TNPSC தேர்வுக்கான முக்கிய தினசரி நடப்பு நிகழ்வுகள் – 16-09-2025

முக்கிய தினங்கள்

உலக ஓசோன் தினம் 2025: அறிவியலிலிருந்து உலகளாவிய நடவடிக்கைக்கு

ஒவ்வொரு ஆண்டும் செப்டம்பர் 16 அன்று கடைபிடிக்கப்படும் உலக ஓசோன் தினம், ஓசோன் படலத்தின் முக்கியத்துவம் மற்றும் அதை பாதுகாப்பதின் அவசியத்தை நினைவுபடுத்துகிறது.

2025 ஆம் ஆண்டில், வியன்னா ஒப்பந்தம் (1985) 40 ஆண்டுகளை நிறைவு செய்கிறது. இந்த ஆண்டின் கரு “அறிவியலிலிருந்து உலகளாவிய நடவடிக்கைக்கு” (From Science to Global Action) ஆகும். இது, ஓசோன் அழிவு குறித்து அறிவியல் முதலில் எச்சரித்தது எவ்வாறு, அதைத் தடுக்க உலக நாடுகள், கொள்கைகள் மற்றும் பொதுமக்களின் பங்களிப்பு ஒன்றிணைய வேண்டும் என்பதை வலியுறுத்துகிறது.

மாண்ட்ரீயல் ஒப்பந்தம் (1987) போன்ற சர்வதேச உடன்படிக்கைகள் மூலம், பல ஆவையோசோன் அழிவூக்கிகள் (ODS) தடைசெய்யப்பட்டன அல்லது குறைக்கப்பட்டன. இதனால் ஓசோன் படலம் மெல்ல மீளத் தொடங்கியிருக்கிறது. ஆனால் நிபுணர்கள், இது இன்னும் நுணுக்கமான நிலைமையிலேயே இருப்பதாகவும் தொடர்ந்த பாதுகாப்பு தேவைப்படுவதாகவும் எச்சரிக்கின்றனர்.

இந்த நாள், அரசுகள், தொழில், அமைப்புகள் மற்றும் பொதுமக்கள் எல்லோரும் ஒன்றிணைந்து ஓசோன் படலத்தை பாதுகாக்கும் நடவடிக்கைகளை வலுப்படுத்த வேண்டிய அவசியத்தை வலியுறுத்துகிறது.

விளையாட்டுச் செய்திகள்

14வது முறையாக உலக சாதனை படைத்த டுப்லாண்டிஸ்

ஸ்வீடன் போல்வால்ட் வீரர் ஆர்மண்ட் “மோண்டோ” டுப்லாண்டிஸ், திங்கள்கிழமை 6.30 மீட்டர் உயரத்தை தாண்டி, 14வது முறையாக உலகச் சாதனையை படைத்து, தனது மூன்றாவது உலக சாம்பியன் பட்டத்தையும் கைப்பற்றினார்.

லூசியானாவில் பிறந்த அவர், தாய்நாடு ஸ்வீடனுக்காக விளையாடி வருகிறார். தற்போது, தனது 49வது தொடர்ச்சியான வெற்றி மற்றும் ஒலிம்பிக் உட்பட ஐந்தாவது பெரிய பட்டத்தை வென்றுள்ளார். சாதனையை அவர் மூன்றாவது முயற்சியிலேயே எட்டியபோது, வெள்ளி பதக்கம் பெற்ற எமானுயில் கராலிஸ் கைகளில் பாய்ந்து கொண்டாட்டத்தைத் தொடங்கினார்.

இந்த சாதனையால், டுப்லாண்டிஸ் வரலாற்றில் சிறந்த போல்வால்ட் வீரராகவும், தடகள உலகின் முன்னணி நட்சத்திரமாகவும் திகழ்கிறார்.

