் போப் பிரான்சிஸ்

போப் பிரான்சிஸ், தனது துருக்கி மற்றும் வெளன்பா (அல்பேனியா) வெளிநாட்டு பயணத்தின் ஒரு பகுதியாக, 2025 நவம்பர் 30 அன்று துருக்கியின் இஸ்தான்புல் நகரில் உள்ள நீல மசூதியை (Blue Mosque) பார்வையிட்டார். இது அவர் போப்பாக பொறுப்பேற்ற பிறகு முதன்முறையாக ஒரு இஸ்லாமிய வழிபாட்டு தலத்துக்குச் சென்ற நிகழ்வாகும். ஒரே நேரத்தில் 10,000 பேர் வழிபாடு செய்யக்கூடிய இந்த மசூதி வளாகத்தை அவர் 20 நிமிடங்கள் பார்வையிட்டார். துருக்கி பயணத்தை முடித்த பின் அவர் வெளன்பாவுக்குப் (அல்பேனியா) புறப்பட்டார்.

தேசியச் செய்திகள்

ஐஐடி மதராஸ் – பால்ஸ் புரிந்துணர்வு ஒப்பந்தம்: தொழில்முனைவோர் மேம்பாடு

ஐஐடி மதராஸ் மற்றும் பால்ஸ் (Pan IIT Alumni Leadership Series) அமைப்பு இணைந்து தொழில்முனைவோர் மேம்பாட்டு மாநாட்டை சென்னையில் நவம்பர் 30, 2025 அன்று நடத்தியது. இதில் பால்ஸ் அமைப்பு மற்றும் ஐஐடி இன்டலெக்சுவல்ஸ் அகாடமி இடையே புதிய யுக தொழில்முனைவோரை ஊக்குவிக்கும் புரிந்துணர்வு ஒப்பந்தம் (MoU) கையெழுத்தானது. பல்வேறு ஐஐடிகளின் முன்னாள் மாணவர் சங்கமாக செயல்படும் பால்ஸ், நாடு முழுவதும் உள்ள 67 பொறியியல் கல்லூரிகளுடன் இணைந்து தொழில்முனைவுத் திறன்களை ஊக்குவித்து வருகிறது. இந்த மாநாட்டின் நோக்கம் தொழில்–கல்வி ஒத்துழைப்பை வலுப்படுத்தி, புதுமை மற்றும் எதிர்காலத்துக்குத் தயாரான தொழில்முனைவோரை உருவாக்குதல் ஆகும். மாநாட்டில் பேராசிரியர் அசோக் ஜூன்குன்வாலா (IIT Madras) மற்றும் டாக்டர் சந்தர் வேணுகோபால் (மஹிந்திரா இனோவேஷன் துறை) உள்ளிட்டோர் பங்கேற்றனர்.