7-வது முறையாக துலீப் கோப்பை சாம்பியன் ஆன மத்திய மண்டலம்

62-வது துலீப் கோப்பை கிரிக்கெட் இறுதியில், மத்திய மண்டலம், தெற்கு மண்டலத்தை 6 விக்கெட் வித்தியாசத்தில் வீழ்த்தி, திங்கள்கிழமை சாம்பியனானது. இதன் மூலம், 11 ஆண்டுகளுக்குப் பிறகு மீண்டும் பட்டம் வென்றதோடு, 7-வது முறையாக கோப்பையை கைப்பற்றியது.

யஷ் ரத்னோட் (194 ரன்கள்) மற்றும் சாய் சௌஹான் (136 ரன்கள், 16 விக்கெட்டுகள்) சிறப்பாக விளங்கினர்.

முதல் இன்னிங்ஸில் தெற்கு மண்டலம் 149 ரன்களுக்கு ஆட்டமிழந்தது; மத்திய மண்டலம் 511 ரன்கள் குவித்தது.

பின்னர் தெற்கு மண்டலம் 426 ரன்கள் எடுத்தது. இறுதியில், 65 ரன்கள் என்ற இலக்கை மத்திய மண்டலம் எளிதில் அடைந்து வெற்றி பெற்றது.

வைஷாலி, கேண்டிடேட்ஸ் போட்டிக்கு தகுதி பெற்றார்

உஸ்பெகிஸ்தானில் நடந்த பிடே கிராண்ட் ஸ்விஸ் செஸ் போட்டியில், இந்திய கிராண்ட்மாஸ்டர் ஆர். வைஷாலி மகளிர் பிரிவில் சாம்பியன் பட்டம் வென்று, கேண்டிடேட்ஸ் போட்டிக்குத் தகுதி பெற்றார்.

11 சுற்றுகளில் 8 புள்ளிகள் பெற்ற வைஷாலி, டை-பிரேக்கரில் ரஷ்யாவின் கேத்ரினா லக்னோவை வீழ்த்தினார். இதன் மூலம், தொடர்ந்து இரண்டாவது முறையாக பட்டம் வென்றுள்ளார்.

ஆண்கள் பிரிவில், நெதர்லாந்தின் அனிஷ் கிரி சாம்பியனாகி கேண்டிடேட்ஸ் போட்டிக்குத் தகுதி பெற்றார். இந்தியாவின் பிரக்ஞானந்தா 7 புள்ளிகளுடன் 7-ஆம் இடம், டி. குகேஷ் 41-ஆம் இடம் பெற்றனர்.

சர்வதேசச் செய்திகள்

சீனாவின் பசிபிக் தாக்கத்தைக் கட்டுப்படுத்த ஆஸ்திரேலியா–PNG பாதுகாப்பு ஒப்பந்தம்

ஆஸ்திரேலியா மற்றும் பப்புவா நியூ கினியா (PNG) இடையிலான புதிய பாதுகாப்பு ஒப்பந்தம், போர்ட் மோர்ஸ்பியில் புதன்கிழமை கையெழுத்தாக உள்ளது. இது PNG-யின் சுதந்திரத்தின் 50 ஆண்டு விழாவோடு இணைகிறது. இந்த ஒப்பந்தத்தின் மூலம், PNG குடிமக்கள் ஆஸ்திரேலிய ராணுவத்தில் சம ஊதியத்துடன் பணியாற்றும் வாய்ப்பு பெறுவதோடு, குடியுரிமைக்கான பாதையும் திறக்கப்படுகிறது.

ஆஸ்திரேலிய பாதுகாப்பு அமைச்சர் ரிச்சர்ட் மார்ல்ஸ், இந்த ஒப்பந்தத்தை “வரலாற்று சிறப்பு மிக்கது” எனக் குறிப்பிட்டார். நியூசிலாந்து, கனடா, இங்கிலாந்து, அமெரிக்கா குடிமக்களை ஏற்கனவே ராணுவத்தில் சேர்த்துக்கொண்டு வந்த ADF, இப்போது பசிபிக் நாடுகளிலிருந்தும் சேர்க்க விரும்புவதாக அவர் தெரிவித்தார்.

PNG பாதுகாப்பு அமைச்சர் பில்லி ஜோசப், இந்த ஒப்பந்தம் பிராந்திய பாதுகாப்பை வலுப்படுத்தும் என்று கூறி, “பாதுகாப்பான PNG-யே பாதுகாப்பான ஆஸ்திரேலியா, பாதுகாப்பான ஆஸ்திரேலியாவே பாதுகாப்பான PNG” என்று வலியுறுத்தினார்.

இந்த ஒப்பந்தம், இரு நாடுகளும் 2023-ல் கையெழுத்திட்ட விரிவான பாதுகாப்பு ஒப்பந்தத்தின் தொடர்ச்சியாகவும், பசிபிக் பகுதியில் சீனாவின் வளர்ந்துவரும் தாக்கத்தை சமாளிக்க ஒரு முக்கியமான முயற்சியாகவும் பார்க்கப்படுகிறது.

தேசியச் செய்திகள்

வக்பு சட்ட திருத்தத்தின் சில பிரிவுகளுக்கு உச்ச நீதிமன்றம் தடை

வக்பு (திருத்த) சட்டம், 2025-ஐ முழுமையாக நிறுத்த மறுத்த உச்ச நீதிமன்றம், சில முக்கிய பிரிவுகளை இடைக்காலமாக நிறுத்தி வைத்தது.

அதில், வக்புக்காக சொத்தை அர்ப்பணிக்க ஒருவர் ஐந்து ஆண்டுகள் இஸ்லாத்தைப் பின்பற்றியிருக்க வேண்டும் என்ற நிபந்தனைக்கு தடை விதிக்கப்பட்டது. இதற்கான நடைமுறைகளை அரசு வகுக்கும் வரை அமல்படுத்த முடியாது எனக் கூறப்பட்டது.

மேலும், மாவட்ட ஆட்சியர் தனிநபர் உரிமைகள் குறித்து தீர்ப்பளிக்கும் விதியை நீதிமன்றம் நிறுத்தியது. இவ்வாறு செய்வது அதிகாரப் பிரிவினை மீறும் எனக் கூறப்பட்டது. தீர்ப்பாயம் விசாரிக்கும் வரை, எந்த மூன்றாம் தரப்பு உரிமைகளும் உருவாக்கப்பட முடியாது.

வக்பு சொத்துக்களை நிர்வகிப்பதில் முஸ்லிம் அல்லாதவர்களை நியமிப்பது தொடர்பாக, மத்திய வக்பு கவுன்சிலில் 11 பேரில் 3 பேரும், 22 பேரில் 4 பேரும் முஸ்லிம் அல்லாதவர்கள் இருக்கலாம் என அனுமதிக்கப்பட்டது. ஆனால், வாரிய தலைமைச் செயல் அதிகாரியாக முஸ்லிம் அல்லாதவர் நியமிக்கப்படுவதைத் தடுக்காமல், இயன்ற வரை முஸ்லிம் நியமிக்கப்பட வேண்டும் என நீதிமன்றம் பரிந்துரைத்தது.

அதேவேளை, 'பயனரால் வக்பு' (Waqf by user) என்ற கருத்தை ரத்து செய்த விதியை நீதிமன்றம் ஏற்றுக்கொண்டது. 1923-இலிருந்து பதிவுசெய்யப்படாத வக்புகள் தற்போது புகார் அளிக்க முடியாது எனவும், அரசு சொத்துக்களை தவறாக வக்பு எனக் காட்டி ஆக்கிரமிப்பதைத் தடுப்பது சட்டப்பூர்வமானது எனவும் நீதிமன்றம் தெரிவித்தது.

உள்நாட்டில் தயாரிக்கப்பட்ட 2-வது நீர்மூழ்கிக் கப்பல் கடற்படையிடம் ஒப்படைப்பு

உள்நாட்டில் வடிவமைக்கப்பட்ட இரண்டாவது நீர்மூழ்கி எதிர்ப்பு போர்க்கப்பல் ‘ஆந்த்ரோத்’ இந்திய கடற்படைக்கு ஒப்படைக்கப்பட்டது.

மேற்கு வங்க மாநிலம் கொல்கத்தாவில் உள்ள கார்டன் ரீச் கப்பல் கட்டுமான நிறுவனம் இந்தக் கப்பலை உருவாக்கியுள்ளது. இது இந்தியப் பெருங்கடலில் சீனாவின் ஆதிக்கத்தை சமாளிப்பதில் முக்கிய பங்காற்றும் என எதிர்பார்க்கப்படுகிறது.

இந்திய கடற்படை வெளியிட்ட தகவலின்படி, எட்டு நீர்மூழ்கி எதிர்ப்பு கப்பல்களை உள்நாட்டில் தயாரிக்கும் திட்டத்தின் கீழ், இரண்டாவது கப்பலான ஆந்த்ரோத் சனிக்கிழமை ஒப்படைக்கப்பட்டது. இது பாதுகாப்புத்துறையில் தன்னிறைவை மேம்படுத்தும் ஒரு முக்கிய மைல்கல்லாக கருதப்படுகிறது. 77 மீட்டர் நீளமுடைய இக் கப்பலில் ஏவுகணைகள் மற்றும் நீர்மூழ்கி எதிர்ப்பு ராக்கெட்டுகள் பொருத்தப்படவுள்ளன.

ஆத்மநிர்பர் பாரத் திட்டத்தின் கீழ், 80% உபகரணங்கள் நாட்டிலேயே தயாரிக்கப்பட்டுள்ளதால், கப்பல் கட்டுமான துறையில் வெளிநாட்டு சார்பை குறைப்பதில் இது ஒரு முன்னேற்றமாகும்.

மேலும், லட்சத்தீவின் ஆந்த்ரோத் தீவின் பெயர் சூட்டப்பட்டுள்ள இக் கப்பல், கடலோரப் பாதுகாப்புக்கு இந்தியா வழங்கும் முக்கியத்துவத்தை வெளிப்படுத்துகிறது.

விவசாயம் 3.7% வளர்ச்சி: மத்திய அமைச்சர் சிவ்ராஜ் சிங் சௌஹான்

நிகழும் நிதியாண்டின் முதல் காலாண்டில் நாட்டில் விவசாயம் 3.7 சதவீதம் வளர்ச்சியடைந்துள்ளதாக மத்திய விவசாயத் துறை அமைச்சர் சிவ்ராஜ் சிங் சௌஹான் தெரிவித்தார்.
மத்திய அரசின் ‘ஒரு நாடு, ஒரு விவசாயம், ஒரு அணி’ என்ற முன்முயற்சி விவசாயத் துறையில் ஒருங்கிணைந்த முயற்சிகள் மற்றும் கூட்டுறவை ஊக்குவிக்கும் நோக்கத்தைக் கொண்டுள்ளது.

இது உலகின் பிற நாடுகளின் விவசாயத் துறையில் ஏற்பட்டுள்ள வளர்ச்சியுடன் ஒப்பிடுகையில் மிக அதிகம். விவசாயிகள், விஞ்ஞானிகளின் கடும் உழைப்பு, மத்திய அரசின் விவசாயிகளுக்கு உகந்த கொள்கைகள் ஆகியவையே இதற்குக் காரணம்.
போலி உரங்கள், விதைகள், பூச்சிக்கொல்லிகளை தயாரித்து விற்பனை செய்வோர் மீது கடுமையான நடவடிக்கை மேற்கொள்ளப்படும்.
விவசாயிகள் சுரண்டப்படுவதை மத்திய அரசு அனுமதிக்காது. விவசாய விரிவாக்க பணிகள் மிகவும் முக்கியமானவை.
வானிலை மாற்றத்தை கணிக்க முடியாத நிலைமை தொடர்ந்து அதிகரித்து வருகிறது. எனவே விவசாயிகள் பயிர் காப்பீடு மேற்கொள்ள வேண்டும்.